Basapa

Wikipedia Minangkabau - Lubuak aka tapian ilimu
Situs Makam Syekh Burhanuddin di Padang Pariaman

Basapa adolah upacara nan dilakukan dek masarakaik muslim di sakitaran Kabupaten Padang Pariaman, Sumatra Barat khususnyo di kecamatan Ulakan.[1] Kagiatan utamo nan dilakukan dalam tradisi ko adolah baziarah ka makam Syekh Burhanuddin, ciek dari banyak tokoh nan baperan pantiang dalam panyebaran agama Islam di Sumatra Barat pado wakatu pamarintahan Karajaan Pagaruyuang. Kagiatan ko bartujuan untuak manganang jaso ulama ko dalam upayonyo manyebarkan agamo Islam. Basapa dilakukan satiok bulan Safar dalam pananggalan kalender Islam atau Hijriah.[2][3]

Etimologi[suntiang | suntiang sumber]

Istilah basapa nan disabuikkan dalam bahaso Minangkabau sabananyo barasal dari kata "bersafar" dalam bahaso Indonesia nan marupokan gabungan antaro imbuahan "ber-" jo kata "Safar". Safar marupokan bulan kaduo dalam pananggalan kalender Hijriah. Pado bulan Safar sabagian umaik Islam baziarah ka komplek makam Syekh Burhanuddin nan talatak di Ulakan, Pariaman, yaitu pado hari Rabu sasudah tanggal 10 pado bulan Safar. Tradisi baziarah ka makam Syekh Burhanuddin pado bulan Safar ini nan dikatahui jo namo basafar nan dalam pangucapan lidah urang Minang kamudian barubah manjadi basapa. Panantuan acara basapa sasudah tanggal 10 Safar bakaitan jo hari nan diyakini sabagai tanggal maningganyo Syekh Burhanuddin Ulakan, yaitu 10 Safar 1111 H (1691 M).[4][5]

Sijarah[suntiang | suntiang sumber]

Sijarah kagiatan basapa ko tantunyo indak lapeh dari Syekh Burhanuddin di nagari/ kacamatan Ulakan nan manyebabkan agamo Islam ka saluruah Minangkabau dalam kurun wakatu 1056-1104 H / 1646-1692 M. Syekh Burhanuddin mampalajari agamo Islam di Aceh, yaitu di Singkel salamo 2 tahun jo di Banda Aceh salamo 28 tahun jo Syekh Abdurrauf. Salamo kurang labiah 30 tahun baraja, Syekh Burhanuddin baliak ka Pariaman, tapeknyo di Ulakan untuak mangambangkan ajaran agamo Islam. Di situ Syekh Burhanuddin mambangun pulo pusat agamo Islam, jo dibantu jo ampek urang muriknyo nan juo ahli di bidang masiang-masiang. Kaampek muriknyo tu antaro lain Tuanku Bayang, nan ahli ilmu saraf; Tuanku Kubung Tigobaleh, nan ahli ilmu nahwu; Tuanku Padang Ganting nan ahli fiqih; sarato Tuanku Batu Hampa nan marupokan ahli ilmu tafsir dan Al-Qur'an.

Syekh Burhanuddin acok mangumpuakan kaampek muriknyo tu untuak mambahas banyak masalah nan dihadoki. Patamuan tu sangajo dilakuan pado tanggal 11 Syafar, di mano katiko itu marupokan katiko bulan naiak sahinggo malam harinyo mandapekkan sinar tarang dari bulan. Kamudian sacaro indak disangko-sangko, Syeikh Burhanuddin maningga pado tanggal 10 Syafar di hari Rabu, di mano manuruik sabagian urang ado nan manyabuikkan tahun maningganyo adolah 1104 H, ado lo nan manyabuikkan tahun 1111 H. Sasudah Syekh Burhanuddin maningga, para murik jo pangikuiknyo setia pado sang ulama lainnyo acok tibo ka makamnyo nan barado di Ulakan untuak baziarah. Wakatu untuak baziarah indak tetap, pabilo sajo ziarah bisa dilaksanakan. Baiak di bulan Safar, Rabiul akhir, Rajab, Syawal, Zulhijah, maupun bulan lainnyo.

