Budayo

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Lukisan musisi padusi Persia jo Istano Hasht-Behesht (Istano 8 sarugo).

Budayo atau kabudayoan barasal dari bahaso Sanskerta yaitu buddhayah, nan marupoan bantuak jamak dari buddhi (budia atau akal); diartian sabagai hal-hal nan bakaitan jo budi, jo akal manusia. Bantuak lain dari kato budayo adolah kultur nan barasal dari bahaso Inggris yaitu culture jo bahaso Latin cultura.

Arati Budayo[suntiang | suntiang sumber]

Budayo adolah suatu caro hiduik nan bakambang, nan dipunyoi basomo dek ciek kalompok urang, nan diwarihkan dari katurunan ka katurunan barikuik.[1]Budayo tabantuak dari banyak unsur nan rumik, tamasuak sistem agama jopolitik, adat istiadaik, bahaso, pakakeh, pakaian, bangunan, jo karya seni.[2]Bahaso, sabagaimano jo budayo, marupokan bagian nan ndak tapisahkan dari diri manusia sahinggo banyak urang candaruang menganggapnyo diwarihkan sacaro genetis. Katiko saurang barusaho bakomunikasi jo urang-urang nan babeda budayo, jo manyasuaian pabedaan-pabedaannyo, kajadian tu mambuktian bahwa budayo dipalajari.[3]

Budayo adolah suatu pola hiduik manyaluruih. Budayo basifaik kompleks, abstrak, dan lueh. Banyak aspek budayo turuik manantukan parilaku komunikatif. Unsur-unsur sosial-budayo ko tersebar, jo maliputi banyak kegiatan sosial manusia.[4]

Babarapo alasan baa urang mangalami kasulitan katiko bakomunikasi jo urang dari budayo lain dapek dicaliak dalam pangartian budayo: Budayo adolah suatu perangkat rumik nilai-nilai nan dipolarisasikan jo suatu citra nan manganduang pandangan ateh keistimewaannyo surang."Citra nan mamaso" itu ma ambiak bantuak-bantuak babeda dalam baragai budayo sorupo "individualisme kasar" di Amerika, "kaselarasan individu jo alam" di Jepang jo "kepatuhan kolektif" di Tiongkok.

Citra budayo nan basifaik mamaso tu mambakali anggota-anggotanyo jo pedoman manganai parilaku nan layak nan manatap an dunia makna jo nilai logis nan dapek dipinjam anggota-anggotanyo nan paling basahajo untuak mandapekan raso bermartabaik jo partalian dengan hiduiknyo.

Dek karano mode itu, budayolah nan manyadiokan suatu kerangka nan koheren untuak mengorganisasikan aktivitas saurang nan mamungkinkannyo meramalkan parilaku urang lain.

Arati Kabudayoan[suntiang | suntiang sumber]

Kabudayoan sangaik arek hubungannyo jo masyarakaik. Melville J. Herskovits jo Bronislaw Malinowski mangamukoan bahwa sagalo sasuatu nan tadapek dalam masyarakaik ditantuan dek kabudayoan nan dipunyoi dek masyarakaik tu surang. Istilah untuk pandapek tu adaloh Cultural-Determinism.

Herskovits mamandang kabudayoan sabagai sasuatu nan turun tamurun dari ciek generasi ka generasi nan lain, nan kamudian disabuik sabagai superorganic.

Manuruik Andreas Eppink, kabudayoan manganduang kasaluruhan pangartian nilai sosial, norma sosial, ilmu pangetahuan jo kasaluruhan struktur-struktur sosial, religius, jo lain-lain, tambahannyo sagalo parnyatoan intelektual, jo artistik nan manjadi ciri khas dari masyarakaik.


Manuruik Edward Burnett Tylor, kabudayoan marupokan kasaluruhan nan kompleks, nan di dalamnyo takanduang pangatahuan, kepercayaan, kesenian, moral, hukum, adat istiadaik, jo kamampuan-kamampuan lain nan didapek dek saurang sabagai anggota masyarakaik.

Manuruik Selo Soemardjan, jo Soelaiman Soemardi, kabudayoan adolah sarana hasil karya, rasa, dan cipta masyarakaik.


Manuruik M.Selamet Riyadi, Budayo adolah suatu bantuak raso cinto dari nenek moyang kito nan diwarihkan kapado saluruah katurunannyo.


Menurut Koentjaraningrat kebudayaan adalah keseluruhan sistem gagasan, dan tindakan hasil karya manusia dalam rangka kehidupan masyarakat yang dimiliki manusia dengan belajar

Dari babagai definisi tadi, dapek diperoleh pangartian bahwa kabudayoan adolah sasuatu nan akan mamangaruhi tingkaik pangatahuan, jo maliputi sistem ide atau gagasan nan tadapek dalam pikiran manusia, sahinggo dalam kahidupan sahari-hari, kabudayoan tu basifaik abstrak.


Sadangkan perwujudan kabudayoan adolah benda-benda nan diciptakan dek manusia sabagai makhluk nan babudayo, barupa perilaku, jo benda-benda nan basifaik nyato, misalnyo pola-pola perilaku, bahaso, paralatan hiduik, organisasi sosial, religi, seni, jo lain-lain, nan sadonyo ditujuan untuak mambantu manusia dalam malangsuangkan kahidupan bermasyarakaik.


