Rumah Gadang Ukiaran Cino

rumah gadang ukiaran cino

Rumah gadang ukiaran cino atau bahaso indonesianyo rumah gadang ukiran cina adolah salah ciek dari babarapo jinih rumah gadang nan marupoan rumah adaik tradisional urang Minangkabau. Rumah adaik atau rumah gadang ukiaran cino iko barado di Jorong Batu Nan Limo, Nagari Koto Tangah Simalangang, Kecamatan Payakumbuah, Kabupaten Lima Puluh Kota, Sumatra Barat, labiah tapeknyo balokasi di jalan lintas antaro Kota Payokumbuah jo nagari Taeh. Disabuik jo namo rumah gadang ukiaran cino karano tadapek ukiaran-ukiaran nan bamotifkan pernak-pernik cino atau dalam bahaso daerahnyo disabuik aka cino. Rumah gadang ukiaran cino iko marupoan salah ciek rumah gadang nan manggabuangan unsur-unsur arsitektur antaro Minangkabau jo cina sarato di tambah jo unsur arsitektur bangunan nan dipangaruahi dek jinih arsitektur bangunan bagaya kolonial Balando.

Lokasi

Rumah gadang ukiaran cino iko barado di Nagari Simalanggang, Kecamatan Payakumbuh, Kabupaten Lima Puluh Kota, Sumatra Barat. Daerah tasabuik marupoan sabuah dataran randah di Kabupaten Lima Puluh Kota dengan katinggian kawasan tasabuik labiah kurang 500 meter di ateh pamukaan aia lauik. Akses jalan manuju rumah gadang ukiaran cino iko cukuik rancak. Rumah gadang nan alah manjadi situs cagar budaya iko hanyo bajarak labiah kurang 200 meter dari jalan rayo atau jalan utamo nan mahubuangan Kota Payokumbuh jo Nagari Taeh. Kamudian, untuak manuju ka mungko rumah gadang atau halaman rumah gadang tasabuik dapek melewati jalan tanah nan cukuik leba sarato jo dapek dilalui dek kandaraan roda dua maupun kandaraan roda ampek.

Sijarah

Rumah gadang ukiaran cino iko resmi tagak pado tahun 1902. Pado maso itu marupoan masa penjajahan kolonial Balando di Indonesia. Rumah gadang nan marupoan bangunan tradisional Minangkabau iko punyo bantuak bangunan nan di pangaruahi dek urang Balando nan manjajah katiko itu sarato jo urang Cino nan badagang pulo katiko itu. Sacaro historis, bangunan iko mampunyaoi kakhasan tasandiri. Sabuah rumah gadang biasonyo didirikan dek jo ateh namo kaum sapasukuan. Namun damikian, Rumah gadang ukiaran cino babeda jo adaik kabiasaan karano dibangun dek jo ateh namo pribadi sahinggo indak punyo sauatu kaum atau suku tatantu. Rumah gadang ukiaran cino mulai dibangun dek urang punyonyo nan pado sangkek itu banamo Datuak Bandaro Leman atau biaso dipanggia jo gala Leman Kayo, pado tahun 1890-an. Datuak Bandaro Leman adolah saurang pangusaho nan sangaik sukses jo usaho badagang jo patarnakannya. Taranak Datuak Bandaro Leman sangaik banyak nan dipaliaharo dek urang-urang nan amua bakarajo ka datuak ko. Usaho pardagangannyopun sangaik maju hinggo sampai kalua nagari, sarupo ka nagari Cino. Mangko karano itulah, sangaik mamungkinkan inyo dapek mandatangaan urang-urang arsitek Cino untuak mambangun rumahnyo. Datuk Bandaro Leman tasabuik maninggal pado tanggal 13 Maret 1939 nan kamudian dimakamkan di balakang rumahnyo gadangnyo tasabuik. Rumah gadang ukiaran cino mulai di huni sarato jo dipakai pado tahun 1902. Hal iko nampak ditandoi dari sabuah kain samacam spanduak paresmian sangkek itu nan tabuek dari sutera nan masih tapasang di rumah iko kiniko. Pado kain tasabuik tadapek samacam sulaman tulisan nan tatulih “Slamat Pakai 15 Maart 1902”. Salain itu, pado wakatu zaman kasalarasan jo diwakatu maso kolonial Balando, rumah iko pernah juo dipakai sabagai kadiaman Tuanku Lareh Simalanggang.

