Sumatera Barat

Dari Wikipedia baso Minang, ensiklopedia bebas
(Dialiahkan dari Sumatra Barat)
Lompek ka: navigasi, cari
Sumatera Barat
—  Provinsi  —
Dari kiri ke kanan: Bandar Udaro Internasional Minangkabau, Jam Gadang, Kantua Gubernur Sumatera Barat, Rumah Gadang, Ngarai Sianok jo Danau Maninjau.
Lambang Sumatera Barat
Lambang
Motto: Tuah Sakato
Peta lokasi Sumatera Barat
Nagara  Indonesia
Ibu kota Padang
Koordinat 3º 50' LS - 1º 20' LU
98º 10' - 102º 10' BT
Pamarintahan
 • Gubernur Prof. DR. Irwan Prayitno, M.Sc (2010-2015)
Area
 • Total 42.297.30 km2 (16,331.08 sq mi)
Populasi panduduak (2010)[1]
 • Panduduak 4.845.998
 • Kapadatan 110/km2 (300/sq mi)
Demografi
 • Suku Banso Minangkabau (88,35%), Batak (4,42%), Jawa (4,15%), Mentawai (1,28%), Lain-lain (1,8%) [2]
 • Agamo Islam (97.4%), Kristen (2.2%), Buddha (0,26%), Hindu (0,01%)
 • Bahaso Bahaso Minangkabau, Bahaso Melayu, Bahaso Indonesia
Zona wakatu WIB
Kabupaten 12
Kota 7
Kecamatan 147
Desa/kelurahan 877
Lagu daerah Ayam Den Lapeh, Kampuang Nan Jauah di Mato, Kambanglah Bungo, Minangkabau, Bareh Solok, Tinggalah Kampuang.
Laman web www.sumbarprov.go.id

Sumatera Barat nan biaso disingkek Sumbar adolah sabuah provinsi di Indonesia nan talatak di sabalah baraik pulau Sumatera nan baibukota di Padang. Provinsi iko babatehan jo provinsi Sumatera Utara di sabalah utaro, Riau jo Jambi di sabalah timua, sarato Bengkulu di sabalah salatan. Kapulauan Mantawai nan ado di Samudra Hindia masuak kadalam wilayah administratif provinsi iko. Sadangkan ibukota dari provinsi iko adolah Padang.

Sumatera Barat bapanduduak sabanyak 4.845.998 jiwa nan sabagian gadang baetnis Minangkabau nan kasadonyo baagamo Islam, sadangkan sisonyo indak kasodonyo nan mamaluak Islam. Provinsi iko tadiri dari 12 kabupaten jo 7 kota jo pambagian wilayah administratif sasudah kecamatan di saluruah kabupaten (kacuali kabupaten Kepulauan Mentawai) dinamokan sabagai nagari—sabalunnyo pado tahun 1979 diganti jo desa, kamudian sajak 2001 dibaliakan ka namo samulo.

Sajarah[suntiang | suntiang sumber]

Rumah gubernur Westkust van Sumatra atau "pantai barat Sumatera" (litografi badasarkan lukisan Josias Cornelis Rappard, 1883-1889)
Istano Pagaruyung

Asa mulo namo Provinsi Sumatera Barat dimuloi pado zaman Vereenigde Oostindische Compagnie (VOC), digunokan untuak sabutan wilayah administratifnyo yakni Hoofdcomptoir van Sumatra's westkust. Kamudian sairiang makin mangueknyo pangaruah politik jo ekonomi VOC, sampai abaik ka 18 wilayah administratif iko alah mancakuik kawasan pantai barat Sumatera muloi dari Barus sampai Inderapuro.[3]

Sairiang jo kajatuahan Karajaan Pagaruyung, jo talibeknyo Balando dalam Parang Padri, pamarintah Hindia Balando muloi manjadikan kawasan padalaman Minangkabau sabagai bagian dari Pax Nederlandica, kawasan nan barado dalam pangawasan Balando, sarato wilayah Minangkabau iko dibagi ateh Residentie Padangsche Benedenlanden jo Residentie Padangsche Bovenlanden.[4]