Unsur-Unsur[suntiang | suntiang sumber]

Ado babarapo pandapek ahli nan mangamukokan manganai komponen atau unsur kabudayoan, antaro lain sabagai barikuik:

  1. Melville J. Herskovits manyabuikan kabudayoan mamiliki 4 unsur pokok, yaitu:
    • alat-alat teknologi
    • sistem ekonomi
    • keluarga
    • kakuasaan politik
  2. Bronislaw Malinowski mangatokan 4 unsur pokok kabudayoan maliputi:
    • sistem norma sosial nan mamungkinkan karajo samo antaro para anggota masyarakaik untuak manyasuaikan diri jo alam sakaliliangnyo
    • organisasi ekonomi
    • alat-alat, jo lembaga-lembaga atau petugas-petugas untuak pandidikan (keluarga adolah lembaga pandidikan utamo)
    • organisasi kekuatan (politik)
  3. C. Kluckhohn mangamukokan ado 7 unsur kabudayoan sacaro universal (universal categories of culture) yaitu:
    • bahaso
    • sistem pangetahuan
    • sistem teknologi, jo paralatan
    • sistem kesenian
    • sistem mato pancarian hiduik
    • sistem religi
    • sistem kakarabatan, jo organisasi kamasyarakatan

Wujuik jo komponen[suntiang | suntiang sumber]

Wujuik[suntiang | suntiang sumber]

Manuruik J.J. Hoenigman, wujuik kabudayoan dibedakan manjadi tigo: gagasan, aktivitas, jo artefak.

  • Gagasan (Wujuik ideal)

    Wujuik ideal kabudayoan adolah kabudayoan nan babantuak kumpulan ide-ide, gagasan, nilai-nilai, norma-norma, paraturan, jo sabagainyo nan sifaiknyo abstrak yaitu indak dapek dirabo atau dipagang. Wujuik kabudayoan ko talatak dalam pamikiran warga masyarakaik. Jiko masyarakaik tasabuik manyataon gagasannyo tu dalam bantuak tulisan, mako lokasi dari kabudayoan ideal tu barado dalam karangan, jo buku-buku hasil karya para panuliah warga masyarakaik tasabuik.
  • Aktivitas (tindakan)

    Aktivitas adolah wujuik kabudayoan sabagai suatu tindakan bapola dari manusia dalam masyarakaik itu. Wujuik ko acok pulo disabuik jo sistem sosial. Sistem sosial ko tadiri dari aktivitas-aktivitas manusia nan saliang berinteraksi, mangadokan kontak, sarato bagaua jo manusia lainnyo manuruik pola-pola tatantu nan badasarkan adaik tata kalakuan. Sifaiknyo konkret, taradi dalam kahidupan sahari-hari, jo dapek diamati, jo didokumentasikan.
  • Artefak (karya)

    Artefak adolah wujuik kabudayoan fisik nan barupa hasil dari aktivitas, parbuatan, jo karya sado manusia dalam masyarakaik barupa benda-benda atau hal-hal nan dapek dirabo, diliek, jo didokumentasikan. Sifaiknyo paliang nyato di antaro katigo wujuik kabudayoan. Dalam kanyatoan kahidupan bamasyarakaik, antaro wujuik kabudayoan nan ciek indak bisa dipisahan dari wujuik kabudayoan nan lain. Sabagai contoh: wujuik kabudayoan ideal mangatur, jo mambari arah kapado tindakan (aktivitas) jo karya (artefak) manusia.

Sadangkan manuruik Koentjaraningrat, wujuik kabudayoan dibagi manjadi nilai budayo, sistem budayo, sistem sosial, jo kabudayoan fisik.

  • Nilai-nilai Budayo

    Istilah ko, marujuak kapado panyabutan unsur-unsur kabudayoan nan marupokan pusat dari sado unsur nan lain. Nilai-nilai kabudayoan yaitu gagasan-gagasan nan alah dipalajari dek warga samanjak ketek, sahinggo payah dirubah. Gagasan ikolah nan kamudian menghasilkan babagai benda nan dibuek dek manusia badasarkan nilai-nilai, pikiran, jo tingkah lakunyo.
  • Sistem Budayo

    Dalam wujudik ko, kabudayoan basifaik abstrak sahinggo hanyo dapek dikatahui jo dipahami. Kabudayoan dalam wujuik ko bapola jo badasarkan sistem-sistem tatantu.
  • Sistem Sosial

    Sistem sosial marupokan pola-pola tingkah laku manusia nan manggambarkan wujuik tingkah laku manusia nan dilakukan badasarkan sistem. Kabudayoan dalam wujuik basifaik konkret sahinggo dapek diabadikan.
  • Kabudayoan Fisik

    Kabudayoan fisik ko marupokan wujuik tagadang jo basifaik konkret. Misalnyo bangunan megah sarupo candi Borobudur, benda-benda bagerak sarupo kapa tangki, komputer, piriang, galeh, kancing baju, jo lain-lain

Komponen[suntiang | suntiang sumber]

Badasarkan wujuiknyo, kabudayoan mamiliki babarapo elemen atau komponen, manuruik ahli antropologi Cateora, yaitu:

