Pamarintahan Revolusioner Republik Indonesia

Wikipedia Minangkabau - Lubuak aka tapian ilimu

Pamarentahan Revolusional Republik Indonesia (umum disingek PRRI) adolah organisasi nan dibuek dek Achmad Husein[1] dan dipimpin dek Syafruddin Prawiranegara sabagai Perdana Mantari. PRRI ko di buek untuak manuntuik Presiden Soekarno supayo adia dalam mambangun Indonesia, sahinggo pambangunan Indonesia ko indak hanyo dipusatkan di Jawa tapi di saluruh Indonesia. Namun, Soekarno jo arogansi kekuasaannyo justru manjawab tuntutan ko jo sanjato. Presiden Soekarno maanggap PRRI ko sabagai pambarontak, lalu dikirimlah tentara dari Jawa ka Sumatera untuak manumpas PRRI nan dianggapnyo pambarontak ko.[2]

Aksi tentara nan dikirim untuk manumpas PRRI bajalan tanpa kontrol. Mereka acok malakuan tindak kakarasan. Ribuan urang nan dicurigai sabagai simpatisan PRRI ditangkok sacaro sawenang-wenang. Dari patangahan April 1958 inggo 1960, sado sakolah SMP jo SMA tutuik. Baitu pulo Universitas Andalas nan baru bajalan duo tahun tapaso tutuik pulo dek ampiang sado dosen jo mahasiswanyo ikuik PRRI.

Kondisi Sumatra Barat pasca-PRRI takah "nagari dialahkan garudo". Rakyat masih trauma tarhadap parang. Harun Zain nan datang ka Sumatra Barat pado tahun 1961 manulihan suasano mancekam jo mambisu katiko inyo tiba di Padang. Inyo mancaliak wajah-wajah mahasiswa nan apatis jo indak barani mangecek dek sabagian gadang mereka adolah eks-PRRI.

Ultimatum dan deklarasi PRRI[suntiang | suntiang sumber]

Kepala Staf Angkatan Darat (KSAD) Abdul Haris Nasution maagiah parentah operasi militer untuak manumpas PRRI.

Pado Januari 1958, balansuang partemuan di Sungai Dareh nan dihadiri pimpinan satiok militer di daerah jo tokoh sipil, di antaranyo Ahmad Husein, Maludin Simbolon, Barlian, Ventje Sumual, Zulkifli Lubis, Dahlan Djambek, Mohammad Natsir, Syafruddin Prawiranegara, Boerhanoedin Harahap, dan Soemitro Djojohadikusumo. Partemuan hari patamo manghasilkan kasepakatan untuak malahirkan "gerakan koreksi terhadap pamimpin nan batingkah inkonstitusional" nan "bukan tindakan disintegrasi" dan maangkek Ahmad Husein sabagai Ketua Dewan Perjuangan.[3]

Pado 10 Februari 1958, sabagai tindak lanjuik dari partemuan di Sungai Dareh, Ahmad Husein salaku Katua Dewan Perjuangan mangaluaan ultimatum nan isinyo agar Kabinet Djuanda manyarahan mandatnya kapado Presiden dengan wakatu 5 x 24 jam dan Presiden dimintak kembali kapado kadudukan konstitusionalnyo. Ultimatum tersebut bukan tuntutan pambentukan negara baru maupun pamberontakan, tapi labih marupoan protes mangenai baa konstitusi dijalanan.[4]

Ultimatum PRRI indak digubris dek pamarentah pusat, samantaro Ahmad Husein jo kawan-kawannyo dipecat dari Angkatan Darat. Pado 15 Februari 1958, bertepatan jo bateh akhir ultimatum, Ahmad Husein maumuman tagaknyo Pemerintahan Revolusioner Republik Indonesia (PRRI) sabagai pamarentah tandingan di Padang.[5]

PRRI mambuek kabinet dengan Syafruddin Prawiranegara sabagai Perdana Menteri.[6] Adapun susunan kabinet yakni Sjafruddin Prawiranegara marangkap Menteri Keuangan; Assaat sabagai Menteri Dalam Negeri (Dahlan Djambek sempat mamaciknyo sabalun Assaat tibo di Padang); Maludin Simbolon sabagai Menteri Luar Negeri; Soemitro Djojohadikoesoemo sabagai Menteri Perhubungan dan Pelayaran; Muhammad Sjafei sabagai Menteri PPK dan Kesehatan; Saladin Sarumpaet sabagai Menteri Pertanian dan Perburuhan; Muchtar Lintang sabagai Menteri Agama; Saleh Lahade sabagai Menteri Penerangan; Abdul Gani Usman sabagai Menteri Sosial; sarato Dahlan Djambek sabagai Menteri Pos dan Telekomunikasi (sasudah Assaat tibo di Padang).