Salanjuiknyo dalam pakambangan administrasi pamarintahan kolonial Hindia Balando, daerah iko tagabuang dalam Gouvernement Sumatra's Westkust tamasuak wilayah Residentie Bengkulu nan baru disarahkan Inggirih bakeh Balando. Kamudian dipalaweh lai jo mamasuakan Tapanuli, jo Singkil. Namun pado tahun 1905, wilayah Tapanuli ditingkekkan statuihnyo manjadi Residentie Tapanuli, sadangkan wilayah Singkil diagiahkan kapado Residentie Atjeh. Kamudian pado tahun 1914, Gouvernement Sumatra's Westkust, diturunkan statuihnyo manjadi Residentie Sumatra's Westkust, jo manambahkan wilayah Kapulauan Mentawai di Samudera Hindia ka dalam Residentie Sumatra's Westkust, sarato pado tahun 1935 wilayah Kerinci digabuangkan juo ka dalam Residentie Sumatra's Westkust. Samantaro wilayah Rokan Hulu jo Kuantan Singingi diagiahkan kapada Residentie Riouw pasca pamacahan Gouvernement Sumatra's Oostkust, sarato juo mambantuak Residentie Djambi pado periode nan ampiang basamoan.[3]

Pado maso panduduakan tentara Japang, Residentie Sumatra's Westkust barubah namo manjadi Sumatora Nishi Kaigan Shu. Ateh dasa geostrategis militer, daerah Kampar/ Bangkinang dikaluakan dari Sumatora Nishi Kaigan Shu jo dimasuakkan ka dalam wilayah Rhio Shu.[3]

Pado awal kemerdekaan Indonesia pado tahun 1945, wilayah Sumatera Barat tagabuang dalam provinsi Sumatera nan bapusek di Bukittinggi. Pado tahun 1949, Provinsi Sumatera kamudian dipacah manjadi tigo provinsi, yakni Sumatera Utara, Sumatera Tangah, jo Sumatera Selatan. Sumatera Barat sarato Riau jo Jambi marupoan bagian dari karesidenan di dalam Provinsi Sumatera Tengah. Pado maso PRRI di Sumatera, Pamarintah Pusek badasakan Undang-undang darurat nomor 19 tahun 1957, Provinsi Sumatera Tengah dipacah lai manjadi tigo provinsi yakni Provinsi Sumatera Barat, Provinsi Riau, dan Provinsi Jambi. Wilayah Kerinci nan sabalunnyo tagabuang dalam Kabupaten Pesisir Selatan Kerinci, digabuangkan ka dalam Provinsi Jambi sabagai kabupaten tasandiri. Baitu pulo wilayah Kampar, Rokan Hulu, jo Kuantan Singingi ditetapkan masuak ka dalam wilayah Provinsi Riau. Salanjuiknyo ibu kota provinsi Sumatera Barat nan baru iko adolah masih tetap di Kota Bukittinggi. Namun badasakan Surat Keputusan Gubernur Sumatera Barat No. 1/g/PD/1958, tanggal 29 Mei 1958 sacaro de facto manetapkan Kota Padang manjadi ibu kota Provinsi Sumatera Barat.[3]

Geografi[suntiang | suntiang sumber]

Danau Diatas, salah satu danau di kabupaten Solok
Pulau sikuai, salah satu kawasan wisata bahari di Padang

Sumatera Barat talatak di pasisia barat bagian tangah pulau Sumatera nan tadiri dari dataran randah di pantai barat jo dataran tinggi vulkanik nan tabantuak dek Bukik Barisan. Provinsi iko mamiliaki daratan salaweh 42.297,30 km² nan sarupo jo 2,17% laweh Indonesia. Dari laweh tasabuik, labiah dari 45,17% marupoan kawasan nan masih tatutuik dek hutan linduang. Garih pantai provinsi iko sadoalahnyo basantuahan jo Samudera Hindia sapanjang 2.420.357 km jo laweh parairan lauik 186.580 km².[5] Kepulauan Mentawai nan talatak di Samudera Hindia tamasuak ka dalam provinsi iko.