  • Kabudayoan material

    Kabudayoan material mangacu pado kasaluruhan ciptaan masyarakaik nan nyato, konkret. Tamasuak dalam kabudayoan material ko adolah temuan-temuan nan dihasilkan dari suatu panggalian arkeologi: mangkuak tanah liek, perhiasan, senjata, jo sataruihnyo. Kabudayoan material juo mancakuik barang-barang, sarupo televisi, pasawat tabang, stadion olahraga, pakaian, gedung pencakar langit, jo mesin cuci.
  • Kabudayoan nonmaterial

    Kabudayoan nonmaterial adolah ciptaan-ciptaan abstrak nan diwarihkan dari generasi ka generasi, misalnyo sarupo dongeng, carito rakyat, jo lagu atau tarian tradisional.
  • Lembaga sosial

    Lembaga sosial jo pandidikan mambarikan peran banyak dalam konteks bahubungan jo bakomunikasi di alam masyarakaik. Sistem sosial nan tabantuak dalam suatu negara akan manjadi dasar jo konsep nan balaku pado tatanan sosial masyarakaik. Contoh di Indonesia pado kota, jo desa di beberapa wilayah, padusi indak paralu sakolah nan tinggi apolai bakarajo pado suatu instansi atau parusahaan. Tapi di kota – kota gadang hal tasabuik tabaliak, wajar jiko saurang padusi mamiliki karier.
  • Sistem kaparcayoan

    Caro masyarakaik mangambangkan, jo mambangun sistem kaparcayoan atau kayakinan tahadap sasuatu nan mampangaruhi sistem panilaian nan ado dalam masyarakaik. Sistem kaparcayoan ko akan mampangaruhi kabiasoan, pandangan hiduik, caro makan, sampai jo caro bakomunikasi.
  • Estetika

    Bahubungan jo seni jo kesenian, musik, carito, dongeng, hikayaik, drama, jo tari–tarian, nan balaku, jo bakambang dalam masyarakaik. Sarupo di Indonesia satiok masyarakaik mamiliki nilai estetika surang. Nilai estetika ko paralu dipahami dalam sagala peran agar pasan nan akan disampaikan dapek mancapai tujuan jo efektif. Misalnyo di beberapa wilayah, jo basifaik kedaerahan, satiok akan mambangun bangunan jenis apo sajo harus malatakkan janur kuniang, jo buah-buahan sabagai simbol, dimano simbol tasabuik mamiliki arti babeda di satiok daerah. Tatapi di kota gadang sarupo Jakarta jarang mungkin taliek masyarakaiknyo manggunokan caro itu.
  • Bahaso

    Bahaso marupokan alat pangantar dalam bakomunikasi, bahaso untuak satiok wilayah, bagian, jo negara mampunyoi pabedaan nan sangaik kompleks. Dalam ilmu komunikasi bahaso marupakan komponen komunikasi nan sulik dipahami. Bahaso mamiliki sifaik unik jo kompleks nan hanyo dapek dimangarati dek pangguno bahaso tasabuik. Jadi keunikan, jo kakompleksan bahaso ko harus dipalajari, jo dipahami supayo komunikasi labiah elok sarato efektif dengan memperoleh nilai empati jo simpati dari urang lain.

Hubungan Antaro Unsur-Unsur Kabudayoan[suntiang | suntiang sumber]

Komponen-komponen atau unsur-unsur utamo dari kabudayoan antaro lain:

Paralatan jo parlengkapan hiduik (teknologi)[suntiang | suntiang sumber]

Teknologi marupokan salah satu komponen kabudayoan.

Teknologi manyangkuik caro-caro atau teknik mamproduksi, mamakai, sarato mamaliharo sagalo paralatan, jo parlengkapan. Teknologi muncul dalam caro-caro manusia mengorganisasikan masyarakaik, dalam caro-caro mengekspresikan raso kaindahan, atau dalam mamproduksi hasil-hasil kesenian.


Masyarakaik ketek nan bapindah-pindah atau masyarakaik pedesaan nan hiduik dari partanian paliang saketek mengenal Salapan macam teknologi tradisional (disabuik juo sistem paralatan nan unsur kabudayoan fisik), yaitu:

  • alat-alat produksi
  • sanjato
  • wadah
  • alat-alat manyalakan api
  • makanan
  • pakaian
  • tampek balinduang jo parumahan
  • alat-alat transportasi

Sistem mato pancaharian[suntiang | suntiang sumber]

Parhatian para ilmuwan pado sistem mato pancaharian iko tafokus pado masalah-masalah mato pancaharian tradisional sajo, di antaranyo:

  • Baburu jo maramu
  • Bataranak
  • Bacocok tanam di ladang
  • Manangkok ikan

Sistem kakarabatan jo organisasi sosial[suntiang | suntiang sumber]

Sistem kakarabatan marupokan bagian nan sangaik paralu dalam struktur sosial. Meyer Fortes mangamukakan bahwa sistem kakarabatan suatu masyarakaik dapek digunokan untuak manggambarkan struktur sosial dari masyarakaik nan basangkutan.

Kakarabatan adolah unit-unit sosial nan tadiri dari babarapo kaluarga nan mamiliki hubungan darah atau hubungan parkawinan. Anggota kakarabatan tadiri ateh ayah, ibu, anak, minantu, cucu, kakak, adik, Onga, Etek, kakek, nenek, jo sataruihnyo.

Dalam kajian sosiologi-antropologi, ado babarapo macam kalompok kakarabatan dari nan jumlahnyo relatif ketek hinggo gadang sarupo kaluarga ambilineal, klan, fatri, jo paroh masyarakaik. Di masyarakaik umum kito mangenal kalompok kakarabatan lain sarupo kaluarga inti, kaluarga luas, kaluarga bilateral, dan kaluarga unilateral.