Deklarasi PRRI mandapek sambutan dari wilayah Sulawesi Utara jo Sulawesi Tengah. Pado 17 Februari 1958, kawasan tersebut manyatoan mandukuang PRRI (gerakannyo dikenal sabagai Permesta). Namun, pamarentah pusat mancaliak PRRI sabagai gerakan separatis dan KSAD Abdul Haris Nasution maagiah perintah operasi militer untuak manumpas PRRI.[7]

Di Sumatra Barat, ampiang sado partai politik nan ado, kacuali Partai Komunis Indonesia (PKI) jo Partai Nasional Indonesia (PNI), mandukuang gagasan nan diperjuangkan PRRI. Namun, katiko pamarentah pusat marespons PRRI dengan tindakan represif dan parjuangan daerah mulai kalah, Persatuan Tarbiyah Islamiyah (Perti) jo Partai Adat Rakyat mulai mambelot dan akhianya bagabuang jo partai nan babasis nasional. Bilo dibandiangan dengan partai-partai nasional itu lainnyo, sikap mereka terhadap PRRI labiah bangih daripado PKI.[8]

Katerlibatan Amerika Serikat[suntiang | suntiang sumber]

Sijarawan Asia Tenggara Audrey Kahin mangungkap adonya katerlibatan Badan Intelijen Pusat (CIA) milik Amerika Serikat dalam PRRI. PRRI indak dapek dilapehan dari rangkaian parebutan pangaruah dalam Perang Dingin antaro Amerika Serikat jo Uni Soviet. Amerika Serikat nan sangaik anti terhadap komunisme, maraso cameh mancaliak parkembangan Partai Komunis Indonesia (PKI) di Indonesia dan untuak maimbangi samakin kueknyo komunisme, Amerika Serikat mancuba maagiah dukungan kapado daerah nan tarang-tarangan manyatoan anti terhadap komunisme.[9]

Namun, dalam parkembangannyo, Amerika Serkat maninggaan PRRI dan mampelokan hubuangannyo jo Soekarno.[10] Hal iko tajadi sasudah tatembaknyo pasawat nan dikamudian dek Allen Pope pado 18 Mei 1958. Amerika Serikat manyadari bahasonyo mandukuang PRRI indak lai marupoan langkah nan realistis untuak maapuih pangaruah komunisme dalam pamarentahan Indonesia. Alih-alih manahan pangaruah kalompok komunisme, Amerika Serikat babaliak mandukuang Soekarno jo kabijakannyo.[11]

Operasi militer[suntiang | suntiang sumber]

Kolonel Ahmad Yani mamimpin briefing Operasi 17 Agustus pado 12 April 1958
Korps Marinir Indonesia dalam operasi panumpasan PRRI di Air Gadang, Pasaman.

Pamarentah pusek manganggap PRRI sabagai gerakan separatisme nan harus segera ditumpas jo kakuatan sanjato. Pamarentah pusek malalui Angkatan Perang Republik Indonesia (APRI atau dijuluki "tentara pusat") malakukn operasi gabungan nan tadiri dari Angkatan Darat, Angkatan Laut, jo Angkatan Udara. Operasi nan dilancarkan yakni Operasi Tegas, Operasi 17 Agustus, Operasi Saptamarga, Operasi Sadar, jo Operasi Merdeka.

Pado tahap awal balangsuangnyo operasi militer, kagiatan administrasi pamarentahan lumpuah, pajabat jo pegawai malakuan pangungsian demi manyalamaikan diri. Untuak manghiduikan baliak pamarentahan, mako pamarentah pusek mamacah Sumatra Tengah manjadi tigo provinsi, salah satunyo Sumatra Barat. Pado tanggal 17 Mei 1958, Kaharuddin Datuk Rangkayo Basa diangkek manjadi Gubenur Sumatra Barat patamo.[12]