Co daerah lainnyo di Indonesia, iklim Sumatera Barat sacaro umum basifek tropis jo suhu udaro nan cukuik tinggi, yaitu antaro 22,6°C sampai 31,5°C. Garih khatulistiwa tapek malalui provinsi iko di kecamatan Bonjol, kabupaten Pasaman. Di provinsi iko bahulu sajumlah sungai gadang nan bamuaro di pantai timua Sumatera co Batang Hari, Siak, Inderagiri (disebut sebagai Batang Kuantan di bagian hulunyo), jo Kampar. Samantaro sungai-sungai nan bamuaro di provinsi iko bajarak pendek, co Batang Anai, Batang Arau, jo Batang Tarusan.

Tadapek 29 gunuang nan tasebar di 7 kabupaten jo kota di Sumatera Barat jo Gunung Talamau di kabupaten Pasaman Barat sabagai gunuang tatinggi, yaitu 2.913 m. Gunung Marapi di kabupaten Agam marupoan gunuang aktif nan tingginyo 2.891 m, gunuang aktif lainnyo adolah Tandikat jo Talang. Salain gunuang, Sumatera Barat punyo pulo banyak danau. Danau talaweh adolah Singkarak di kabupaten Solok jo kabupaten Tanah Datar, disusua Maninjau di kabupaten Agam. Jo lawehnyo nan mencapai 130,1 km², Singkarak juo manjadi danau talaweh kaduo di Sumatera jo kasabaleh di Indonesia. Danau lainnyo tadapek di kabupaten Solok yaitu Danau Talang jo Danau Kembar (juluakan dari Danau Diatas jo Danau Dibawah).

Sumatera Barat marupoan salah satu daerah rawan gampo di Indonesia nan disababkan lataknyo ado di jalur patahan Semangko tapek di antaro patamuan duo lempeng banua gadang, yaitu Eurasia jo Indo-Australia.[6] Gampo bumi gadang nan tajadi akhia-akhia iko di Sumatera Barat di antaronyo adolah Gampo bumi 30 September 2009 jo Gampo bumi Kepulauan Mentawai 2010.

Kaanekaragaman hayati[suntiang | suntiang sumber]

Sumatera Barat marupoan salah satu provinsi di Indonesia nan kayo jo sumber kaanekaragaman hayati. Sabagian gadang wilayahnyo masih marupoan hutan tropis alami jo dilinduangi. Babagai spesies langka masih dapek dijumpoi, misalnyo Rafflesia arnoldii (bungo tagadang di dunia), harimau sumatera, siamang, tapir, ruso, beruang, jo babagai jinih buruang jo kupu-kupu.

Taapek duo Taman Nasional di provinsi iko, yaitu Taman Nasional Siberut nan tadapek di pulau Siberut (Kabupaten Kepulauan Mentawai) jo Taman Nasional Kerinci Seblat. Taman nasional taakhia iko wilayahnyo mambantang di ampek provinsi: Sumatera Barat, Jambi, Bengkulu, jo Sumatera Selatan.

Salain kaduo Taman Nasional tasabuik tadapek juo babarapo cagar alam lainnyo, yaitu Cagar Alam Rimbo Panti, Cagar Alam Lambah Anai, Cagar Alam Batang Palupuh, Cagar Alam Aia Putih di daerah Kelok Sembilan, Cagar Alam Lambah Harau, Cagar Alam Beringin Sakti jo Taman Raya Bung Hatta.

Sumber daya alam[suntiang | suntiang sumber]

Sumber daya alam nan ado di Sumatera Barat adolah barupo batu baro, batu basi, batu galena, timah hitam, seng, mangan, ameh, batu kapua (simin), kelapa sawit, kakao, gambir, hasia parikanan jo patanian.

