Mansoer Daoed Dt. Palimo Kayo

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Mansoer Daoed Dt. Palimo Kayo
Lahia 10 Maret 1905
Bendera Balando Pahambatan, Balingka, Agam, Hindia Balando
Wafaik 17 Oktober 1985 (umua 80)
Bendera Indonesia Padang, Sumatera Barat
Kabangsaan Bendera Indonesia Indonesia
Karajo Ulama
Dikana dek Pajuang kamardekaan Indonesia, Duta Basa
Agamo Islam
Urang tuo Daud Rasyidi

H., Mansoer Daoed Dt. Palimo Kayo (lahia di Pahambatan, Balingka, Agam, 10 Maret 1905 – maningga di Padang, 17 November 1985 pado umua 80 taun) adolah surang pajuang, politisi sarato ulama takamuko Indonesia nan barasa dari Sumatera Barat. Baliau pernah pulo dipacayo manjadi Duta Basa Lua Biaso sarato Bakuaso Panuah Republik Indonesia untuak nagaro Irak.

Baliau manampuah pandidikan agamonyo di Sumatera Thawalib, Pa­dangpanjang pado zaman panjajahan Balando.

Kaiduikan awal[suntiang | suntiang sumber]

Mansoer Daoed partamo kali manampuah pandidikan di Sikolah Desa (Vervolg school) di kampuangnyo, kamudian manyambuang ka sikolah Governemen di Lubuk Sikaping, Pasaman. Satalah tamaik di sinan, pindah ka Padang Panjang mandaftar ka Sumatera Thawalib nan dipimpin dek Dr. Abdul Karim Amrullah, ayahnyo Hamka. Salain baraja di Sumatera Thawalib, inyo baraja juo pado Perguruan Islam Diniyyah (Diniyyah School) nan dipimpin dek Zainuddin Labay El Yunusy, salah saurang ulama nan tamashua.

Marantau[suntiang | suntiang sumber]

Pado taun 1923 dalam umua 18 taun, Mansoer pai haji dan handak tingga salamo babarapo taun untuak mandalami agamo Islam di Masjidil Haram, di bawah asuahan Syekh Abdul Kadir Al-Mandaily. Namun, pado taun partamo di Makah, inyo tapaso baliak pulang ka tanah aia karano tajadi paparangan antaro Karajaan Hijaz jo Najdi nan akhianyo malahiakan Karajaan Arab Saudi.

Satalah baliak dari Makah taun 1924 Mansoer malanjuikan pandidikan di Parabek Bukittinggi, di bawah asuahan Syekh Ibrahim Musa, saurang ulama tamashua. Samaso baraja di Parabek ikolah, Partai Komunis Indonesia (PKI) Sumatera Barat sadang bakambang pesat, bahkan alah masuak ka Sumatera Thawalib. Karano indak nio tagaduah dek garakan komunis, Mansoer barangkek maninggaan tanah aia manuju India. Pado awalnyo baraja pado Paguruan Islam Tinggi (Lucknow) di bawah asuahan Maulana Abdul Kalam Azad. Inyo pernah juo manuntuik ilmu pado Islamic College di bawah pimpinan Maulana Syaukat Ali basamo rakannyo, Maulana Muhamma Ali, pamimpin basa Partai Khilafat. Kaduo tokoh iko tamashua di India jo julukan Two Brothers.

Politik[suntiang | suntiang sumber]

Garakan partai Islam Khilafat bacito-cito managakan khalifah jo Mansoer Daoed maikuiki pakembangan garakan itu. Inyo banyak bakawan jo tokoh gerakan Khilafah tasabuik. Satalah tingga salamo tigo taun di India, inyo malakukan pajalanan jo pitih surang ka babarapo nagara jo satiok nagara nan dikunjuanginyo inyo bausaho batamu jo manjadi tamu banyak pamimpin Islam. Sadoalah nagara Arab dapek disinggahinyo, kacuali Yaman Salatan jo Hadramaut.

Malalui Masia, Suriah, Turki, Irak, Yordania, inyo taruih manjalajahi babarapo nagara Eropa, antaro lain Yunani, Italia, Rumania, Parancih, Yugoslavia, jo Jerman. Dari Odesa, Uni Soviet naiak kareta api Trans Siberia ka Vladiwostok di timur kamudian taruih ka daratan Cino jo babarapo bulan tigga di Kanton. Sasudah itu inyo singgah di Beijing. Wakatu itu Cino dipimpin dek Dr. Sun Yat Sen. Pado taun 1930, inyo kambali ka Indonesia lewat Hongkong, Malaya (Malaysia kini), Singapura jo dari sinan manaruih an pajalanannyo ka Pulau Jawa.

Baliak ka Indonesia[suntiang | suntiang sumber]

Satalah limo taun malanglang buana manambah ilmu pangatauan jo pangalaman di lua nagari, inyo pun malakukan pajalanan kaliliang salamo babarapo bulan di Pulau Jawa. Dalam pajalanan itu inyo salslu bausaho manghubuangi alim ulama tamashua di Jawa, sarato pamuka-pamuka partai poilitik jo organisasi-organisasi massa, lalu baliak ka kampuang halamannyo di Ranah Minang. Pado tanggal 22-27 Mei 1930 balangsuang Kongres I Sumatera Thawalib di Bukiktinggi. Kongres tasabuik barasia mambantuak pakumpulan Islam banamo Persatuan Muslim Indonesia (PMI). Baliau ikuik mambantuak pakumpulan tasabuik dan mamparoleh kapacayoan sabagai anggota panguruih basa PMI dalam umua 25 taun.

Pado konferensi PMI di Payokumbuah tanggal 5-9 Agustus 1930 anggota-anggota pangruih PMI dilangkoki jo Anggaran Dasa jo Anggaran Rumah Tanggo nan disamparanoan. Wakatu itu, baliau dipacayoan sabagai Sekretaris Jenderal PB PMI. Pado saaik itu, PMI alah mamasyarakaik, indak sajo di Sumatera Tangah, tatapi alah malaweh ka saluruah Sumatera.

Bibliografi[suntiang | suntiang sumber]

  • Tim Islamic Centre Sumatera Barat. 2001. Riwayat Hidup Ulama Sumatera Barat dan Perjuangannya. Padang: Islamic Centre Sumbar bakarajo samo jo Panerbit Angkasa Raya. ISBN 979-9252-85-7.

Rujuak-an[suntiang | suntiang sumber]

Pautan lua[suntiang | suntiang sumber]