Di sisi lain, aksi tentara pusek bajalan tanpa kontrol. Tentara APRI malakuan tindak kekerasan. Ribuan urang nan dicurigai sabagai simpatisan PRRI ditangkok sacaro sawenang-wenang. Aksi pambunuhan massal tajadi di sejumlah tampek. Di bawah Jam Gadang, APRI mambunuah sakitar 187 urang dengan caro ditembak. Hanyo 17 urang dari jumlah tersebut nan marupoan tentara PRRI, sadangkan salabiahnyo marupoan rakyaik sipil.[13] Para mayat lalu dijejer di halaman Jam Gadang.[14]

Dari partangahan April 1958 sampai 1960, sadoalah sakolah SMP jo SMA tutuik. Universitas Andalas nan baru bajalan duo tahun tapaso ditutuik dek ampiang sado dosen jo mahasiswanyo ikuik PRRI. Manjalang akhia tahun 1960, sadoalah wilayah Sumatera Barat berhasil dikuasai tentara APRI.[12][15]

Abdul Haris Nasution mancataik, operasi militer PRRI mamakan korban sabanyak 7.146 urang tewas di kaduo balah pihak. Sabagian gadang nan tewas, yakni 6.115 barasa "dari pihak PRRI". Saafroedin Bahar mancataik, jumlah korban akibaik konflik PRRI nan singkek jauah labiah banyak daripado korban parang jo Balando pado zaman revolusi kamerdekaan.[16]

Salain operasi militer, pamarentah pusek malakuan pandekatan sacaro diplomatis dengan mambujuak tentara PRRI untuak manyaah dan kembali setia pado NKRI. Peristiwa iko disabuik Operasi Pemanggilan Kembali.[17] Pado 29 Mei 1961, Ahmad Husein sacaro resmi manyerah basamo sakitar 24.500 pangikuiknya.[18]

Salamo babarapo tahun, pimpinan sipil jo militer PRRI dikarantina. Masyarakaik, tautamo mahasiswa jo pelajar, mangalami tekanan hiduik nan barek.[19]

Pasca-PRRI[suntiang | suntiang sumber]

Tugu Pembebasan, ditagakan dek tentara pusek di satiok daerah nan berhasil dirabuik dari pasukan PRRI.[20]

PRRI manyebabkan timbulnyo eksodus besar-besaran urang Minangkabau ka daerah lain.[21] Mochtar Naim dalam bukunyo, Merantau (1984) mancontohan, jumlah orang Minang di Jakarta sabalun tajadinyo peristiwa PRRI dipakiroan kurang dari saratuih ribu urang. Sasudah PRRI, jumlah itu maningkek manjadi babarapo ratuih ribu. Pado 1971, Gubernur Jakarta Ali Sadikin mampakiroan alah ado sakitar satangah juta urang Minang di Jakarta.[22]

Manuruik sijarawan Gusti Asnan, kakalahan PRRI juo manyebabkan adonyo kacenderungan urang Minang maagiah namo anaknyo jo "namo nan aneh".[23] Urang Minang di parantauan nan mangalami tindakan kareh jo cenderung manindas dari pamarentah pusek juo baupayo maubah identitas mereka. Panggilan Padang sabagai ganti Minang manjadi marak sabagai bantuak pangaburan identitas nan dilakuan dek urang Minang pasca-PRRI.[24]

Genosida etnis Minang[suntiang | suntiang sumber]

Potret Soeharto salaku Panglima Kodam Diponegoro

Pada 2 Maret 2000, Harian Mimbar Minang malaporan tamuan Lembaga Bantuan Hukum (LBH) Padang tantang surek Soeharto salaku Panglima Kodam Diponegoro kapado anak buahnyo nan mamarentahan genosida etnis Minang katiko peristiwa PRRI tajadi. Panemuan itu diungkapkan Ketua Tim Investigasi PRRI Yunizar Chaniago. Divisi Diponegoro manjadi momok hitam bagi masyarakaik Sumatera Barat. Harlan Darwis manyabuik kasatuan iko malakuan kakajaman luar biaso takah mambunuah, mambantai, mamperkosa, jo "babagai kajahatan nan sulik dibayangan".[25][26] Manuruik Yunizar, fakta iko mandorong Soeharto katiko manjabaik sabagai presiden untuak manutuik wacana PRRI.[27]

Mananggapi temuan LBH Padang, staf ahli Menteri Negara Urusan Hak Asasi Manusia Muradi Yuti mangatoan bahaso palanggaran HAM nan tajadi pado maso PRRI alun bisa dibaok sampai ka parsidangan HAM dek kakosongan undang-undang nan dapek mangaturnyo.[28]