Samantaro itu, organisasi sosial adolah pakumpulan sosial nan dibantuak dek masyarakaik, baik nan babadan hukum maupun nan indak babadan hukum, nan bafungsi sabagai sarana partisipasi masyarakaik dalam pambangunan bangsa, jo negara. Sabagai makhluk nan salalu hiduik basamo-samo, manusia mambantuak organisasi sosial untuak mancapai tujuan-tujuan tatantu nan indak dapek dicapai surang.

Bahaso[suntiang | suntiang sumber]

Bahaso adolah alat atau pawujudan budayo nan digunokan manusia untuak saliang bakomunikasi atau bahubungan, baik lewat tulisan, lisan, ataupun garakan (bahaso isyarat), jo tujuan manyampaikan makasuik hati atau kamauan kapada lawan mangecek atau urang lain. Malalui bahaso, manusia dapek manyasuaikan diri jo adaik istiadaik, tingkah laku, tata krama masyarakaik, jo sakaligus mudah mambaurkan dirinyo jo sagalo bantuak masyarakaik.

Bahaso mamiliki babarapo fungsi nan dapek dibagi manjadi fungsi umum, jo fungsi khusus. Fungsi bahaso sacara umum adolah sabagai alat untuak barekspresi, bakomunikasi, jo alat untuak mangadokan integrasi jo adaptasi sosial. Sadangkan fungsi bahaso sacara khusus adolah untuak mangadokan hubungan dalam pagaulan sahari-hari, mawujudkan seni (sastra), mampalajari naskah-naskah kuno, jo untuak mengeksploitasi ilmu pangetahuan jo teknologi.

Kasenian[suntiang | suntiang sumber]

Karya seni dari paradaban Mesir kuno.

Kasenian mangacu pado nilai kaindahan (estetika) nan barasal dari ekspresi hasrat manusia jo kaindahan nan dinikmati jo mato ataupun talingo. Sabagai makhluk nan mampunyoi cito raso tinggi, manusia manghasilkan babagai corak kasenian mulai dari nan sederhana sampai parwujudan kasenian nan kompleks.

Sistem Kaparcayoan[suntiang | suntiang sumber]

Ado kalanyo pangatahuan, pamahaman, jo dayo tahan fisik manusia dalam manguasai, jo mangungkap rahasio-rahasio alam sangaik tabateh. Sacara basamoan, muncul kayakinan akan adanyo panguaso tatinggi dari sistem jagat raya ko, nan juo mangandalikan manusia sabagai salah satu bagian jagat raya. Sahubungan jo itu, baik sacaro individual maupun hiduik bamasyarakaik, manusia indak dapek talapeh dari religi atau sistem kaparcayoan kapado panguaso alam samesta.

Agamo, jo sistem kaparcayoan lainnyo saringkali terintagrasi jo kabudayoan. Agamo (bahaso Inggris: Religion, nan barasa dari bahaso Latin religare, nan barati "manambatkan"), adolah sabuah unsur kabudayoan nan penting dalam sajarah umaik manusia. Dictionary of Philosophy and Religion (Kamus Filosofi, jo Agamo) mandefinisikan Agamo sabagai barikut:

... sabuah institusi jo kaanggotaan nan diakui jo biaso bakumpua basamo untuak baribadah, jo manarima sabuah paket doktrin nan manawarkan hal nan takaik jo sikap nan harus diambiak dek individu untuak mandapekkan kabahagiaan sajati.[5]

Agamo biasanyo mamiliki suatu prinsip, sarupo "10 Firman" dalam agamo Kristen atau "5 rukun Islam" dalam agamo Islam. Kadang-kadang agamo dilibatkan dalam sistem pamarintahan, sarupo misalnyo dalam sistem teokrasi. Agamo juo mampangaruhi kasenian.

Agamo Samawi[suntiang | suntiang sumber]

Tigo agamo gadang, Yahudi, Kristen, jo Islam, dikalompokkan sabagai agama Samawi[6] atau agamo Abrahamik.[7] Katigo agamo tasabuik mamiliki sajumlah tradisi nan samo namun ado parbedaan-parbedaan nan mandasar dalam inti ajarannyo. Katiganyo alah mambarikan pangaruh nan gadang dalam kabudayoan manusia di babagai balahan dunia.

Yahudi adolah salah satu agamo, nan jikok indak disabuik sabagai nan partamo, adolah agamo monotheistik jo salah satu agamo tatua nan masih ado sampai kini. Tadapek nilai-nilai, jo sajarah umaik Yahudi nan juo direferensikan dalam agamo Abrahamik lainnyo, sarupo Kristen jo Islam. Pado saat ko umaik Yahudi bajumlah labiah dari 13 juta jiwa.[8]

Kristen (Protestan jo Katolik) adolah agamo nan banyak mangubah wajah kabudayoan Eropa dalam 1.700 tahun tarakhir. Pamikiran para filsuf modern pun banyak tapangaruah oleh para filsuf Kristen samacam St. Thomas Aquinas jo Erasmus. Saat ko dipakirokan tadapek antaro 1,5 s.d. 2,1 miliar pamaluak agamo Kristen di saluruah dunia.[9]

Islam mamiliki nilai-nilai, norma agamo nan banyak mamangaruhi kabudayoan Timur Tengah, Afrika Utara jo sabagian wilayah Asia Tenggara. Saat ko tadapek labiah dari 1,6 miliar pamaluak agamo Islam di dunia.