Panduduak[suntiang | suntiang sumber]

Masjid Jami di Agam
Gereja Katholik peninggalan Belanda di Sawahlunto

Suku bangso[suntiang | suntiang sumber]

Mayoritas panduduak Sumatera Barat marupoan suku Minangkabau. Di daerah Pasaman salain suku Minang badiam pulo suku Batak jo suku Mandailing. Suku Mentawai ado di Kepulauan Mentawai. Di babarapo kota di Sumatera Barat tautamo kota Padang tadapek etnis Tionghoa, Tamil jo Suku Nias. Di babarapo daerah transmigrasi co di Sitiung, Lunang Silaut, Padang Gelugur jo lainnyo ado pulo suku Jawa. Sabagian di antaronyo adolah katurunan imigran badarah Jawa dari Suriname nan mamiliah baliak ka Indonesia pado maso akhia tahun 1950-an. Dek Presiden Soekarno wakatu itu diputuihkan mareka ditampekkan di sakaluluang daerah Sitiung. Hal iko indak juo lapeh dari aspek politik pamerintah pusek pasca rekapitulasi PRRI di Provinsi Sumatera Barat nan juo baru dibantuak katu itu.

Salain itu juo ado baragam suku nusantara lainnyo nan masuak pasca kamerdekaan sabagai parantau jo pakarajo di babagai bidang.

Bahaso[suntiang | suntiang sumber]

Bahaso nna digunokan dalam kasaharian iolah bahaso daerah yaitu Bahaso Minangkabau nan punyo baragam dialek, sarupo dialek Bukittinggi, dialek Pariaman, dialek Pasisia Selatan, jo dialek Payakumbuh. Di daerah Pasaman jo Pasaman Barat nan babatehan jo Sumatera Utara, ditutuakan pulo Bahaso Batak jo Bahaso Melayu dialek Mandailing. Samantaro itu di daerah kepulauan Mentawai digunokan Bahaso Mentawai.

Agamo[suntiang | suntiang sumber]

Caliak pulo Islam di Sumatera Barat

Islam adolah agamo mayoritas nan dianuik dek sakita 98% panduduak Sumatera Barat, nan kabanyakan pamaluaknyo adolah urang Minangkabau. Salain itu ado juo nan baagamo Kristen tautamo di kepulauan Mentawai sakita 1,6%, Buddha sakita 0,26%, jo Hindu sakita 0,01%, nan dianuik dek panduduak non-Minangkabau.

Babagai tampek ibadah nan dapek dijumpoi di satiok kabupaten jo kota di Sumatera Barat didominasi dek musajik jo surau. Musajik tagadang adolah Musajik Rayo Sumatera Barat di kota Padang nan kini pambangunannyo masih dalam tahap pangarajoan, sadangkan masajik tatuo di antaronyo adolah Masajik Rayo Ganting di kota Padang jo muasajik Tuo Kayu Jao di kabupaten Solok. Arsitektur khas Minangkabau mandominasi baiak bantuak musajik maupun surau. Musajik Rayo Sumatera Barat mamiliaki bangunan babantuak gonjong, dihiasi ukiran Minang sakaligus kaligrafi. Ado juo musajik jo atok nan tadiri dari babarapo tingkatan nan makin ka ateh makin ketek jo saketek cakuang.

Tahun 2008 2010
Jumlah panduduak 4.763.130 Green Arrow Up.svg 4.845.998
Sejarah kependudukan Sumatera Barat
Sumber:[1]

Pamarintahan[suntiang | suntiang sumber]

Provinsi Sumatera Barat dipimpin dek surang gubernur nan dipiliah dalam pamiliahan sacaro langsuang basamo jo wakianyo untuak maso jabatan 5 tahun. Gubernur salain sabagai pamarintah daerah baparan pulo sabagai pawakilan atau papanjangan tangan pamarintah pusek di wilayah provinsi nan kawenangannyo diatur dalam Undang-undang nomor 32 Tahun 2004 jo Peraturan pemerintah nomor 19 tahun 2010.

Samantaro hubuangan pamarintah provinsi jo pamarintah kabupaten jo kota bukan subordinat, masing-masing pamarintahan daerah tasabuik mangatur jo mauruih surang urusan pamarintahan manuruik asas otonomi jo tugas pembantuan.

