Makan bajamba

Makan bajamba atau juo disabuik makan barapak adolah tradisi makan nan dilakukan oleh masyarakaik Minangkabau dangan caro duduak basamo-samo di dalam suatu ruangan atau tampek nan alah ditantukan. Tradisi iko umumnyo dilangsuangkan pado hari-hari pantiang agamo Islam jo dalam babagai upacaro adaik, pesta adaik, dan patamuan pantiang lainnyo. Sacaro harfiah makan bajamba manganduang maana nan sangaik dalam, dima tradisi makan basamo iko akan man tabiakkan raso kabasamoan indakjo mancaliak pabedoan status sosial.

Penyelenggaraan

Padusi nan tangah mambao dulang diateh kapalonyo mnnuju tampek dima makan bajamba dilangsuangkan

Makan bajamba dilangsuangkan dalam suatu ruangan atau tampek nan alah ditantukan, dan umumnyo diikuti oleh labiah dari puluahan inggo ribuan urang nan kudian dibagi dalam beberapa kalompoak. Suatu kalompoak biasonyo tadiri dari 3 sampai 7 urang nan duduak mamuta, dan di satiok kalompoak alah tasadio satu dulang nan di dalamnyo tadapek sajumlah piriang nan ditumpuak barisi nasi jo babagai macam lauk. Makan bajamba biasonyo dibuka jo babagai kasenian Minang, kudian diawali jo pambacaan ayaik-ayaik suci Al-Qur'an, inggo acara berbalas pantun.

Paling Gadang

Pado 1 Desember 2006, panyalangaraan makan bajamba nan digala dalam rangka mamparingati HUT ke-123 kota Sawahlunto tacataik dalam Museum Rekor Indonesia sabagai acaro makan basamo tabanyak jo tapanjang, karano diikuti oleh 16.322 urang.

Adab

Tradisi iko diyakini barasa dari Koto Gadang, kabupaten Agam, Sumatra Barat, dan dipakiroan alah ado sajak agamo Islam masuak ka Minangkabau sakita abaik ke-7. Oleh karano itu, adab-adab nan ado dalam tradisi iko umumnyo didasarkan pado ajaran Islam tarutamo Hadits. bara adab dalam tradisi iko di antaranyo adolah saurang hanya buliah maambiak apo nan ado di hadapannyo satalah mandahulukan urang nan labiah tuo maambiaknyo.

Katiko makan, nasi diambiak sasuok sajo jo tangan suok. Satalah ditambuah saketek lauak pauak, nasi dimasuakan ka muluik dangan caro digado dalam jarak nan dakek. Katiko tangan suok manyuap nasi, tangan kida alah ado di bawahnyo untuak manghindari kamungkinan taciecienyo nasi. Jiko ado nasi nan taciecie di tangan kida, musiti diboyong ka tangan suok lalu dimasuakkan ka muluik jo caro nan samo. Tujuan makan dangan caro tasabuik supayo nasi nan handak masuak ka muluik bilo taciecie indak jatuah ka piriang, sahinggo nan lain indak maraso jajok untuak mamakan nasi nan ado dalam piriang sacaro basamo-samo. Salain itu, posisi duduak juo musiti tagok atau indak mambungkuak jo cara basimpuah (basimpuah) untuak padusi jo baselo (baselo) untuak jantan. Kudian satelah selesai, indak ado lagi nasi nan tasiso di piriang, dan makanan nan disadiokan wajib dihabihkan.