Agamo jo filsafat dari Timur[suntiang | suntiang sumber]

Agni, dewa api agamo Hindu

Agamo jo filosofi saliang takaik pado kabudayoan Asia. Agamo jo filosofi di Asia kabanyakan barasal dari India, China, jo manyebar di sapanjang benua Asia malalui difusi kabudayoan jo migrasi.

Hinduisme adolah sumber dari Buddhisme, cabang Mahāyāna nan manyebar di sapanjang utara jo timur India sampai Tibet, China, Mongolia, Jepang, Korea jo China selatan sampai Vietnam. Theravāda Buddhisme manyebar di sakitar Asia Tenggara, tamasuak Sri Lanka, bagian barat laut China, Kamboja, Laos, Myanmar jo Thailand.

Agamo Hindu dari India, mangajarkan pentingnyo elemen nonmateri samantaro sabuah pamikiran India lainnyo, Carvaka, manekankan untuak mancari kanikmatan di dunia.

Konghucu jo Taoisme, marupokan duo filosofi nan barasal dari Tiongkok nan mamngaruhi babagai aspek. Baik dari religi, seni, politik, jo tradisi filosofi di saluruah Asia.

Pado abad ke-20, di kaduo negara bapanduduak paliang padek se-Asia, duo aliran filosofi politik tebantuak. Mahatma Gandhi mambarikan pangartian baru tantang Ahimsa, inti dari kaparcayoan Hindu maupun Jaina, jo mambarikan arti baru manganai konsep antikekerasan, jo antiperang. Pado periode nan sama, filosofi komunisme Mao Zedong manjadi sistem kaparcayoan sekuler nan sangaik kuek di China.

Agamo tradisional[suntiang | suntiang sumber]

Agamo tradisional, atau kadang-kadang disabuik sabagai "agamo nenek moyang", dianut dek sabagian suku padalaman di Asia, Afrika, jo Amerika. Pangaruahnyo cukuik gadang; mungkin bisa dianggap alah manyerap kadalam kabudayoan atau alah manjadi agamo negara, sarupo misalnyo agamo Shinto.

Sarupo kabanyakan agamo lainnyo, agamo tradisional manjawab kabutuhan rohani manusia akan katantraman hati katiko bamasalah, tatimpo musibah, jo manyadiokan ritual nan ditujukan untuak kabahagiaan manusia tu surang.

"American Dream"[suntiang | suntiang sumber]

American Dream, atau "mimpi urang Amerika" dalam bahaso Indonesia, adolah sabuah kaparcayoan, nan dipacayoi dek banyak urang di Amerika Serikat. Inyo pacayo, malalui karajo kareh, pangorbanan, jo kabulatan tekad, indak mampadulikan status sosial, ssaurang dapek mandapekan kahidupan nan labiah elok.[10]

Gagasan iko baraka dari sabuah kayakinan bahwa Amerika Serikat adolah sabuah "kota di atas bukit" (atau city upon a hill"), "cahayo untuak negara-negara" ("a light unto the nations"),[11] nan mamiliki nilai, jo kakayoan nan alah ado samanjak kadatangan para panjelajah Eropa sampai generasi barikutnyo.

Parnikahan[suntiang | suntiang sumber]

Agamo mampangaruhi parnikahan, jo parilaku seksual. Kabanyakan gereja Kristen mambarikan pamberkatan kapado pasangan nan menikah; gereja biasanyo mamasukkan acara pangucapan janji parnikahan di muko tamu, sabagai bukti bahwa komunitas tu manarimo parnikahannyo. Umaik Kristen juo mancaliak hubungan antaro Yesus Krists jo gerejanyo.

Gareja Katolik Roma mamparcayoi bahwa sabuah parcaraian adolah pabuatan tacela nan disababkan dek sikap egoistis dari diri surang-surang. Alasan parcaraian umumnyo baragam mulai dari parsalingkuhan, ka indak sasuian sifaik, parlakuan kasa pasangan, fundamental paham nan sudah indak sajalan nan dalam pandangan Gareja Katolik Roma sabuah alasan nan mangado-ado. Gareja Katolik Roma badasarkan ajaran Yesus Kristus baranggapan bahwa saurang nan tarikek dalam intitusi parnikahan malakuan pacaraian adolah bagian dari bantuak dari pajinahan kapado Tuhan, jo umaik. Badasarkan pamikiran ko, mako saurang nan alah bacarai indak dapek dinikahkan baliak di gareja kacuali bacarai karano salah satu pasangannyo alah maningga. Samantaro Agamo Islam mamandang parnikahan sabagai suatu kawajiban. Islam manganjurkan untuak indak malakukan pacaraian, namun mambuliahkan.

Sistem ilmu jo pangetahuan[suntiang | suntiang sumber]

Sacaro sadarhana, pangetahuan adolah sagalo sasuatu nan dikatahui manusia tentang benda, sifaik, kaadaan, jo harapan-harapan. Pangatahuan dipunyoi dek sadonyo suku bangsa di dunia. Inyo mamparoleh pangatahuan malalui pangalaman, intuisi, wahyu, jo bapikia manurut logika, atau pacuboan-pacuboan nan basifaik empiris (trial and error).