Karano jadwal nan indak baraturan tu, pado tahun 1315 H babarapo tokoh agamo jo adaik di wilayah sakitaran Pariaman mangadokan patamuan untuak mambahas tantang jadwal ziarah, babarapo diantaronyo adolah Tuanku Syeikh Kapalo Koto dari Pauhkamba jo Tuanku Syekh Katapiang dari Kalampaian Ampalutinggi Kecamatan VII Koto Kabupaten Padang Pariaman. Iko dimukasuikkan untuak wakatu baziarah labiah takoordinir, nampak syi’arnyo paham nan dibawah Syekh Burhanuddin, yakni paham Ahlussunnah waljamah di ranah Minang. Tuanku Syeikh Katapiang manyatujui pulo pamikiran tu sahinggo Tuanku Syekh Kapalo Koto manyebarkan undangan untuak patamuan nan direncanakan ka digelar. Undangan disebarkan kapado para ulama, kadhi, khatib, labai, mufti, jo bilal nan mayoritas adolah pangikuik paham Syekh Burhanuddin.

Tanyato undangan tu mandapekkan tampek di hati ulama jo umaik. Sasudah bakumpua, akhianyo disampaikanlah pamikiran Tuanku Syekh Kapalo Koto tadi. Salamo iko ziarah ka makam Syeikh Burhanuddin indak baraturan wakatunyo. Salanjuiknyo, saluruah pangikuik Syekh Burhanuddin nan bapahamkan Ahlussunnah waljamaah malakukan ziarah ka makamnyo disatukan di bulan Safar. Pado wakatu itu, ado pulo pabedaan antaro pangikuik paham Ahlussunnah waljamaah jo pangikuik paham lain takah Syiah, Jabariah, jo Mu’tazilah. Dek patimbangan tu, ditatapkanlah ziarah Basapa diadokan pado hari Rabu satiok 10 Safar atau Rabu katiko bulan naiak (tarang). Kini ko, babarapo minggu sabalum palaksanaan Basapa, para tokoh tarutamo pamuko agamo jo adaik di Ulakan mangadokan rapek untuak manatapkan hari-H kagiatan Basapa.

Kagiatan[suntiang | suntiang sumber]

Dalam panyalanggaroannyo, kagiatan basapa iko tabagi ka dalam tigo kagiatan utamo. Partamo adolah mangunjungi Musajik Tuo, musjaik nan didirikan sabagai tampek untuak Syekh Burhanuddin mangajarkan agamo Islam kapado para muriknyo di sampiang sabagai tampek ibadah. Kamudian nan kaduo adolah mandatangi tampek nan manyimpan macam-macam barang paninggalan dari Syekh Burhanuddin. Nan katigo barulah pai ka makam Syekh Burhanuddin untuak baziarah. Kagiatan nan alah balangsuang sajak lamo ko kamudian manjadi ciek dari banyak ikon dari Kabupaten Padang Pariaman sarato manjadi wisata religi nan dikunjungi indak hanyo bagi masarakaik sakitaran, banyak pulo masarakaik atau umaik nan tibo dari lua untuak tibo mangikuti kagiatan iko. Jikok basapa pas bana jatuah tapek pado tanggal 10 Safar, hari tu diparingati sabagai basapa gadang.[6]

Caliak pulo[suntiang | suntiang sumber]

Rujuakan[suntiang | suntiang sumber]

  1. "Tradisi "Basapa" di Padang Pariaman Ditetapkan Jadi Warisan Budaya Tak Benda". Langgam.id (dalam bahasa Indonesia). 2021-03-24. Diakses tanggal 2021-06-09. 
  2. Info Sumbar: Ini Dia 11 Tradisi Unik di Sumatra Barat Yang Masih Eksis Sampai Sekarang. 22 Desember 2015. Diakses 25 Mei 2021.
  3. "Pemkab Padang Pariaman Minta Tunda Kunjungan Tradisi Basapa". Republika Online (dalam bahasa Indonesia). 2020-10-02. Diakses tanggal 2021-06-09. 
  4. Laduni: Hingga Kini Tradisi Basapa Masih Terus Dilaksanakan Masyarakat Minangkabau. 29 Januari 2019. Diakses 09 Juni 2021.
  5. Protokol, Humas Dan (2021-03-24). "Kementerian Pendidikan dan Kebudayaan Akui Warisan Kebudayaan Non Benda " Budaya Religius BASAPA"". padangpariamankab.go.id (dalam bahasa Inggris). Diarsipkan dari versi asli tanggal 2021-06-09. Diakses tanggal 2021-06-09. 
  6. Kabanews: Tradisi Basapa Jadi Agenda Wisata Religi Sumbar Archived 2021-05-22 di Wayback Machine.. 11 November 2016. Diakses 25 Mei 2021.