Musajik Bingkudu

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Musajik Bingkudu
Musajik Jamiak Bingkudu
Masjid Bingkudu 2020 01.jpg

Musajik Bingkudu

Latak Jorong Bingkudu, Nagari Canduang Koto Laweh, Kecamatan Canduang, Kabupaten Agam, Sumatra Barat.
Afiliasi agamo Islam
Deskripsi arsitektur
Jinih arsitektur Musajik
Gaya arsitektur Minangkabau tradisional
Tahun salasai 1823
Spesifikasi
Minaro 1
Tinggi minaro 11 meter

Musajik Bingkudu (kadang diijo juo Masajik Bingkudu atau Musajik Jamiak Bingkudu) adolah salah satu musajik nan tatuo di Indonesia nan ditagakan dek kaum Pidari di tangah gajolak parang Pidari di Sumatra Barat pado taun 1823.[1] Musajik jo arsitekstur khas Minangkabau ko talatak di Jorong Bingkudu, Nagari Canduang Koto Laweh, Kecamatan Canduang, Kabupaten Agam, Sumatra Barat. Bangunan musajik ko tabuek dari bahan kayu, mulai dari lantai, tunggak, sampai dindiang musajik.[2]

Kini ko, salain digunoan sabagai tampek ibadah umaik Islam dan tampek baraja agamo dek murik-murik, digunoan pulo sabagai Kantua Pusek Tim Koordinasi Pemberantasan Kemiskinan Jorong Bingkudu. Bahkan jauah sabalunnyo, alah ditatapan dek Pamarintah Agam sabagai Cagar Budayo taun 1989. Inggo 1991 musajik ko alah mulai maalami pamugaran ka sadonyo.

Arsitektur[suntiang | suntiang sumber]

Salain kaasaliannyo nan masih tajago, arsitektur musajik ko murah sangaik untuak dikana. Utamonyo bagian atok nan tadiri dari tigo tingkek jo saketek cakuang. Katiko mulai ditagakan musajik ko mamakai sistem pasak, yaitu pola bangunan nan indak ado manggunoan paku di satiok sambuangan kayu.

Bangunan musajik talatak di lereang Gunuang Marapi pado katinggian 1.050 m di ateh pamukoan lauik, dibangun pado sabidang tanah salaweh 60 x 60 meter persagi, jo laweh bangunan 21 x 21 meter. Samantaro tinggi bangunan dari pamukoan tanah sampai ka puncak (atok) adolah kiro-kiro 19 meter. Musajik ko punyo konstruksi bangunan nan tabuek dari kayu jo tatanan atok ijuak nan batingkek tigo. Sarupo co Rumah Gadang, bangunan musajik punyo kandang atau kolong di bawah jo tinggi kiro-kiro 1,5 meter.

Ruang utamo[suntiang | suntiang sumber]

Ruang utamo musajik ko babantuak persegi jo ukuran 21 x 21 meter. Tunggak utamo talatak ditangah ruang utamo nan babantuak segi anam baleh jo diameter 75 cm. Samantaro tiang-tiang nan ado disakaliliang tunggak utamo babantuak segi duo baleh jo diameter 30 sampai 40 cm. Ado pulo limo tiang jo bagian mihrab musajik nan talatak di sabalah barat nan saketek manjorok ka lua.

Ruang utamo ko baieh jo lampu gantuang lamo jo banyak lampu dindiang nan tapasang pado tiang musajik. Lampu-lampu tasabuik bafungsi sabagai panarang jo aksesoris musajik. Salain tu, bagian muko ruangan utamo ado mimbar tuo nan taun dibueknyo marajuak tulisan angko 1316 Hijriah (sakitar taun 1906) jo bagian mahkota mimbar. Mimbar nan babantuak huruf "L " tasabuik tabuek dari kayu jo janjang naiak jo janjang turun nan sangajo dibuek tapisah. Janjang naiak dibuek maarah ka muko sadangkan janjang turun maarah ka sampiang. Pado bagian kida dan suok janjang tasabuik baukia jo motif sulua-sulua.