Sistem pangatahuan tu dikalompokkan manjadi:

  • pangatahuan tantang alam
  • pangatahuan tantang tumbuh-tumbuhan jo hewan di sakitarnyo
  • pangatahuan tantang tubuah manusia, pangatahuan tantang sifaik, jo tingkah laku sasama manusia
  • pangatahuan tantang ruang jo waktu

Parubahan sosial budayo[suntiang | suntiang sumber]

Parubahan sosial budayo dapek tajadi jikok sabuah kobudayaan malakukan kontak jo kabudayoan asiang.

Parubahan sosial budayo adolah sabuah gejala barubahnyo struktur sosial, jo pola budayo dalam suatu masyarakaik.

Parubahan sosial budayo marupokan gejala umum nan tajadi sapanjang maso dalam satiap masyarakaik. Parubahan tu tajadi sasuai jo hakikaik jo sifaik dasar manusia nan salalu nio mangadokan parubahan. Hirschman mangatokan bahwa kabosanan manusia sabananyo marupokan panyabab dari parubahan.

Ado tigo faktor nan dapek mamangaruhi parubahan sosial:

  1. takanan karajo dalam masyarakaik
  2. keefektifan komunikasi
  3. parubahan lingkungan alam.[12]

Parubahan budayo juo dapek ado akibaik adonyo parubahan lingkungan masyarakaik, panamuan baru, jo kontak dengan kabudayoan lain. Sabagai contoh, barakhirnyo zaman es barujuang pado ditamukannyo sistem partanian, jo kamudian mamanciang inovasi-inovasi baru lainnyo dalam kabudayoan

Penetrasi kabudayoan[suntiang | suntiang sumber]

Nan dimakasuik jo penetrasi kabudayoan adolah masuaknyo pangaruh suatu kabudayoan ka kabudayoan lainnyo. Penetrasi kabudayoan dapek tajadi dek duo caro:

Penetrasi damai (penetration pasifique)
Masuknyo sabuah kabudayoan jo jalan damai. Misalnyo, masuknyo pangaruh kabudayoan Kpop, Hollywood Movies, Bollywood Movies, jo lain-lain sabagainyo ka Indonesia[rujuakan?]. Panarimoan kabudayoan itu indak mangakibaikkan konflik, tapi mmpakayo khasanah budaya masyarakaik satampek. Pangaruh kaduo kabudayoan ko indak mangakibatkan hilangnyo unsur-unsur asli budayo masyarakaik.
Panyabaran kabudayoan sacaro damai akan manghasilkan Akulturasi, Asimilasi, atau Sintesis.

Akulturasi adolah basatunyo duo kabudayoan sahinggo mambantuak kabudayoan baru tanpa manghilangkan unsur kabudayoan asli. Contohnyo, bantuak bangunan Candi Borobudur nan marupokan papaduan antaro kabudayoan asli Indonesia, jo kabudayoan India. Asimilasi adolah bacampuanyo duo kabudayoan sahinggo mambantuak kabudayoan baru. Sadangkan Sintesis adolah bacampuanyo duo kabudayoan nan barakibaik pado tabantuknyo sabuah kabudayoan baru nan sangaik babeda jo kabudayoan asli.

Penetrasi kekerasan (penetration violante)
Masuknyo aebuah kabudayoan jo caro mamaso, jo marusak. Contohnyo, masuknyo kabudayoan Barat ka Indonesia pado zaman panjajahan disertai jo kekerasan sahingga manimbulkan guncangan-guncangan nan marusak kasaimbangan dalam masyarakaik[rujuakan?].

Wujuik budayo dunia barat antaro lain adolah budayo dari Belanda nan manjajah salama 350 tahun lamonyo. Budayo warisan Belanda masih malakek di Indonesia antaro lain pado sistem pamarintahan Indonesia.

Caro Pandang Tahadap Kabudayoan[suntiang | suntiang sumber]

Kabudayoan sabagai paradaban[suntiang | suntiang sumber]

Saat ko, kabanyakan urang mamahami gagasan "budayo" nan dikambangkan di Eropa pado abaik ka-18, jo awal abaik ka-19. Gagasan tantang "budayo" ko marefleksikan adanyo katidaksaimbangan antaro kakuatan Eropa, jo kakuatan daerah-daerah nan dijajahnyo.

Inyo manganggap 'kabudayoan' sabagai "paradaban" sabagai lawan kato dari "alam". Manuruik caro pikia ko, kabudayoan nan ciek jo kabudayoan lain dapek dipabandiangkan; diantaronyo kabudayoan pasti labiah tinggi dari kabudayoan lainnyo.

Artefak tantang "kabudayoan tingkek tinggi" (High Culture) dek Edgar Degas.

Pado praktiknyo, kato kabudayoan marujuak pado pakakeh-pakakeh, nan aktivitas nan "elit" sarupo misalnyo mamakai baju nan bakelas, fine art, atau mandangakan musik klasik, samantaro kato bakabudayoan digunokan untuak manggambarkan urang nan mangatahui, jo mangambiak bagian, dari aktivitas-aktivitas di ateh.