Pawakilan[suntiang | suntiang sumber]

DPRD provinsi Sumatera Barat
2009-2014
Partai Kursi
Partai Demokrat 14
Partai Golkar 9
PAN 6
PKS 5
Partai Hanura 5
PPP 4
Partai Gerindra 4
PDI-P 3
PBB 3
PBR 2
Total 55
Sumber:[7][8]

Badasakan Pemilu Legislatif 2009, Sumatera Barat mangirimkan 14 wakil ka DPR RI dari duo daerah pamiliahan jo ampek wakil ka DPD. Sadangkan untuak DPRD Sumatera Barat tasusun dari pawakilan sapuluah partai, jo parincian sabagai barikuik:[7][9]

Pamarintahan Nagari[suntiang | suntiang sumber]

Sampai tahun 1979 satuan pamarintahan taketek di Sumatera Barat adolah nagari, nan alah ado sabalun kamerdekaan Indonesia. Jo dibalakukannyo Undang-undang nomor 5 tahun 1979 tentang pemerintahan desa, statuih nagari dihilangkan manjadi desa, jo babarapo jorong ditingkekkan statuihnyo manjadi desa. Kaduduakan wali nagari juo dihapuih jo administrasi pamarintahan dijalankan dek para kapalo desa. Namun sajak bagulianyo reformasi pamarintahan jo otonomi daerah, mako sajak tahun 2001, istilah "Nagari" digunokan baliak di provinsi iko.

Pamarintahan nagari marupoan suatu struktur pamarintahan nan otonom, punyo teritorial nan jaleh jo manganuik adaik sabagai pangatua tata kahiduikan anggotanyo[10], sistem iko kamudian disasuaikan jo konstitusi nan balaku di Indonesia, kini pamarintah provinsi Sumatera Barat manatapkan pamarintah nagari sabagai pangelola otonomi daerah tarandah untuak daerah kabupaten manggantikan istilah pamarintah desa nan dipakai sabalunnyo. Sadangkan untuak nagari nan ado pado sistem pamarintahan kota masih sabagai limbago adaik alun manjadi bagian dari struktur pamarintahan daerah.

Nagari pado mulonyo dipimpin sacaro basamo dek para pangulu atau datuak di nagari tasabuik, kamudian pado maso pamarintah Hindia-Belanda dipiliah salah surang dari para pangulu tasabuik untuak manjadi wali nagari. Kamudian dalam manjalankan pamarintahannyo, wali nagari dibantu dek babarapo urang kapalo jorong atau wali jorong, namun kini dibantu dek sekretaris nagari (setnag) jo babarapo pagawai nagari sipil (PNS) bagantuang jo kabutuahan masing-masing nagari. Wali nagari iko dipiliah dek anak nagari (panduduak nagari) sacaro demokratis dalam pamiliahan langsuang untuak 6 tahun maso jabatan.

Dalam sabuah nagari dibantuak Kerapatan Adat Nagari, yakni limbago nan baanggotakan Tungku Tigo Sajarangan. Tungku Tigo Sajarangan marupoan pawakilan anak nagari nan tadiri dari Alim Ulama, Cadiak Pandai (kaum intelektual), jo Niniak Mamak para pemimpin suku dalam suatu nagari, samo jo Badan Permusyawaratan Desa (BPD) dalam sistem administrasi desa. Sagalo kaputuihan penting nan kak diambiak salalu dimusyawarahkan antaro wali nagari jo Tungku Tigo Sajarangan di Balai Adaik atau Balairung Sari Nagari.

Pendidikan[suntiang | suntiang sumber]

Sumatera Barat pernah manjadi pusek pendidikan di pulau Sumatera, tarutamo dalam pendidikan Islam jo surau sabagai basis utamo tampek pendidikan.[11] Pado maso kolonial panjajahan Balando pendidikan Islam baitu dipinggiakan dibandiangkan jo pendidikan model Hindia Balando nan dianggap labiah modern.[12]

Salapeh pangakuan kamerdekaan Indonesia, di provinsi iko mulai banyak bamunculan limbago pendidikan tarutamo di tahun 1950-an.[13] Ampia di satiok kabupaten jo kota dalam provinsi iko alah punyo perguruan tinggi, dan sabahagian gadang ado di kota Padang.

