Tarikaik

Tarikaik (bahaso Arab: طرق‎ tariqah) aratinyo "jalan" atau "caro", adolah praktik kaagamoan manuruik tasawuf atau sufisme dalam agamo Islam. Sacaro konseptual, cito-cito tatinggi nan ingin dicapai dek para pangikuik tarikaik adolah mancapai ḥaqiqah, atau "kabanaran sajati". Surang pangikuik tarikaik (murid) mamulai palajarannyo jo mampalajari hukum-hukum Islam, iyolah praktik kaagamoan duniawi (eksoteris) dalam Islam. Salanjuiknyo inyo ka balanjuik pado praktik kaagamoan spiritual (esoteris) nan babantuak tarikaik. Malalui praktik spiritual jo dibimbiang dek guru tarikaiknyo (mursyid) itu lah, para pangikuik tarikaik ka baupayo untuak mancapai kabanaran sajati/kabanaran hakiki (haqiqah). Pamimpin tatinggi suatu tarikaik disabuik syekh atau khalifah. Urang nan manampuah jalan tarikaik (suluk) dalam baagamo disabuik saliak.

Ado banyak kalompok-kalompok sufi nan bakambang di babagai nagara. Sadonyo kalompok-kalompok sufi tu baasa dari surang syekh sufi nan manyandiri untuak mancapai katanangan jo katinggian spiritual, jauah dari urang rami. Silsilah ilimu para sufi tu umumnyo baasa dari Ali bin Abi Thalib, kacuali tarikaik Naqsyabandiyah nan maambiak dari Abu Bakar ash-Shiddiq, malalui anaknyo Muhammad bin Abu Bakar. Walaupun baitu, Muhammad bin Abu Bakar sajak umua tigo taun dipaliaro dek Ali bin Abi Thalib juo, jadi banyak nan manganggap Ali juo lah sumber ilimunyo. Babagai kalompok-kalompok sufi tu mulai membantuak kalompok nan taratua pado abaik ka-11.

Babarapo tarikaik nan tanamo antaro lain:

• Tarikaik Ba Alawiyah
• Tarikaik Khalwatiyah
• Tarikaik Naqsyabandiyah
• Tarikaik Qadiriyah
• Tarikaik Qadiriyah wa Naqsyabandiyah
• Tarikaik Rifaiyah
• Tarikaik Syadziliyah
• Tarikaik Syattariyah
• Tarikaik Tijaniyah

jll.

Di Sumatera Barat, umumnyo nan bakambang tarikaik Naqsyabandiyah jo Syattariyah.