Soeharto tercatat manjadi panglima di Jawa nan paling basumangaik untuak mangiriman pasukan mambaranguih PRRI. Salamo tahun 1958, inyo alah mangirim sakitar anam batalion ka Sumatera Barat, tamasuak Yoga Sugama jo Ali Moertopo nan marupoan duo urang kaparcayaannyo. Sikap Soeharto maundang parhatian nan positif dari pamarentah pusek maingek para panglima lain di daerah Jawa, manunjuakan sikap ragu-ragu dalam mangiriman pasukan. Karaguan tersebut mungkin sajo disebabkan dek raso enggan untuak saliang baparang malawan sasamo rekan di kamiliteran.[29]

Bacaan lanjuik[suntiang | suntiang sumber]

  • Conboy, Kenneth; Morrison, James (1999). Feet to the Fire CIA Covert Operations in Indonesia, 1957–1958. Annapolis: Naval Institute Press. ISBN 1-55750-193-9. 
  • Doeppers, Daniel (Oct 1972). "An Incident in the PRRI/Permesta Rebellion". Indonesia (14): 192–195. 
  • Feith, Herbet and Lev Daniel (Spring 1963). "The End of the Indonesian Rebellion". Pacific Affairs (Vol.36): 32–46. 
  • Jaspan, M. A. (Winter 1966). "Indonesia: Counterrevolution and Rebellion". Science & Society (Vol.30): 63–69. 
  • Kahin, George McT (1994). "The Impact of American Foreign Policy". Democracy in Indonesia: 1950s and 1990s (Editors: David Bourchier and John Legge): 63–73. 
  • Kahin, George McT. (Oct 1989). "In Memoriam: Sjafruddin Prawinegara". Indonesia (48): 101–105. 

Rujuakan[suntiang | suntiang sumber]