Parekonomian[suntiang | suntiang sumber]

Pariwisata, Seni, jo Budayo[suntiang | suntiang sumber]

Jambatan aka, objek turis nan potensial di Pasisia Selatan
Lambah Harau di Limo Puluah Kota
Ombak Kapulauan Mentawai jadi tantangan para pasalancar

Pariwisata[suntiang | suntiang sumber]

Badasarkan data dari Badan Pusat Statistik, Sumatera Barat tacatek sabagai salah satu provinsi jo jumlah kunjungan wisatawan tabanyak.[14] Sumatera Barat punyo ampiang sado jinih objek wisata alam sarupo lauik, pantai, danau, gunuang jo ngarai, salain objek wisata budayo. Akomodasi hotel alah banyak mulai dari kelas melati sampai bintang ampek. Agen tour jo travel di bawah kaanggotaan ASITA Sumatera Barat alah labiah dari 100 buah. Untuak malangkoki fasilitas panunjang pariwisata, pamarintah juo manyadiokan kareta api wisata nan baoperasi pado jam-jam tatantu.

Objek-objek wisata nan dikunjuangi para wisatawan di antaronyo, Jambatan aka di kecamatan Bayang; Rumah Gadang Mande Rubiah di Lunang; Istano Karajaan Inderapura di kecamatan Pancung Soal; Pulau Cingkuak jo paninggalan Benteng Balando jo Puncak Langkisau di Painan, kabupaten Pesisir Selatan, Danau Maninjau jo Puncak Lawang Ambun Pagi di kabupaten Agam, Lambah Anai; Istano Basa Pagaruyung, Danau Singkarak di kabupaten Tanah Datar, Danau Talang; Danau Diateh jo Danau Dibawah dikana juo jo sabutan Danau kembar di kabupaten Solok, Panorama Ngarai Sianok; Benteng Fort de Kock; Jam Gadang di kota Bukittinggi, Pantai Aia Manih; Pantai Muaro; Pantai Caroline; Pulau Sikuai di kota Padang, Tampek wisata Harau di kabupaten Lima Puluh Kota, Tampek wisata Ngalau di kota Payakumbuh, Candi Padang; Prasasti Padang Roco di Kabupaten Dharmasraya, Pantai Kata; Pantai Gandoriah di kota Pariaman, Pantai Arta; Malibo Anai di kabupaten Padang Pariaman.

Samantaro itu babagai informasi jo literatur sijarah manganai Sumatera Barat jo kabudayoan Minangkabau sacaro umum dapek dijumpai di Pusek Dokumentasi jo Informasi Kabudayoan Minangkabau (PDIKM), nan talatak di tangah-tangah objek wisata Pakampuangan Minangkabau (Minangkabau Village) di kota Padang Panjang. Di PDIKM tadapek barupo dokumentasi foto mikrograf surek kaba, pakaian tradisional, kaset rekaman lagu daerah, dokumentasi surek-surek kapamarintahan jo alua sijarah masyarakaik Minangkabau sacaro taparinci khususnyo samanjak abaik 18 (periode panjajahan Balando) hinggo era 1980'an. Salain itu sumber literatur lain dapek ditalusuri di Perpustakaan KITLV (Koninklijk Instituut voor Taal-, Land- en Volkenkunde) jo di Perpustakaan Universitas Leiden, duo-duonyo di Leiden, Balando.

Olahraga[suntiang | suntiang sumber]

Provinsi Sumatera Barat punyo babarapo event olahraga nan baskala lokal, nasional maupun internasional dalam maningkekan pariwisatanyo, di antaronyo lomba pacu kudo. Palombaan pacu kudo iko alah manjadi tradisi jo manjadi bagian dari budayo masyarakaik Minangkabau khususnyo, kini alah manjadi rangkaian palombaan jo babarapo kota/kabupaten lain di Sumatera Barat nan mandapek kasampatan manjadi tuan rumah satu kali tiok tahunnyo, samantaro pesertanyo juo ado dari lua Sumatera Barat.[15] Babarapo lapangan pacuan kudo tasabuik taseba di kota jo kabupaten nan ado dalam provinsi iko.

