Danau Ranau

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Danau Ranau
Danau Ranau - Danau Ranau di siang hari
Danau Ranau di siang hari
Lokasi Kabupaten Lampuang Baraik; Lampuang; Indonesia
Kabupaten Ogan Komering Ulu Salatan; Sumatera Salatan; Indonesia.
Koordinat 4°51′45″S 103°55′50″E / 4.86250°S 103.93056°E / -4.86250; 103.93056Koordinat: 4°51′45″S 103°55′50″E / 4.86250°S 103.93056°E / -4.86250; 103.93056
Jinih danau Danau vulkanik[1]
Aliran masuak utamo Sungai Warkuk
Aliran kalua utamo Sungai Komering
Talatak di nagara Indonesia
Laweh pamukoan 125.9 km²
Kadalaman rato-rato 174 m
Kadalaman maks. 229 m
Volume aia 21.95 km³
Panjang tapi danau1 52.68 km
Katinggian pamukoan 540 m
Pulau Sumatera
Pamukiman Desa Banding Agung
1 Panjang tapi danau indak baitu jaleh definisinyo.

Danau Ranau adolah sabuah danau nan lataknyo barado di duo buah provinsi yaitunyo Provinsi Sumatera Salatan jo Provinsi Lampuang. Danau ko labiah tapeknyo mambantang diparbatasan antaro kabupaten Lampuang Baraik, Provinsi Lampuang jo kabupaten Ogan Komering Ulu Salatan di provinsi Sumatera salatan. Danau ranau ko marupoan salah ciek tampek objek wisata nan barado di antaro duo buah provinsi tasabuik. Salain itu danau ko juo marupoan danau nan batipe danau vulkanik, aratinyo danau ko tabantuak dek latuihan gunuang nan sangaik gadang pado jama dahulu sahinggo mambantuak kawah gadang nan lamo-lamo taisi dek aia.[2]

Topografi[suntiang | suntiang sumber]

Danau ko barado di dataran tinggi pagunuangan bukik barisan pulau Sumatera. Jarak danau ko jo ibu kota kabupaten Lampuang sangaik jauah karano lokasi danau ko lataknyo di bagian baraik pulau sumatera. Untuak manuju ka Danau Ranau tasabuik dapek dimulai dari kota muara dua nan mano kota ko marupoan ibukota dari Kabupaten OKU Salatan. Pajalanan dapek di tampuah malalui jalan daraik sakitar 1,5 jam atau kalalu dari Kota Palembang dapek ditampuah sakitar 8 jam. Salain tu pajalanan manuju danau tasabuik dapek pulo dimulai malalui jalan daraik dari kota Liwa ibukotanyo Kabupaten Lampuang Baraik nan bajarak sakitar 1 jam pajalanan, atau dari kota Bandar Lampuang bajarak sakitar 6 jam. Untuak akses jalan manuju ka lokasi danau tasabuik cukuik rancak. Kalau dicaliak dari segi geografinyo, bantangan alam dari danau ranau ko iolah babukik bukik. Di sakaliliang danau tadapek bukik-bukik sarato jo sabuah gunuang nan banamo gunuang seminung. Karano di kaliliangi bukik-bukik jo gunuang sarato barado di dataran nan tinggi mambuek cuaca atau udaro di sakitaran danau ko manjadi sajuak.[3][4]

Deskripsi danau[suntiang | suntiang sumber]

Danau ranau ko marupoan danau nomor duo nan paliang gadang di pulau Sumatera sasudah Danau Toba di Sumatera Utara. Danau ko sangaiklah laweh. Laweh danau ko kiro-kiro 125,9 km pesegi. Danau ko mampunyoi kadalaman sakitar 200 an meter. Ditangah danau ranua ko tadapek pulo sabuah pulau ketek. Pulau ketek ko biasonyo manjadi tujuan wisata dek wisatawan nan bakunjuang ka danau tasabuik. Pulau tasabuik banamo pulau mariza. Salain itu tadapek babarapo tampek disakitaran danau ko nan manambah nilai di alam danau ko di antaronyo tadapek pamandian aia angek nan manganduang balerang sarato tadapek pulo aia tajun nan banamo aia tajun subik tuha. Indak jauah dari tapi-tapi danau tadapek pulo lahan sawah warga satampek jo tadapek pulo ladang-ladang kopi punyo warga satampek. Untuak kahidupan makhluk iduik nan barado di danau ko indak lah baiitu banyak, hanyo tadapek babarapo jinih ikan sajo. Danau ko marupoan danau batipe vulkanik sabab baitu sawakatu-wakatu tibo wakatunyo danau tasabuik mangaluaan balerang dari dalam danau nan dapek mambuek mati ikan jo tumbuahan lainnyo. Kajadian nan saroman tu parnah tajadi pado tahun 1962, 1993, 1998, jo 2011.[5][6][7]