Karakteristik

Arsitektural

Rumah gadang ukiaran cino marupoan salah ciek bantuak rumah adaik tradisional Minangkabau. Namun damikian, rumah gadang iko mampunyoi babarapo kaunikan nan khas jo langka, sahinggo mambedakannyo jo rumah gadang pado umumnyo. Rumah gadang iko marupoan salah ciek rumah gadang nan manggabungan unsua-unsua arsitektur, nan tadiri dari unsua arsitektur dasarnyo yaitunyo Minangkabau itu surang. Kamudian unsua arsitektur Cino nan di pakai pado ragam hieh nan tadapek pado rumah gadang tasabuik, kamudian salanjuiknyo adonyo unsua Balando nan mampangaruahi panggunoan teknologi jo panggunoan bahan bangunannyo. Rumah gadang iko mampunyoi ciri-ciri tradisional nan samo jo babarapo jinih rumah gadang nan lainyo. Ciri-ciri pokok arsitektur tradisional nan masih dapek dicalaik pado bangunan rumah gadang ukiaran cino antaro lain iolah atok (atap), anjuang (anjungan), jo janjang masuk (tangga). Atok rumah gadang iko babantuak gonjong nan bajumlah anam buah.

Terminologi

Rumah gadang sarupo rumah gadang ukiaran cino iko disabuik juo sabagai rumah gadang bagonjong anam. Rumah gadang tasabuik biasonyo mampunyoi ciri khas barupo duo buah anjuangan nan talatak di ujuang jo pangka dari bangunan. Kaberadoan anjuangan tasabuik manyababkan rumah gadang samacam itu biasnyo juo disabuik rumah gadang baanjuang atau disabuik juo jo namo rumah gadang sitinjau lawik. Salain itu, rumah gadang samacam iko mampunyoi ciri khas barupo janjang masuak nan barado di tangah-tangah bangunan rumah gadang.

Hirarkis

Rumah gadang ukiaran cino tadiri dari tigo tingkek. Tingkek partamo adolah kaki bangunan nan babantuak kolong. Bagian nan iko salain baguno sabagai pondasi, baguno juo sabagai panyangga badan dari bangunan tasabuik. Salain itu, kolong rumah atau kandang rumah dalam bahaso satampek bafungsi pulo untuak manyimpan barang-barang atau sabagai gudang. Samintaro itu, tingkek kaduo adolah badan bangunan. Nagian nan iko bafungsi sabagai hunian atau tampek tingga kaluarga. Salanjuiknyo, tingkek katigo adolah atok bangunan. Bagian nan iko bafungsi sabagai palinduang dari paneh jo hujan. Katigo tingkekan bangunan rumah gadang tasabuik marupoan ciek kasatuan nan mambueknyo tahan tahadok guncangan gampo.

Bantuak bangunan

Rumah gadang ukiaran cino iko mampunyoi bantuak denah dasar pasegi panjang baukuaran panjang 14,3 m jo leba 6,5 m. Samintaro itu, bagian anjuangan nan barado di ujuang jo pangka bangunan, masiang-masiang baukuran 3,60 x 3,60 m. Pado bagian balakang bangunan lamo tadapek sabuah dapua, tatapi kiniko alah indak ado. Karano damikian, sacaro kasaluruahan bangunan iko baukuaran panjang 21,5 m jo leba 6,5 m. Sacaro fisik, Rumah gadang iko punyo ukuaran panjang 18 meter jo leba 8 meter sarato jo atok bagonjong anam nan tabuek dari seng. Atok iko masih marupoan atok sawakatu pambangunannyo. Pado pambangunan partamo, kaduo sisi rumah gadang iko tadapek anjuangan. Namun, sakitar tahun 1940-an salah ciek anjuang yaitunyo pado sisi kida dibongka, nan dijadian dapua jo ruang makan. Janjang naiak ka ateh rumah awalnyo persis tapek di tangah bangunan. Namun, sawakatu pambongkaran anjuang subalah kida janjang dibongka juo kamudian disatuan jo bangunan baru pado sisi timua. Dindiang dari bangunan iko tabuek dari tembok bata. Sabagian banyak dindiang tadapek ukiaran motif Cino (Macau) barupo binatang jo tumbuahan. Rumah gadang iko mampunyoi jendela sabanyak 14 buah nan tadapek pado bagian mungko, sampiang suok, jo balakang. Salain itu, di dalam rumah gadang iko masih tasimpan koleksi barupo kain, keramik, meja, tampek tidua nan samo umuanyo jo bangunan tasabuik.