Samantaro Tour de Singkarak pado tahun 2014, alah mamasuaki tahun kaampeknya. Kajuaroan iko sacaro rasmi alah manjadi agenda paalekan tahunan Union Cycliste Internationale (UCI). Babarapo kawasan wisata manjadi bagian dari jalur lintasan lomba tamasuk Lambah Harau, Danau Maninjau, Kelok 44, jo danau kembar Diateh jo Dibawah.[16] Di sisi lain, cabang ulahrago parahu naga (dragon boat) juo rutin dilaksanokan di Sumatera Barat, sarupo kajuaroan Parahu Naga Internasional di Padang nan mandatangkan peserta dari mancanegara jo lua provinsi, sarato kajuaroan Dayuang Tradisional di Pantai Carocok, Painan jo Dharmasraya.

Musik[suntiang | suntiang sumber]

Nuansa Minangkabau nan ado di dalam satiok musik Sumatera Barat nan dicampua jo jinih musik apopun kini pasti ka nampak dari satiok karya lagu nan baredar di masyarakaik. Hal iko dek musik Minang bisa diracik jo aliran musik jinih apopun sahinggo lamak didanga jo bisa ditarimo dek masyarakaik. Unsur musik pambari nuansa tadiri dari instrumen alek musik tradisional saluang, bansi, talempong, rabab, pupuik, sarunai, jo gandang tabuik.

Ado pulo saluang jo dendang, yakni panyampaian dendang (carito balagu) nan diiriangi saluang nan dikana juo jo namo sijobang.[17]

Musik Minangkabau barupo instrumentalia jo lagu-lagu dari daerah iko pado umumnyo basipaik melankolis. Hal iko bakaitan arek jo struktur masyarakaiknyo nan punyo raso pasudaroan, hubuangan kakaluargoan jo kacintoan ka kampuang halaman nan tinggi ditunjang jo kabiasoan pai marantau.

Industri musik di Sumatera Barat samakin bakambang jo muncuanyo seniman-seniman Minang nan bisa mambaurkan musik modern ka dalam musik tradisional Minangkabau. Pakambangan musik Minang modern di Sumatera Barat alah dimulai sajak tahun 1950-an ditandoi jo lahianyo Orkes Gumarang.

Elly Kasim, Tiar Ramon jo Yan Juned adolah panyanyi daerah Sumatera Barat nan tanamo di era 1970-an hinggo kini.

Parusahoan-parusahoan rekaman di Sumatera Barat antaro lain: Tanama Record, Planet Record, Pitunang Record, Sinar Padang Record, Caroline Record nan talatak di kota Padang jo Minang Record, Gita Virma Record nan talatak di kota Bukittinggi.

Kini para panyanyi, pancipta lagu, jo panata musik di Sumatera Barat banauang dibawah organisasi PAPPRI (Pasatuan Artis Panyanyi Pancipta lagu Panata musik Rekaman Indonesia) jo PARMI (Pasatuan Artis Minang Indonesia).

Sabuah patunjuakan randai

Tarian tradisional[suntiang | suntiang sumber]

Sacaro garih gadang seni tari dari Sumatera Barat adolah dari adaik budayo etnis Minangkabau jo etnis Mentawai. Kakhasan seni tari Minangkabau umumnyo dipangaruahi dek agamo Islam, kaunikan adaik matrilineal jo kabiasoan marantau masyarakaiknyo juo maagiah pangaruah gadang dalam jiwa sabuah tari tradisi nan basipaik klasik, di antaronyo Tari Pasambahan, Tari Piriang, Tari Payuang jo Tari Indang. Samantaro itu tadapek pulo suatu patunjuakan khas etnis Minangkabau lainnyo barupo papaduan unik antaro seni bela diri nan disabuik silek jo tarian, nyanyian jo seni paran (acting) nan dikana jo namo Randai.[18]

