Lompat ke isi

Djamaludin Malik

Wikipedia Minangkabau - Lubuak aka tapian ilimu
Djamaluddin Malik
Berkas:Djamaluddin Malik.JPG
Lahia13 Februari 1917
Bendera Balando Padang, Hindia-Belanda
Maningga8 Juni 1970 (umua 53)
Bendera Jerman Muenchen, Jerman Barat
KabangsaanBendera Indonesia Indonesia
KarojoPangusaha, politisi, sarato produser film Indonesia
PasanganElly Yunara
AnakZainal Malik
Camelia Malik
Yudha Asmara Malik
Lailasari Malik

Djamaludin Malik (lahia di Padang, Hindia-Belanda, 13 Februari 1917 – maningga di München, Jerman, 8 Juni 1970 pado umua 53 taun) adolah pangusaha, politisi, sarato produser film Indonesia, nan dikana sabagai Bapak Industri Film Indonesia sarato panggagas Festival Film Indonesia. Laia di Padang dari kaluarga nan masih mamiliki garih katurunan ka Rajo Pagaruyuang di Tanah Data. Baliau pado awalnyo hanyo bakarjo sabagai pagawai parusahaan palayaran Balando, Koninklijke Paketvaart Maatschappij. Pado taun 1940-an, baliau tajun sabagai pangusaha jo mandirian parusahaan Djamaludin Malik Concern. Baliau mulai talibat dalam industri pafilman katiko baliau mandirian kalompok sandiwara Bintang Timur jo parusahaan film Persari (Perseroan Artis Indonesia). Film partamo nan diproduksinyo bajudul Sedap Malam pado taun 1950.

Pado taun 1955, satahun sasudah mandirian Pasatuan Parusahaan Film Indonesia (PPFI) basamo jo Usmar Ismail, baliau mamalopori tasalanggaranyo Festival Film Indonesia I. Basamo jo Asrul Sani, baliau mandirian pulo Limbago Seniman Budayowan Muslimin untuak manantang Limbago Kabudayoan Rakyat (Lekra), nan disokong dek Partai Kominih Indonesia. Baliau aktif pulo bapolitik, iyolah sabagai anggota Dewan Pawakilan Rakyat jo Dewan Patimbangan Aguang. Baliau parnah manjabat Katua Dewan Film Nasional sarato Ketua III Panguruih Basa Nahdlatul Ulama. Namun aktivitasnyo di bidang politik baujuang pado tuduahan baliau basimpati ka pambarontakan PRRI di Sumatera, sahinggo maakibatkan baliau dipanjaroan pado taun 1958 lalu dibebasan indak lamo sasudah tuduhan nan ditujuan kapadonyo indak tabukti.

Djamaludin maningga pado taun 8 Juni 1970 akibaik panyakik komplikasi sasudah babarapo lamo dirawat di Muenchen, Jerman Barat. Jasadnyo kudian dibao ka Jakarta untuak dikubua-an di pakuburan Karet Bivak. Baliau dianugerahi gala Bintang Mahaputra Adipradana II pado taun 1973 sarato kudian dikukuahkan sabagai pahlawan nasional. Salain tu, namanyo-pun disandiangkan jo Usmar Ismail sabagai dwitunggal pafilman Indonesia.

Biografi

[suntiang | suntiang sumber]

Kahidupan awal

[suntiang | suntiang sumber]

Pado awalnyo, baliau hanyo bakarajo sabagai pagawai Koninklijke Paketvaart Maatschappij, sabuah parusahaan palayaran Balando di Indonesia. Karano kamampuannyo dalam manumpuak modal, pado taun 1940-an baliau tajun sabagai pangusaha sarato mandirian Djamaludin Malik Concern, parusahaan nan samulo cuma bagarak di bidang padagangan komoditi, kudian sairiang bajalannyo wakatu, taruih bakambang sarato marambah ka babagai sektor, tamasuak padagangan tekstil, kayu, palayaran, sarato kontraktor.

Pado maso revolusi kamardekaan Indonesia, baliau mambantuak kalompok sandiwara Bintang Timur, kudian mambali kalompok sandiwara Pancawarna dari Njoo Cheong Seng. Kalompok ko kudian digunoannyo untuak mahibur para pajuang nan sadang mahadapi Agresi Militer Balando nan dilakuan Balando di Indonesia. Dari Bintang Timur jo Pancawarna, Djamaludin kudian mandirian Persari (Perseroan Artis Indonesia).[catatan 1] Pado maso itu, Djamaludin Malik sabagai direktur utama alah mangandarai Chevrolet, sarato bamukim di kawasan Menteng. Sutradara jo artis-artis utamanyo baliau balian oto pulo, sarato dipinjaman pitih untuak mambali rumah di Kebayoran Baru.

Sajak ketek, baliau dikana sabagai surang nan darmawan. Namun walaupun suko manyanangan urang lain, kahidupan pribadinyo agak barantakan. Baliau babarapo kali kawin carai. Tarakhia baliau manikah jo Elly Yunara, surang katurunan Maroko. Dari padusi ikolah baliau dikaruniai ampek urang anak: Zainal Malik, Camelia Malik, Yudha Asmara Malik, jo Lailasari Malik. Putri kaduanyo Camelia Malik, kudian manaruih-an cito-citonyo untuak mangambangan industri pafilman Indonesia. Baliau mandirian PT Remaja Ellynda Film, nan alah mahasilkan film-film sarupo Malin Kundang jo Jembatan Merah.