Sabagai contoh, jiko saurang bapandapek bahwa musik klasik adolah musik nan "bakelas", elit, jo bacito raso seni, samantaro musik tradisional dianggap sabagai musik nan kampungan, jo katinggalan zaman, mako timbua anggapan bahwa inyo adolah urang nan alah "bakabudayoan".

urang nan manggunokan kato "kabudayoan" jo caro ko indak pacayo ado kabudayoan lain nan eksis; inyo pacayo bahwa kabudayoan hanyo ado ciek, jo manjadi tolak ukua norma, jo nilai di saluruah dunia. Manuruik caro pandang ko, saurang nan mamiliki kabiasoan nan babeda jo inyo nan "bakabudayoan" disebuik sabagai urang nan "indak bakabudayoan"; indak sabagai urang "dari kabudayoan nan lain." Urang nan "indak bakabudayoan" dikatokan labiah "alam," jo para pangamaik acokkali mampartahankan elemen dari kabudayoan tingkek tinggi (high culture) untuak manakan pamikiran "manusia alami" (human nature)

Sajak abaik ka-18, babarapo kritik sosial alah manaarimo adonyo pabedaan antaro bakabudayoan, jo indak bakabudayoan, tatapi pabandingan tu -berkebudayaan, dan tidak berkebudayaan- dapat menekan interpretasi perbaikan, dan interpretasi pengalaman sebagai perkembangan yang marusak, jo "indak alami" nan mangabuakan, jo manyimpangkan sifaik dasar manusia.

Dalam hal ko, musik tradisional (nan diciptakan dek masyarakaik kelas pakarajo) dianggap mangekspresikan "jalan hiduik nan alami" (natural way of life), jo musik klasik sabagai suatu kamunduran, jo kamarosotan.

Saat ko kabanyakan ilmuwan sosial manolak untuak mambandiangkan antaro kabudayoan jo alam, jo konsep monadik nan alah balaku. Inyo manganggap bahwa kabudayoan nan sabalumnyo dianggap "indak elit" jo "kabudayoan elit" adolah samo masiang-masiang masyarakaik mamiliki kabudayoan nan indak dapek dibandiangkan.

Pangamat sosial mambedakan babarapo kabudayoan sabagai kultur populer (popular culture) atau pop kultur, nan bararti barang atau aktivitas nan diproduksi, jo dikonsumsi dek banyak urang.

Kabudayoan sabagai "suduik pandang umum"[suntiang | suntiang sumber]

Salama Era Romantis, para cendekiawan di Jerman, khususnyo inyo nan paduli tahadap garakan nasionalisme - sarupo misalnyo pajuangan nasionalis untuak manyatukan Jerman, jo pajuangan nasionalis dari etnis minoritas malawan Kekaisaran Austria-Hongaria - mangambangkan sabuah gagasan kabudayoan dalam "suduik pandang umum".

Pamikiran ko manganggap suatu budayo jo budayo lainnyo mamiliki pabedaan, jo kekhasan masiang-masiang. Karenanyo, budayo indak dapek dibandiangkan. walaupun baitu, gagasan ko masih mangakui adonyo pamisahan antaro "bakabudayoan" jo "indak bakabudayoan" atau kabudayoan "primitif."

Pado akhir abaik ka-19, para ahli antropologi alah mamakai kato kabudayoan jo definisi nan labiah lueh. Batolak dari teori evolusi, inyo mngasumsikan bahwa satiok manusia tumbuah, jo barevolusi basamo, jo dari evolusi ko tacipta kabudayoan.

Pado tahun 50-an, subkabudayoan - kalompok jo parilaku nan saketek babeda dari kabudayoan induknyo - mulai dijadikan subjek panalitian dek para ahli sosiologi. Pado abaik ko pulo, tajadi popularisasi ide kabudayoan parusahaan - pabedaan, jo bakat dalam konteks pakarajo organisasi atau tampek bakarajo.

Kabudayoan sabagai mekanisme stabilisasi[suntiang | suntiang sumber]

Teori-teori nan ado saat ko manganggap bahwa (suatu) kabudayoan adolah sabuah produk dari stabilisasi nan malakek dalam takanan evolusi manuju kabasamoan, jo kasadaran basamo dalam suatu masyarakaik, atau biaso disabuik jo tribalisme.

Kabudayoan di antaro masyarakaik[suntiang | suntiang sumber]

Sabuah kabudayoan gadang biasonyo mamiliki sub-kebudayaan (atau biaso disabuik sub-kultur), yaitu sabuah kabudayoan nan mamiliki saketek pabedaan dalam hal parilaku, jo kapacayoan dari kabudayoan induaknyo. Munculnyo sub-kultur dikaranokan dek babarapo hal, di antaranyo dek pabedaan umua, ras, etnisitas, kelas, aesthetik, agamo, karajo, pandangan politik jo gender,

Ado babarapo caro nan dilakuan masyarakaik katika bahadapan jo imigran, jo kabudayoan nan babeda jo kabudayoan asli. Caro nan dipiliah masyarakaik tagantuang pado sabarapo gadang pabedaan kabudayoan induak jo kabudayoan minoritas, sabarapo banyak imigran nan datang, watak dari panduduak asli, kaefektifan, jo kaintensifan komunikasi antar budayo, jo tipe pamarintahan nan bakuasa.

