Muhammad Djamil Djambek

Wikipedia Minangkabau - Lubuak aka tapian ilimu
Infobox orangMuhammad Djamil Djambek
Biografi
Lahia1860 Edit nilai pada Wikidata
Bukittinggi Edit nilai pada Wikidata
Kamatian30 Desember 1947 Edit nilai pada Wikidata (86/87 tahun (id) terjemahkan)
Kalompok etnisUrang Minangkabau Edit nilai pada Wikidata
AgamoIslam Edit nilai pada Wikidata
Kagiatan
Bidang karajoIslamic sciences (en) Terjemahkan Edit nilai pada Wikidata
KarajoGuru jo Ulama Edit nilai pada Wikidata
Kaluarga
AnakZain Djambek (id) Terjemahkan
Dahlan Djambek
Saadoe'ddin Djambek
Abdul Bari Djambek (id) Terjemahkan
Zainal Abidin Djambek (id) Terjemahkan Edit nilai pada Wikidata
AbakSaleh Datuak Maleka (id) Terjemahkan Edit nilai pada Wikidata

Syekh Muhammad Djamil Djambek (lahia di Bukittinggi, Hindia-Balando, 1862 atau 1860 - maningga di Bukittinggi, 30 Desember 1947 pado umua 85 atau 87)[1] marupoan surang ulama pambaharu Islam dari Minangkabau pado awa abaik ka-20. Baliau lai tanamo pulo sabagai ahli ilimu falak.[2]

Riwayaik[suntiang | suntiang sumber]

Kaidupan paribadi[suntiang | suntiang sumber]

Syekh Muhammad Djamil Djambek, nan acok disabuik jo namo Syekh Muhammad Djambek, lahia dari kaluargo bangsawan. Apaknyo, Saleh Datuak Malaka, surang pangulu jo kapalo nagari Kurai, sadang amaknyo urang Sunda.

Baa maso keteknyo indak banyak dikataui, nan jaleh Syekh Muhammad Djambek baraja di Sikolah Randah nan kusuih untuak pasiapan masuak sikolah guru. Kudian, apaknyo mambao baliau ka Makkah pado umua 22 taun, untuak mancari ilimu labiah jauah lai.

Pandidiakan[suntiang | suntiang sumber]

Kutiko di Makkah, baliau sampek baguru kapado Syekh Ahmad Khatib Minangkabau. Salamo baraja di tanah suci, banyak ilimu agamo nan lah baliau dapekan. Nan dipalajari sacaro mandalam antaro lain ilimu tarikaik jo suluk di Jabal Abu Qubais. Syekh Muhammad Jambek sataruihnyo jadi ahli tarikaik, sampai mandapek ijazah dari Tarikaik Naqsyabandiyah-Khalidiyah. Walaupun baitu, dari banyak ilimu nan dikuasainyo, nan paliang mambuek baliau tamusaua adolah ilimu falak.

Kaahlian baliau di bidang ilmu falak mandapek pangakuan laweh di Makkah. Dek sabauk tu, samaso di tanah suci Syekh Muhammad Djambek lan mangaja ilimunyo tu kapado murik-murik nan datang dari Minangkabau nan baraja di Makkah, sarupo Ibrahim Musa Parabek (pandiri paguruan Tawalib Parabek) sarato Syekh Abbas Abdullah (pandiri paguruan Tawalib Padang Japang Lima Puluh Kota, nan kudian baganti namo jadi Darul Funun El Abbasyiah).

Karya[suntiang | suntiang sumber]

Taun 1903, Syekh Muhammad Djamil baliak ka tanah aia. Baliau mamilih mangamalkan ilimunyo sacaro lansuang di masarakaik; mangajakan mangaji jo katauhidan. Di antaro murik-muriknyo ado nan manjadi guru-guru tarikaik, inggo Syekh Muhammad Djamil lai dikana juo sabagai syekh tarikaik.

Satalah babarapo lamo, Syekh Muhammad Djambek bapikia untuak malakuan kagiatan lain. Baliau kudian mandirian duo buah surau, iyolah Surau Tangah Sawah jo Surau Kamang, nan kaduo-duonyo tanamo disabuik urang Surau Inyiak Djambek.

Syekh Muhammad Djambek disabuik Ensiklopedia Islam sabagai ulama nan patamo kali maajakan caro batablig di muko umum. Kabiasoan Barzanji (rawi) atau marhaban (puji-pujian) nan biaso dibaco di surau-surau saaik paringatan Maulid Nabi Muhammad SAW, digantinyo jo tablig nan mancaritoan riwayaik lahia Nabi Muhammad dalam bahaso Malayu.

Damikian pulo kabiasoan mambaco riwayaik Isra Mi'raj Nabi Muhammad dari kitab babahaso Arab, digantinyo jo tablig nan mancaritoan paristiwa tu dalam bahaso Malayu, sainggo lai dapek dimangarati dek urang ramai. Tradisi mambaco kitab digantinyo jo pambahasan masaalah kaidupan saari-ari, dek manuruiknyo agamo paralu dipahami jo siapo sajo. Baliau rajin manjalanan tablig jo ceramah dima sajo.

Sairiang jo pajalanan ukatu, sikap jo pandangan Syekh Muhammad Djambek barubah jadi indak lai tatariak jo tarikaik. Pado awa taun 1905, kutiko diadoan patamuan ulama untuak mambahas kaabsahan tarikaik nan balansuang di Bukit Surungan, Padang Panjang, baliau ado di pihak nan manantang tarikaik, "bahadapan" jo Syekh Bayang jo Haji Abbas nan mambela tarikaik.

Syekh Muhammad Djambek kudian manulih buku kritik taadok tarikaik, bajudua Penerangan Tentang Asal Usul Thariqatu al-Naksyabandiyyah dan Segala nan Berhubungan dengan Dia, nan duo jilik. Dijalehan dalam buku tu, baso tarikaik Naksyabandiyyah dibuek dek urang-urang Persia jo India, nan manuruik baliau banyak nan tapangaruah takhayul jo khurafat, nan jauah dari ajaran Islam.

Buku lain nan ditulihnyo bajudua Memahami Tasawuf dan Tarekat, nan marupoan upaya mambaharui pamikiran Islam. Akan tatapi, sacaro umum Syekh Muhammad Djamil indak basikap bamusuahan jo adat istiadat Minangkabau. Taun 1929, baliau mandirian organisasi Persatuan Kebangsaan Minangkabau, nan batujuan mamaliaro, maharagoi, jo mancintai adaik istiadaik satampek.

Syekh Muhammad Djamil turuik sato juo dalam kongres patamo Majelis Tinggi Karapatan Adat Alam Minangkabau taun 1939. Dalam pajalanan dakwahnyo pado maso panduduakan Japang, baliau mandirian Majelis Islam Tinggi (MIT) nan bapusek di Bukittinggi.

Rujuakan[suntiang | suntiang sumber]

  1. "Syeikh Jamil Jambek, Sang Penentang Hukum Adat" Archived 2017-10-05 di Wayback Machine. Hidayatullah.com, 14-12-2011. Diakses 11-01-2015.
  2. "Minang Saisuak #80 - Syekh Muhammad Djamil Djambek" Archived 2012-07-26 di Wayback Machine. Surya Suryadi - Singgalang, Minggu 11 Maret 2012. Diakses 11-01-2015.

Bahan bacoan[suntiang | suntiang sumber]

  • Harian Republika, "Syekh Muhammad Jambek" edisi 8 Agustus 2003.

Pautan lua[suntiang | suntiang sumber]