Karier pafilman

[suntiang | suntiang sumber]

Djamaludin Malik marupoan tokoh nan banyak bajaso bagi pakambangan industri film Indonesia. Baliau partamo kali mamproduksi film pado taun 1950 bajudul Sedap Malam. Duo taun kudian, baliau malakuan produksi basamo jo parusahaan film dari Filipina untuak film bawarna: Rodrigo de Villa (1952). Sasudah tu duo film bawarna barikuiknyo baliau hasilkan baliak, iyolah Leilana (1953) jo Tabu (1953). Pado taun 1954, basamo jo Usmar Ismail baliau mandirian Pasatuan Parusahaan Film Indonesia (PPFI), sarato maajak organisasi tu untuak bagabuang jo Federasi Produser Film sa-Asia. Hal iko batujuan untuak maangkaek harkat jo martabat film Indonesia di tingkek internasional. Pado taun 1955, baliau mamalopori tasalanggaranyo Festival Film Indonesia I. Djamaluddin pulo nan mambiayai kasadonyo kaparaluan festival tu.

Pado maso Demokrasi Tapimpin, Djamaludin mambantuak sarikat seniman Muslim nan dinamoi Limbago Seniman Budayowan Muslimin Indonesia (Lesbumi). Dalam limbago tu bagabuang pulo Usmar Ismail sabagai katua umum jo Asrul Sani. Bagabuangnyo Usmar Ismail jo Asrul Sani ka dalam organisasi ko, mananggaan kasan mareka salamo ko sabagai anggota Partai Sosialis Indonesia (PSI); pado maso paralihan 1950-1960-an, sado urang-urang Minang intelek diasosiasikan sabagai anggota PSI nan manantang kadiktatoran Soekarno. Lesbumi batujuan untuak malawan Limbago Kabudayoan Rakyat (Lekra) nan disokong dek Partai Kominih Indonesia. Namun sajak taun 1963, Lekra labiah acok babentrokan jo aktivis Manifes Kabudayoan (Manikebu) nan dimotori dek Wiratmo Soekito, Goenawan Mohamad, sarato Taufiq Ismail.

Pado taun 1964, baliau mamproduksi film Tauhid. Film nan disutradarai dek Asrul Sani sarato dibintangi Aedy Moward jo Ismed M. Noor ko diproduksi ateh karajo samo antaro Departemen Agamo jo Departemen Panarangan Indonesia.[catatan 2] Lokasi pangambilan gambarnyo nan maambiak tampek di Mekkah, mambarian kapuasan tasandiri pado kru film tu, karano dapek sakalian manunaian ibadah haji.

Kahidupan akhia jo pangharagoan

[suntiang | suntiang sumber]

Hinggo taun 1966, Djamaludin alah mamproduksi sabanyak 59 judul film, nan tarakhia batajuak Menyusuri Jejak Berdarah, sarato mandapek pangharagoan untuak kategori tata sinematografi tabaiak dalam Pakan Apresiasi Film Nasional 1967. Pado taun 1969, baliau ditunjuak sabagai Katua Dewan Film Nasional. Posisi tu dipaciknyo sampai baliau maningga. Pado awal 1970, baliau mandarita panyakik komplikasi, lalu babarapo wakatu lamonyo baliau dirawat di Rumah Sakik Fatmawati, Jakarta, sabalun akhianyo baubek ka Muenchen, Jerman Barat. Di kota ko, pado tanggal 8 Juni 1970, Djamaludin maningga.

Filmografi

[suntiang | suntiang sumber]

Katarangan

[suntiang | suntiang sumber]
  1. ↑ Pado awal taun 1950-an cuma ado duo studio film nan dimiliki dek pribumi, yaitu Persari nan didirian dek Djamaludin Malik jo Perfini nan dipimpin dek Usmar Ismail. Kaduo parusahaan film tu dijalanan jo gaya nan balainan. Perfini basikap idealis jo anti kapado film-film murahan nan cuma maandalan lakuak tubuah jo tari-tarian. Namun meskipun mahasilkan film-film bamutu, padapatan Perfini agak mamprihatinkan. Sadangkan Persari dikalola jo caro moderen, mamiliki studio film nan badiri di atah lahan nan sangek laweh jo fasilitas cukuik langkok.
  2. ↑ Saifuddin Zuhri, Mantari Agama pada wakatu itu, mainginkan adonyo sinema nan banapaskan Islam.

Rujuak-an

[suntiang | suntiang sumber]
  • Al-Malaky, Ekky (2004). Why Not? Remaja Doyan Nonton. Mizan.
  • Bintang, Ilham (2007). Mengamati Daun-daun Kecil Kehidupan.
  • Lombard, Dennys (1996). Nusa Jawa Silang Budaya: Jaringan Asia.

Pautan lua

[suntiang | suntiang sumber]
Diambiak dari "https://min.wikipedia.org/w/index.php?title=Djamaludin_Malik&oldid=2463683"