Tampek wisata[suntiang | suntiang sumber]

Aia angek[suntiang | suntiang sumber]

Lokasi sumber aia angek nan bacampua balerang iko talatak di kaki Gunuang Seminung. Laweh lokasi aia angek ko kiro-kiro salaweh 80 m2. Kawasan aia angek ko indak jauh dari pinggia danau tasabuik namun jalannyo agak indak rancak. Disakitaran aia angek ko tadapek lahan-lahan punyo warga. Lahan-lahan ko di gunoan sabagai lahan pakabunan kopi jo karambia, sadangkan lokasi aia angek tasabuik dapek dipagunoan dek panduduak untuak mandi jo baranang sarato baguno pulo untuak manyambuahan panyakik kulik. Suhu aia angek tasabuik bakisar kiro-kiro antaro 60ºC di tampat sumber mato aianyo.[8]

Pulau mariza[suntiang | suntiang sumber]

Pulau mariza ko marupoan pulau nan barado di tangah Danau Ranua. Pulau iko dulunyo disabuik juo jo Pulau Tanjung Kejang karano awa mulonyo tabantuak tanjung nan panjang nan manyatu jo Gunuang Seminung. Akibaiknyo ado pangikihan dek ombak danau nan tajadi sapanjang musim, hinggo kini ko tingga bagian nan manyarupoi sabuah pulau nan ketek nan barado di tangah danau, nan kini dinamoan Pulau Mariza. Laweh pulau iko kurang labiah 1 hektar. Tumbuah-tumbuahan nan iduik di pulau ko adolah batang karambia atau nyiur bahaso satampeknyo. Kamudian, nan manambah kaindahan Pulau Mariza ko sahinggo banyak wisatawan nan bakunjuang ka tampek iko iolah untuak manikmati kaindahan alam pulau ko. Suhu udaro di Pulau Mariza dan sakitarnyo bakisar antaro 20,9 derajat celcius sahinggo udaranyo dapek dikatoan sajuak, segar jo nyaman. Jadi pulau iko sangaik cocok untuak manjadi tampek rekreasi atau basantai basamo keluarga sambia mamanciang ikan jo manikmati kaindahan alam Danau Ranau sarato jo Gunuang Seminung nan rancak diliek dari pulau iko. Untuak manuju ka pulau iko dapek ditampuah manggunoan kapa motor sakitar 15 minik.[6][9]

Aia tajun subik[suntiang | suntiang sumber]

Disakitaran Danau Ranau ko tadapek pulo sabuah aia tajun nan banamo aia tajun subik. Aia tajun iko barado kiro-kiro 300 meter dari pinggia Danau Ranau. Labiah tapek nyo aia tajun ko balokasi di Desa Subik. Aia tajun subik ko mampunyoi tinggi sakitar 15 meter. Aliran aia dari Aia tajun iko barasa dari batang aia way relay nan aianyo indak baitu dareh mangalia kearah jurang nan punyo kedalaman 15 meter ko sahinggo sacaro alami tabantuaklah aia tajun subik ko. Di bawah aia tajun iko tadapek batu-batuan nan acok digunoan dek para wisatawan untuak duduak-duduak sambia manikmati pamandangan batang-batang batuang nan mangalialiangi sakitaran aia tajun. Sapanjang jalan manuju aia tajun iko tadapek hamparan sawah salaweh kiro-kiro 40 hektar nan sumber aia sawah tasabuik barasa dari aia tajun subik. Karano hamparan sawah iko barado di lokasi aia ajun subik mako tampek iko manjadi dayo tarik tasandiri dek para wisatawan. Suhu udaro di sakitaran Aia Tajun Subik ko bakisar antaro 20,9 derajat celcius, sahinggo udaro disakitaranyo sangaik sajuk jo nyaman untuak dijadian tampek basantai sarato jo dapek manikmati pamandangan aia tajun. Lokasi aia tajun ko lah dikelola dek pamarintah satampek jo mambangun pondok-pondok tampek istirahat jo tampek panginapan bagi wisatawan.[10][11]

