Bajapuik

Sakileh: Adaik Alek Padang Pariaman

Adaik alek di Padang Pariaman tamasuak agak babedo jiko dibandiangan jo adaik alek Minangkabau lainnyo, karano pado adaik alek Pariaman ado tradisi bajapuik (manjapuik marapulai) nan maagiah syaraik pihak padusi manyadioan uang japuik. Adaik alek sarupo iko disabuik adaik nan diadaikkan, karano tradisi uang japuik adonyo cuman urang di daerah Padang Pariaman sajo. Adaik alek di Padang Pariaman tadiri dari babarapo rangkaian. ado aktivitas manjalang alek, aktivitas katiko alek sarato sasudah alek.

Aktivitas Sabalun Alek

Aktivitas nan dilakukan katiko sabalun alek di Padang Pariaman tadiri dari maratok tanggo, mamendekkan hetongan, batimbang tando (maminang) sarato manetapan uang japuik.

Aktivitas katiko alek

Aktivitas katiko alek ado bakampuang-kampuangan, alek randam, malam bainai, badantam, bainduak bako, manjapuik marapulai, akaid nikah, basandiang di rumah anak daro, sarato manjalang ka rumah mintuo.

Aktivitas sasudah alek

Aktivitas sasudah alek nan wajib dikarajoan adolah maanta limau, bafitrah, maanta pabukoan, sarato bulan lamang (Ramot Silalahi, 200:28-53)

Bajapuik

Bajapuik adolah tradisi alek nan manjadi ciri khas di daerah Pariaman. Bajapuik alah manjadi kawajiban pihak dunsanak padusi dimano sabalun akaik nikah pihak padusi musti maagiah sajumlah pitih atau pun barang kapado pihak laki-laki. Pitih uang japuik tu diagiahan katiko prosesi manjapuik marapulai. Tanang! Uang japuik itu dibaliakan liak dek dunsanak laki-laki katiko patamo kali manjalang mintuo. Uang japuik ko bisa disabuik tando saliang maharagoi masiang-masiang pihak (Azwar, 2001:52-53).Di daerah pariaman sabalah utara, uang japuik labiah dikana urang jo namo uang hilang, samantaro pariaman sabalah salatan sajo nan manyabuik uang japuik. Kaduonyo babedo. japuik adolah pitih nan diagiah dek pihak padusi ka pihak laki-laki sasudah tu dibaliakan liak ka padusi dalam bantuak barang nan lain, sarupo ameh, baju nan harago barang tu labiah gadang dari uang japuik. sadangkan uang hilang, pitih nan diagiah dek anak daro, indak bisa dibaliakan liak.

Panetapan Uang Japuik

Sabalun alek biasonyo Mamak batanyo ka calon anak daro apokah inyo sabana-bana siap untuak manikah karano biaya baralek sarato isinyo tamasuak uang japuik harus disiapan dek dunsanak padusi. Nan sadiah dari tradisi ko adolah jiko dunsanak padusi tamasuak kurang mampu atau bansaik, mangko dunsanaknyo manimbang-nimbang daulu untuak manjua harato bando pusako supayo ado pitih untuak mambiayai alek. Uang japuik ko ditatapan dek kaduo balah pihak sasudah batimbang tando, diagiahan katiko akaik nikah dek anak daro ka dunsanak laki-laki katiko acara manjapuik marapulai (Ramot Silalahi, 2000:83-84).

Ketek gadangnyo uang japuik tagantuang jo bara harago 30 ameh. Artinyo uang japuik tu harus samo nilainyo jo harago 30 ameh. Saameh samo gadang jo 2,5 gram ameh.  Samakin tingi nilai uang japuik nan diagiah mancaliakan bara tingginyo kaduduakan atau status sosial marapulai. Tapi, di zaman kini nilai uang japuik alah bisa diganti jo pitih rupiah, indak harus ameh. Bahkan bisa juo binatang taranak atau racak (kendaraan).

Jiko marapulai karajonyo manjadi tukang becak atau bisa disabuik urang biaso, inyo dijapuik jo pitih sagadang Rp.5.000.000, sadangkan jiko marapulai adolah urang sarjana, guru, dokter, atau punyo pangkek nan lain dari itu, marapulai dijapuik jo pitih sagadang Rp.35.000.000. Apo lai jiko marapulai dapek gala dari mamaknyo, misanyo sidi, bagindo, atau sutan.

Penyelenggaraan Uang Japuik di Parantauan  

Urang minang rato-rato pai marantau ka sado panjuru daerah di Indonesia. Kama sajo inyo marantau, tatap adaik tradisi indak buliah ditinggaan, tatap inyo baok ka daerah rantaunyo. Dalam alek Padang Pariaman di rantau, tradisi pambarian uang japuik ko masih dikarajoan. Tapi indak saketat di daerah asanyo. Uang japuik diagiahan jiko tajadi alek antaro duo urang parantau asa Padang Pariaman. Iko basipaik wajib untuak maharagoi Niniak Mamak. Jiko alek tajadi antaro laki-laki asa Padang Pariaman jo padusi nan bukan barasa dari Padang Pariaman, mangko pambarian uang japuik tagantuang asia rundiangan kaduo pihak dunsanak, apokah tatap uang japuik diadoan atau indak. ado pasangan nan keluarga lakinyo mamaso bana harus pakai uang japuik, tapi ado pulo nan indak. Jiko keluarga laki-laki masih basikareh juo, mangko alek bisa bata. Ado pulo nan manikah indak mamakai adaik alek Padang Pariaman. Itu sadonyo tagantuang rundiangan pasangan jo dunsanaknyo. Ado juo keluarga nan tatap manyuruah pakai adaik alek Minangkabau sarato jo uang japuiknyo, tapi pangarajoannyo dilunggakan saketek. Mukasuiknyo, uang japuik ko tatap diagiahan, tapi basipaik formalitas sajo, palapeh tanyo. Jiko ado niniak mamak nan batanyo bara uang japuik nan diagiah, mangko ado jaweknyo dek anak daro jo marapulai. Urang nan tibo ka alek ikuik maliek masonyo memang marapulai mandapek uang japuik, walaupun sabananyo indak ado.