  1. Yayasan Masyarakat Sejarawan Indonesia (2007). Jurnal sejarah: pemikiran, rekonstruksi, persepsi. Yayasan Obor Indonesia. pp. 66-69. https://books.google.co.id/books?id=J0D5OQrqAkQC&pg=PA66&dq=prri&hl=en&sa=X&ved=0ahUKEwiC4ZWxgsrXAhVIUrwKHT-XCA0Q6AEIVzAH#v=onepage&q=prri&f=false. 
  2. Chaniago, Hasril; Edrie, Eko Yanche (2014) (dalam bahaso id). H. Sutan M. Rani Ismael: sosok pengusaha "demi aka". Kabarita. ISBN 978-602-18336-2-9. https://books.google.com/books?id=leHkvQEACAAJ&newbks=0&hl=en. 
  3. Rasyad, Zubir (2009) (dalam bahaso id). Ranah dan adat Minangkabau. Agra Wirasanda/Lembaga Pengembangan Swadaya Masyarakat. ISBN 978-979-19435-0-5. https://books.google.co.nz/books?id=Of7uQQAACAAJ&newbks=0&hl=id&redir_esc=y. 
  4. Lukman Hakiem, (2008), M. Natsir di panggung sejarah republik, Penerbit Republika, ISBN 978-979-1102-43-8.
  5. Petrik Matanasi (2011) (dalam bahaso id). Prajurit-Prajurit di Kiri Jalan. Trompet Books. pp. 72. ISBN 978-602-99131-3-2. https://books.google.co.id/books?id=8NH6WsEB9lkC&pg=PA72&dq=%22PRRI%22+%2215+Februari+1958%22&hl=en&sa=X&ved=2ahUKEwjvmcK3vr_rAhVVbn0KHSdYDpwQ6AEwAHoECAMQAg#v=onepage&q=%22PRRI%22%20%2215%20Februari%201958%22&f=false. 
  6. Marwati Djoened Poesponegoro (1993) (dalam bahaso id). Sejarah Nasional Indonesia. 1. Balai Pustaka. pp. 175. https://books.google.co.id/books?id=TCRGAQAAIAAJ&q=%22PRRI%22+%2215+Februari+1958%22&dq=%22PRRI%22+%2215+Februari+1958%22&hl=en&sa=X&ved=2ahUKEwitmbu_v7_rAhXTdCsKHedbBrQ4ChDoATAGegQICRAC. 
  7. Syamdani (2009) (dalam bahaso id). PRRI, pemberontakan atau bukan?. Media Pressindo. ISBN 978-979-788-032-3. https://books.google.co.id/books?id=R9u37gzZMlUC&pg=PA84&dq=PRRI+merupakan+perang+saudara&hl=en&sa=X&ved=2ahUKEwjC2_GSrc_sAhXLfH0KHUj6DT4Q6AEwAHoECAAQAg#v=onepage&q=PRRI%20merupakan%20perang%20saudara&f=false. 
  8. (dalam bahaso en) Indonesia in Transition: Work in Progress. Pustaka Pelajar. 25 Maret 2003. ISBN 978-979-3237-84-8. https://books.google.co.nz/books?id=IfVwAAAAMAAJ&newbks=0&printsec=frontcover&dq=%22partai-partai+nasional+itu+lainnya,+reaksi%22&q=%22partai-partai+nasional+itu+lainnya,+reaksi%22&hl=id&redir_esc=y. 
  9. https://repository.usd.ac.id/24687/1/Indonesia%20Melawan%20Amerika-min.pdf
  10. Matanasi, Petrik (2011-11-01) (dalam bahaso id). Prajurit-Prajurit di Kiri Jalan. Trompet Books. ISBN 978-602-99131-3-2. https://books.google.com/books?id=8NH6WsEB9lkC&newbks=0&printsec=frontcover&pg=PA71&dq=PRRI++PIAGAM+perjuangan++%22ultimatum%22&hl=id. 
  11. https://repository.usd.ac.id/24687/1/Indonesia%20Melawan%20Amerika-min.pdf
  12. a b Yusra, Abrar (1997) (dalam bahaso id). Tokoh yang berhati rakyat: biografi Harun Zain. Yayasan Gebu Minang. ISBN 978-979-8428-01-2. https://books.google.com/books?id=IL9uAAAAMAAJ&newbks=0&printsec=frontcover&dq=%22BOER+YUSUF%22&q=%22BOER+YUSUF%22&hl=id. 
  13. Syamdani (2009) (dalam bahaso id). PRRI, pemberontakan atau bukan?. Media Pressindo. ISBN 978-979-788-032-3. https://books.google.co.id/books?id=R9u37gzZMlUC&pg=PA88&dq=PRRI+%22jam+Gadang%22&hl=en&sa=X&ved=2ahUKEwiK6Kn9k9HsAhXGWisKHcEnDeAQ6AEwAHoECAIQAg#v=onepage&q=PRRI%20%22jam%20Gadang%22&f=false. 
  14. Ilyas, Abraham (dalam bahaso id). Syair Kisah Perjuangan Anak Nagari 1958-1961: Kalah di Ujung Bedil Menang dengan Silat. Lembaga Kekerabatan Datuk Soda. ISBN 978-602-71254-1-4. https://books.google.co.id/books?id=zKxiDwAAQBAJ&pg=PA17&dq=PRRI+%22jam+Gadang%22&hl=en&sa=X&ved=2ahUKEwiK6Kn9k9HsAhXGWisKHcEnDeAQ6AEwAXoECAQQAg#v=onepage&q=PRRI%20%22jam%20Gadang%22&f=false. 