  • Monokulturalisme: Pamarintah mangusahokan tajadinyo asimilasi kabudayoan sahinggo masyarakaik nan babeda kabudayoan manjadi ciek, jo saliang bakarajo samo.
  • Leitkultur (kabudayoan inti): Sabuah bantuak nan dikambangkan dek Bassam Tibi di Jerman. Dalam Leitkultur, kalompok minoritas dapek manjago, jo mangambangkan kabudayoannyo surang, tanpa batantangan jo kabudayoan induak nan ado dalam masyarakaik asli.
  • Melting Pot: Kabudayoan imigran/asiang babau, jo bagabuang jo kabudayoan asli tanpa campua tangan pamarintah.
  • Multikulturalisme: Sabuah kabijakan nan mangharuskan imigran, jo kalompok minoritas untuak manjago kabudayoan inyo masiang-masiang, jo barinteraksi sacaro damai jo kabudayoan induak.

Kabudayoan manuruik wilayah[suntiang | suntiang sumber]

Sairiang jo kamajuan teknologi, jo informasi, hubungan, nan saliang bakaitan kabudayoan-kabudayoan di dunia saat ko sangaik tinggi. Salain kamajuan teknologi, jo informasi, hal tasabuik juo dipangaruhi dek faktor ekonomi, migrasi, jo agamo.

Afrika

Babarapo kabudayoan di benua Afrika tabantuak malalui panjajahan Eropa, sarupo kabudayoan Sub-Sahara. Samentaro itu, wilayah Afrika Utara labiah banyak tapangaruah dek kabudayoan Arab, jo Islam.

urang Hopi nan sadang mananun jo pakakeh tradisional di Amerika Serikat.
Amerika

Kabudayoan di benua Amerika dipangaruhi dek suku-suku Asli benua Amerika; urang-urang dari Afrika (terutamo di Amerika Serikat), jo para imigran Eropa tarutamo Spanyol, Inggris, Prancis, Portugis, Jerman, jo Belanda.

Asia

Asia mamiliki babagai kabudayoan nan babeda satu samo lain, maskipun baitu, babarapo dari kabudayoan ko mamiliki pangaruah nan manonjol tahadap kabudayoan lain, sarupo misalnyo pangaruah kabudayoan Tiongkok kapado kabudayoan Jepang, Korea, jo Vietnam.

Dalam bidang agamo, agamo Budha jo Taoisme banyak mamangaruhi kabudayoan di Asia Timur. Salain kaduo Agamo tu, norma jo nilai Agamo Islam juo ikuik mamangaruhi kabudayoan tarutamo di wilayah Asia Selatan jo Tenggara.

Australia

Kabanyakan budayo di Australia maso kini barakar dari kabudayoan Eropa jo Amerika. Kabudayoan Eropa, jo Amerika tasabuik kamudian dikambangkan, jo disasuaikan jo lingkungan benua Australia, sarato diintegrasikan jo kabudayoan panduduak asli benua Australia, Aborigin.

Eropa

Kabudayoan Eropa banyak tapangaruah dek kabudayoan negara-negara nan pernah dijajahnyo. Kabudayoan ko dikenal juo jo sabutan "kabudayoan barat". Kabudayoan ko alah diserap dek banyak kabudayoan, hal iko tabukti jo banyaknyo pangguno bahaso Inggris, jo bahaso Eropa lainnyo di saluruh dunia. Salain dipangaruhi dek kabudayoan negara nan pernah dijajah, kabudayoan ko juo dipangaruhi dek kabudayoan Yunani kuno, Romawi kuno, jo agamo Kristen, maskipun kaparcayoan akan agamo banyak mangalami kamunduran babarapo tahun ko.

Timur Tengah dan Afrika Utara

Kabudayoan didaerah Timur Tengah jo Afrika Utara saat ko kabanyakan sangaik dipangaruhi dek nilai, jo norma agamo Islam, maskipun indak hanyo agamo Islam nan bakambang di daerah ko.

Rujuakan[suntiang | suntiang sumber]

  1. Human Communication: Konteks-konteks Komunikasi
  2. Human Communication: Konteks-konteks Komunikasi
  3. Human Communication: Konteks-konteks Komunikasi
  4. Deddy Mulyana dan Jalaluddin Rakhmat. Komunikasi Antarbudaya:Panduan Berkomunikasi dengan Orang-Orang Berbeda Budaya. 2006. Bandung:Remaja Rosdakarya.hal.25
  5. Reese, W.L. 1980. Dictionary of Philosophy and Religion: Eastern and Western Thought, p. 488.
  6. Dari bahasa Arab, artinya: "agama langit"; karena dianggap diturunkan dari langit berupa wahyu.
  7. Karena dianggap muncul dari suatu tradisi bersama Semit kuno dan ditelusuri oleh para pemeluknya kepada tokoh Abraham/Ibrahim, yang juga disebutkan dalam kitab-kitab suci ketiga agama tersebut.
  8. Templat:Cite study, based on American Jewish Year Book. 106. American Jewish Committee. 18 Juni 2006. http://www.ajcarchives.org/main.php?GroupingId=10142. 
  9. Adherents.com – Number of Christians in the world
  10. Boritt, Gabor S. Lincoln and the Economics of the American Dream, p. 1.
  11. Ronald Reagan. "Final Radio Address to the Nation".
  12. O'Neil, D. 2006. "Processes of Change".

Caliak Pulo[suntiang | suntiang sumber]

  • Subkultur
  • Interseksi
  • Kabudayoan Indonesia
  • Antropologi
  • Sosiologi
  • Agamo
  • Sosialisasi

Pranala lua[suntiang | suntiang sumber]