Istano Seri Menanti

Wikipedia Minangkabau - Lubuak aka tapian ilimu
(Dialiahkan dari Istana Seri Menanti)
Loncat ke navigasi Loncat ke pencarian
Istana Seri Menanti, Negeri Sembilan.

Istano Seri Menanti atau Istano Lamo Seri Menanti (Baso Nogoghi: Istano Lamo Soghi Monanti) adolah istano nan talatak di Kuala Pilah, Nagari Sambilan, Malaysia. Bangunan iko didirikan manuruik asitektur masarakaik Minangkabau. Bangunan lamo nan masih samparono jo elok iko dibuek dari kayu dan dijadikan tampek tingga rasmi Yang di-Pertuan Besar Negeri Sembilan sakitar taun 1900-an. Kini, karano inyo suatu warisan sijarah, istano iko barubah "paranan" manjadi museum.

Istana Lama Seri Menanti mulai dibuek pado taun 1902 sampai salasai taun 1908. Istana iko dibuek dek karano Istan0 Pulih alah dibakar dek tantara Inggirih ketika mangaja Yamtuan Antah katiko parang Bukit Putus. Istiadaik parasmian istano iko dilakukan dek Yang di-Pertuan Muhammad Ibni Almarhum Yamtuan Antah. Tuanku alah basumayam di istano iko hinggo taun 1931. Sasudah itu, Tuanku pindah ka Istano Besar Seri Menanti nan baru dibuek ndak jauah jo istano lamo nangko.

Tinggi istano iko ampek tingkek. Rancangan bangun samulo dibuek dek duo urang tukang kayu Melayu banamo Kahar jo Taib. Tukang Kahar alah dibari sangsako Datuak Panglimo Sutan dek Tuanku Muhammad karano jasonyo. Rancangan bangun istano iko diteliti baliak dek Katua Palukih Pelan (Arsitek), Woodford dari Kantua Pekerjaan Umum, Seremban dan diluluihan pado bulan Nopember 1902 dek Insinyur Nagari jo Residen British.

Istana iko mampunyoi 99 batang tiang tamasuak ampek batang tiang seri nan panjangnyo 67 kaki (20 m). Kaampek-ampek tiang iko diambiak dari Bukit Pergai, Jelebu. Kayu-kayu lain, iyolah kayu jinih penak, diambil dari Bukittinggi, Sumatera. Istana iko unik karano indak manggunoan paku basi tapi pakunyo dibuek dari kayu nan disabuik pasak. [1]. Pasak kayu kareh digunoan untuak manyambuang papan. Atok istano iko sarupo tanduak kabau, nan manjadi lambang kaamanan.

Rujuakan[suntiang | suntiang sumber]

  1. History of Istana Seri Menanti Istana Seri Menanti's history