  15. Djalal, Nasrul; Hendrik, Makmur (2018) (dalam bahaso id). Pelaku dan saksi sejarah angkatan 66 Sumatera Barat bertutur tentang Tritura. Erka. ISBN 978-602-0738-03-1. https://books.google.com/books?id=-ujLwQEACAAJ&newbks=0&hl=id. 
  16. Abrar Yusra (2011) (dalam bahaso id). Azwar Anas: teladan dari ranah Minang. Penerbit Buku Kompas. ISBN 978-979-709-585-7. https://books.google.co.id/books?id=s3m3YARcG_wC&pg=PA100&dq=korban+tewas+PRRI&hl=en&sa=X&ved=2ahUKEwjxvdKDrM_sAhVObSsKHWkuD50Q6AEwAXoECAQQAg#v=onepage&q=korban%20tewas%20PRRI&f=false. 
  17. Kahin, Audrey R. (2005) (dalam bahaso id). Dari pemberontakan ke integrasi Sumatra Barat dan politik Indonesia, 1926-1998. Yayasan Obor Indonesia. ISBN 978-979-461-519-5. https://books.google.co.id/books?id=v0y4-dp9uEEC&pg=PA353&dq=Operasi+Pemanggilan+Kembali&hl=en&sa=X&ved=2ahUKEwionLGWy6_tAhU66XMBHUE1CMUQ6AEwA3oECAAQAg#v=onepage&q=Operasi%20Pemanggilan%20Kembali&f=false. 
  18. Mestika Zed (1995) (dalam bahaso id). Sumatera Barat di panggung sejarah, 1945-1995. Bidang Penerbitan Khusus, Panitia Peringatan 50 Tahun RI, Sumatera Barat. pp. 147. https://books.google.co.id/books?id=qNZwAAAAMAAJ&q=%22Ahmad+Husein%22+%2229+Mei+1961%22&dq=%22Ahmad+Husein%22+%2229+Mei+1961%22&hl=en&sa=X&ved=2ahUKEwiv7L7mxb_rAhXMAnIKHVzPDwEQ6AEwBHoECAQQAg. 
  19. Syamdani (2009) (dalam bahaso id). PRRI, pemberontakan atau bukan?. Media Pressindo. ISBN 978-979-788-032-3. https://books.google.com/books?id=R9u37gzZMlUC&newbks=0&printsec=frontcover&pg=PA7&dq=%22Republik+Persatuan+Indonesia%22&hl=id. 
  20. Pandoe, Marthias Dusky (2010) (dalam bahaso id). Jernih melihat cermat mencatat: antologi karya jurnalistik wartawan senior Kompas. Penerbit Buku Kompas. ISBN 978-979-709-487-4. https://books.google.co.id/books?id=ta05V3dVGlAC&pg=PA94&dq=%22trauma+*+PRRI%22&hl=en&sa=X&ved=2ahUKEwjlwf_ixL_rAhXCX30KHToKCFoQ6AEwAXoECAAQAg#v=onepage&q=%22trauma%20*%20PRRI%22&f=false. 
  21. Syamdani, (2009), PRRI, pemberontakan atau bukan, Media Pressindo, ISBN 978-979-788-032-3.
  22. Syamdani. (2009). PRRI, pemberontakan atau bukan? (edisi ke-Cet. 1). Yogyakarta: Media Pressindo. ISBN 9789797880323. OCLC 311495382. https://www.worldcat.org/oclc/311495382. 
  23. Abdulsalam, Husein. "Revolusi dan Perubahan Tipe Nama Orang Minangkabau". tirto.id (dalam bahasa Indonesia). Diakses tanggal 2020-08-29. 
  24. BBC (2019-11-29). "Nasi Padang: Sejarah, kalori, dan semua hal yang perlu Anda ketahui". Tempo. Diakses tanggal 2020-08-29. 
  25. "Investigasi PRRI LBH Padang: Basmi Etnis Minang, Perintah Soeharto". Harian Mimbar Minang. 2 Maret 2000. 
  26. Nuryanti, Reni; Akob, Bachtiar (2019-10-01) (dalam bahaso id). Perempuan Dalam Historiografi Indonesia (Eksistensi Dan Dominasi). Deepublish. ISBN 978-623-02-0688-7. https://books.google.co.nz/books?id=JqbTDwAAQBAJ&newbks=0&printsec=frontcover&pg=PT73&dq=%22Divisi+Diponegoro%22+PRRI&hl=id&redir_esc=y. 
  27. (dalam bahaso id) Gamma. Garda Media Mandiri. 1 Pebruari 2000. https://books.google.co.nz/books?id=2TXjAAAAMAAJ&newbks=0&printsec=frontcover&dq=%22Kodam+Diponegoro+mengirim+dua+resimen+tempur+ke+Sumbar+*+%22&q=%22Kodam+Diponegoro+mengirim+dua+resimen+tempur+ke+Sumbar+*+%22&hl=id&redir_esc=y. 
  28. "Staf Ahli Meneg HAM, Muradi Yuti: Tak Gampang Bawa Kasus PRRI ke Pengadilan HAM". Harian Mimbar Minang. 17 Maret 2000. 
  29. Yogaswara, A. (2012-07-31) (dalam bahaso id). Biografi Dari Pada Soeharto. MediaPressindo. https://books.google.co.nz/books?id=2dgLEAAAQBAJ&newbks=0&printsec=frontcover&pg=PA94&dq=%22SOEHARTO%22+PRRI&hl=id&redir_esc=y.