Pintu masuak ruang utamo talatak di sabalah timur. Di dalamnyo ado 53 buah tiang nan badiameter antaro 30–40 cm salain tu bantuaknyo segi duo baleh jo anam baleh juo ado ciek tiang sabagai tunggak macu nan ado ditangah-tangah nan ba bantuak segi anambaleh badiameter 75 cm. Hiasan ukirannyo ado pado tiang bagian ateh jo balok pangabek antaro ciek tiang jo tiang lainnyo nan manjadi kakhasan Musajik Bingkudu.

Minaro[suntiang | suntiang sumber]

Minaro Musajik Bingkudu

Musajik Bingkudu dilangkoki jo sabuah minaro nan dibangun kiro-kiro taun 1957. Minaro jo tinggi 11 meter nan talatak di muko musajik nan dirancang takah kubah jo bantuak lingkaran segi salapan. Di dalam minaro ado 21 anak janjang nan babelok ka arah kida. Minaro tasabuik marupokan pangganti minaro lamo nan talatak tapisah dari bangunan utamo di sabalah utara. Sabalun kajadian tasemba patuih, minaro lamo punyo 100 anak janjang. Sasudah tu dipotong jo diganti fungsinyo sabagai rumah garin jo tampek musyawarah tokoh masyarakaik sakitar.

Pamugaran[suntiang | suntiang sumber]

Sabalunnyo atok ijuak pado musajik taleso diganti jo seng pado taun 1957. Namun, masyarakaik takana jo kondisi atok ijuak nan alah lapuak dek umua. Kudian 2 taun siap tu musajik ditatapkan sabagai cagar budayo nan disarahan ka pamarintah Kabupaten Agam pado taun 1989. Musajik iko maalami pamugaran kasadonyo nan mambuek atok musajik diganti manjadi seng jo bagian-bagian nan lapuak diganti lalu diagiah cat takah nan sabananyo.

Pamungaran musajik ko tajadi taun 1989 nan dikarajoan dek Proyek Pelestarian dan Pemanfaatan Sejarah dan Purbakala Sumatera Barat jo jinih karajo pambongkaran sarato pamasangan baliak atok, plafon, jandela, sarato minaro. Kudiian dilanjuikan jo mamugaran ciek makam, tampek wudu, mimbar, mihrab, tabek, pamasangan panangka patuih pado minaro, panataan lingkuangan, pangacatan baliak, jo pambuatan pintu garabang.

Tabuah[suntiang | suntiang sumber]

Suduik musajik

Sabalun pangareh suaro ado, musajik-musajik di Indonesia umumnyo manggunoan tabuah sabagai panando masuaknyo wakatu sumbayang. Tabuah ditokok katiko wakatu untuak sumbayang tibo, siap tu disambuang jo kumandang azan. Takah musajik tuo lainnyo di Indonesia, musajik ko juo mampunyoi tabuahtabuah jo diameter 60 cm jo panjang mancapai 3,1 meter. Tabuah ko tabuek dari batang karambia jo panutuik dari kulik jawi. Sabagai salah satu cagar budayo Islam Indonesia, adonyo tabuah di musajik masih tatap dipatahankan,

Sarana jo fasilitas[suntiang | suntiang sumber]

Tampek bawudu musajik ko babantuak persagi panjang nan dibuek tapisah dari bangunan utamo di sabalah selatan. Di sekitar itu, ado tigo buah tabek ikan. Indak jauah dari tabek tu, ado pulo makam Syeikh Ahmad Taher, ulama nan disabuik sabagai panagak Sikolah Pandidikan Islam Madrasah Ulumi Syariah nan maningga pado tanggal 13 Juli 1962.

Salain tampek bawudu jo tabek ikan, musajik ko dilangkoki pulo jo fasilitas pandukuang lain takah tampek parkir. Salain tu, ado sajumlah saruang jo talakuang nan alah disiapan di dalam musajik untuak jamaah padusi nan nio sumbayang tapi indak mambaok palengkapan.

Galeri[suntiang | suntiang sumber]

Pautan lua[suntiang | suntiang sumber]

Rujuakan[suntiang | suntiang sumber]

  1. Gayo, Iwan (1985). Buku Pintar Seri Senior: Masjid Bersejarah di Indonesia. Grasindo. ISBN 979-025-294-3. 
  2. Mengenang Masjid Bingkudu. Padang Ekspres. Diakses pada 26 Maret 2012.

Caliak Pulo[suntiang | suntiang sumber]