Pangguno:Diazdiazdi/bak kasiak
.JPG) Teh talua | |
| Asa | |
|---|---|
| Daerah | Sumatra Barat |
| Pambuek | Urang Minang |
| Detail | |
| Jinih idangan | Minuman |
| Panyajian | Angek |
| Bahan utamo | Kuniang talua, aia teh, gulo |
| Bahan tambahan | Limau kapeh |
Teh talua adolah minuman nan tabuek dari kuning talua jo gulo nan alah dikacau kudian diagiah aia seduhan teh. Minuman iko marupoan minuman tradisional urang Minangkabau dan kini manjadi bagian menu restoran Padang. Dalam bahaso Indonesia, teh talua disabuik jo teh telur atau teh telor.
Teh talua tanamo di wilayah barat jo tangah pulau Sumatra, wilayah nan mayoritas dihuni dek urang Minangkabau. Wakatu ka diminum, inyo diagiah perasan limau kapeh (jeruk nipis) atau pamanih tambahan takah krimer kental manih jo bubuak coklat.
Asa jo parkambangan[suntiang | suntiang sumber]
.svg)
Teh talua adolah minuman tradisional dari urang Minangkabau di Sumatra, nan dalam parkambangannyo manjadi menu di kadai-kadai maupun restoran Padang. Manuruik urang Minang saisuak, indak sumbarang urang dapek maminum teh talua. Minuman iko hanyo dapek dinikmati dek urang kayo atau bangsawan.[1] Teh talua baru manjadi minuman untuak urang kabanyakan sasudah perkebunan teh dibukak di Sumatra Barat, saindaknyo pado sapartigo awal abaik ke-20.[1][2].
Kini, teh talua tanamo di daerah barat jo tangah pulau Sumatra tampek Minangkabau manjadi mayoritas, yaitunyo provinsi Sumatra Barat sarato sabagian Bengkulu, Jambi, Riau, jo Sumatra Utara. Urang-urang picayo teh talua elok untuak kesehatan, tarutamo untuak pria inyo dapek manambah stamina.[2][3][4] Teh talua mandapek tampek pulo dek urang di daerah Indonesia lainnyo, sairiang banyaknyo parantau Minang nan mambuek restoran Padang sahinggo mambuek idangan tradisional Minang tanamo. Di lua daerah asanyo, teh talua indak lai dikenal dalam bahaso Minangkabau, tetapi dalam bahaso Indonesia yaitu teh telur atau teh telor.[1][4]
Caro mambuek[suntiang | suntiang sumber]
.jpg)
Bahan utamo untuak mambuek teh talua adolah kuniang talua jo teh. Talua nan dipakai biasonyo talua ayam kampuang, tapi buliah juo jo talua itiak. Kuniang talua dimasuakan ka galeh kaco, kudian diagiah gulo, biasonyo duo sanduak teh. Sudah itu, kuniang talua jo gulo dikacau. Kok caro saisuak, paralatan untuak mangacaunyo iyolah lidi-lidi nan alah diikek, jumlahnyo 20-30 lidi. Sinduak atau pegas dapek pulo dipakai untuak mangacau. Tapi, kok nio mudah, alaik nan digunoan iyolah alaik mixer pambuek kue.[5]
Kuniang talua dikacau salamo babarapo minik hinggo rono kuniang talua manjadi agak putiah atau manjadi googol-mogul nan dikenal di Eropa Tengah jo Timur. Kudian, campuran nan tun diagiah aia teh nan manggalagak. Teh nan digunoan adolah teh itam pakek. Aia teh dimasukan indak sampai panuah ka dalam galeh supayo buih nan dihasilkan indak tumpah.[2][4]
Kutiko aia teh dituangan, naiaklah talua nan alah dikacau tadi. Campurannyo kok dicaliak mode tabagi dalam duo lenggek: aia nan rononyo coklat di lenggek bawah dan buih jo aia nan ronoyno agak putiah di lenggek ateh. Kadang-kadang, indak jaleh bana pabedaan rono di antaro lenggeknyo, tapi nan pasti aia di lenggek ateh punyo buih jo rono nan labiah tarang daripado aia di lenggek bawah.[1][4]
Wakatu ka diminum, teh talua biasonyo diagiah jo rupo-rupo tambahan. Nan paliang acok iyolah diagiah tambahan limau kapeh supayo baun anyia dari kuniang talua ilang. Dalam panyaijannyo, potongan limau kapeh dilatakan di tadah supayo urang nan maminum dapek manirihnyo sasuai salero. Ado pulo nan manambah tambahan pamanih, takah krimer kental manih jo bubuak coklat, maupun rempah-tempah takah pala, kayu manih, jo kapulaga.[1][4]
Konsumsi[suntiang | suntiang sumber]
Teh talua adolah minuman biasonyo dibuek di rumah-rumah, tetapi kini alah dijua lo di kadai jo restoran. Di Sumatra Barat, minuman iko mudah didapek di kadai jo restoran, bahkan ado kadai khusus nan manjua teh talua se.[1][2] Kok dek nan tuo-tuo, maota sambia mamasan teh talua bisa sampai batanggang; urang kadai amuah pulo mambukak kadainyo sampai parak siang.[5] Walau indak banyak, kadai nan manjua teh alua ado pulo di daerah lain di Indonesia, takah di Jakarta.[4]
Teh talua lamaknyo diminum katiko masih angek.[4][5] Samanjak akhia abaik 20, urang-urang acok maminum pakai sedotan. Tapi, balakangan media alah mulai acok maagih tau bahayo minum minuman angek jo sedotan plastik, dek bahan kimianyo bisa tacampua ka minuman. Kok acok bana, bahan kimia tadi dapek manyababkan obesitas, dalam babarapo kasus bahkan dapek manyababkan kanker.[6]
Di SUmatra Barat, kadai nan manjua manjua lo pisang goreng, nan manjadi kawan minum teh talua.[1]
Rujuakan[suntiang | suntiang sumber]
- ↑ a b c d e f g Yudha Manggala P. Putra. "Teh Talua, Teh Para Bangsawan Sumatera Barat" (dalam bahasa Indonesia). Meita Fajriana. Diakses tanggal 2018-11-28.
- ↑ a b c d Yudha Manggala P. Putra. "Teh Telur Minuman Khas Lelaki Minang" (dalam bahasa Indonesia). Republika. Diakses tanggal 2018-11-28.
- ↑ Jhonny Aispa. "Teh Talua! Minuman Penambah Stamina Pria" (dalam bahasa Indonesia). Diakses tanggal 2018-11-28.
- ↑ a b c d e f g Dhanang David Aritonang. "Wow, Segelas Stamina dari Teh Talua" (dalam bahasa Indonesia). Kompas. Diakses tanggal 2018-11-29.
- ↑ a b c "Teh Talua — Selain Martabak Kubang ini Teman Begadang Sampai Pagi di Bukittinggi" (dalam bahasa Indonesia). Tribun. Diakses tanggal 2018-11-29.
- ↑ Basoni, Sonia Permata. "Minum Pakai Sedotan Plastik Bisa Bahayakan Kesehatan, Ini Sebabnya". detikfood (dalam bahasa Indonesia). Diakses tanggal 2019-12-16.