Gunuang Seminung[suntiang | suntiang sumber]

Objek wisata lainyo nan dapek di nikmati di Danau Ranau ko adolah Gunuang Seminung. Gunuang ko manjadi sumber aia angek nan ado disakitaran danau. Sumber angeknyo barasa dari siso-siso magma pambantuak batuan vulkanik Seminung. Bantuak karucuik Gunuang Seminung marupoan karucuik tamuda pabilo dibandiangan jo bantuak dari Gunuang Kukusan. Hal tasabuik dapek dicaliak badasarkan dari tingkek erosi nan labiah lamo sarato jo relief nan bagalombang dibandingan jo Gunuang Seminung. Erupsi Gunuang Seminung sarupo lava jo piroklastik manandoan bahwasanyo pambantuakan batuan tasabuik basipek eksplosif nan tajadi dek energi nan cukuik tinggi. Magma naiak ka ateh pamukoan diakibaikan dek gaya endogen dari dalam. Siso erupsi magma manjadi sumber panas nan muncua dari bawah permukaan atau dalam tanah.[12][11][13]

Rujuakan[suntiang | suntiang sumber]

  1. PROSPEK PANAS BUMI DI DAERAH DANAU RANAU, LAMPUNG DAN SUMATERA SELATAN http://psdg.bgl.esdm.go.id
  2. "Pesona Danau Ranau, Keindahan yang Membelah Lampung dan Sumsel". kumparan (dalam bahasa Indonesia). Diakses tanggal 2020-06-04. 
  3. "Letak Geografis". Diakses tanggal 04 Juni 2020. 
  4. "PESONA PEMANDANGAN ALAM DANAU RANAU – Balai BWS Sumatera VIII" (dalam bahasa Inggris). Diakses tanggal 2020-06-04. 
  5. Kustiani, Rini (2019-07-12). "Travelling ke Danau Ranau di OKUS, Mampirlah ke Pantai Bidadari". Tempo (dalam bahasa Inggris). Diakses tanggal 2020-06-04. 
  6. a b "Berkunjung ke Danau Ranau OKU Selatan? Jangan Lupa Mampir ke Sini". SUMEKS.CO (dalam bahasa Indonesia). 2020-01-06. Diakses tanggal 2020-06-04. 
  7. (Indonesia) "ESDM - Kementerian Energi dan Sumber Daya Mineral" (HTML). Diakses tanggal 2012-07-29. 
  8. ""Extrem"Jalan Menuju Pemandian Air Panas Danau Ranau Butuh Akses Jalan Yang Lebih Baik". OKU POS (dalam bahasa Indonesia). 2019-03-08. Diakses tanggal 2020-06-04. 
  9. "Pulau Marisa di Tengah Danau Ranau Sumsel". FaktualNews.co (dalam bahasa Indonesia). 2018-09-11. Diakses tanggal 2020-06-04. 
  10. "Foto: Air Terjun Subik Tuha di Sumsel yang Memesona". kumparan (dalam bahasa Indonesia). Diakses tanggal 2020-06-04. 
  11. a b Faradhipta, Adrian Chandra. "Ranau, Danau Rafting Kebanggaan Sumatera". detikTravel (dalam bahasa Indonesia). Diakses tanggal 2020-06-04. 
  12. elkana (2019-03-12). "Jelajah Wisata GUNUNG SEMINUNG Tepian Danau Ranau". SUMATERA POST (dalam bahasa Indonesia). Diakses tanggal 2020-06-04. 
  13. "Danau Ranau". Diakses tanggal 04 Juni 2020.