Sadangkan untuak tarian khas etnis Mentawai disabuik Turuk Laggai. Tarian Turuk Langai iko umumnyo bacarito tantang tingkah laku hewan, sahinggo judulnyo pun disasuaikan jo namo-namo hewan tasabuik, misalnyo tari buruang, tari cigak, tari ayam, tari ula jo sabagainyo.[19]

Istano Basa di Pagaruyuang dibangun jo arsitektur khas Minang

Rumah Adaik[suntiang | suntiang sumber]

Rumah adaik Sumatera Barat khususnyo dari etnis Minangkabau disabuik Rumah Gadang. Rumah Gadang biasonyo dibangun di ateh sabidang tanah miliak suku/kaum tasabuik sacaro turun tamurun.[20] Indak jauah dari komplek rumah gadang tasabuik biasonyo juo dibangun sabuah surau kaum nan bafungsi sabagai tampek ibadah jo tampek tingga lalaki dewasa kaum tasabuik namun alun manikah.

Rumah Gadang iko dibuek babantuak ampek pasagi panjang jo dibagi ateh duo bahagian muko jo balakang,[21] umumnyo babahan kayu, jo sapinteh nampak co bantuak rumah pangguang jo atok nan khas, manonjol sarupo tanduak kabau, masyarakaik satampek manyabuiknyo Gonjong jo dahulunyo atok iko babahan ijuak sabalun baganti jo atok seng. Rumah Bagonjong[22] iko manuruik masyarakaik satampek diilhami dari tambo, nan mangisahkan kadatangan nenek moyang mareka jo kapa dari lauik. Ciri khas lain rumah adaik iko adolah indak mamakai paku basi tapi manggunokan pasak dari kayu, namun cukuik kuek sabagai pangikek.[23]

Samantaro etnis Mentawai juo punyo rumah adaik nan babantuak rumah panggung gadang jo tinggi lantai dari tanah mancapai satu meter nan disabuik jo uma.[24] Uma iko dihuni sacaro basamo dek limo sampai sapuluah kaluargo. Sacaro umum konstruksi uma iko dibangun jo indak manggunokan paku, tatapi dipasak jo kayu sarato sistem sambungan silang batakik.

Sanjato Tradisional[suntiang | suntiang sumber]

Sanjata tradisional Sumatera Barat adolah Karih jo Kurambiak. Karih biasonyo dipakai dek kaum laki-laki nan dilatakkan di sabalah muko, jo umumnyo dipakai dek para pangulu tarutamo dalam satiok acaro rasmi ado tarutamo dalam acaro malewa gala, salain itu juo biaso dipakai dek para marapulai dalam acaro majlis pakawinan nan masyarakaik satampek manyabuiknyo baralek. Sadangkan kurambiak marupoan sanjato tajam ketek nan bantuaknyo malangkuang co kuku harimau, dek memang tainspirasi dari kuku binatang lia tasabuik. Sanjato iko dipakai dek para pandeka silek Minang dalam pataruangan jarak pendek, tarutamo nan manggunokan jurus silek harimau. Babagai jinih sanjato lainnyo juga pernah digunokan sarupo tombak, pedang panjang, panah, sumpik jo sabagainyo.

Masakan khas[suntiang | suntiang sumber]

Nasi Kapau salah satu masakan di Sumatera Barat

Dalam dunia kuliner, Sumatera Barat tanamo jo masakan Padang jo restoran Padang, dengan citaraso nan padeh, dapek ditamukan ampiang di sadoalah panjuru Nusantara, bahkan sampai ka lua nagari.[25] Babarapo contoh makanan dari Sumatera Barat nan cukuik populer adolah Randang, Sate Padang, Dendeng Balado, Itiak Lado Mudo, Soto Padang, jo Bubua Kampiun.

Satiok kawasan di Sumatera Barat, punyo makanan sabagai ciri khas daerah, nan biaso dijadikan sabagai buah tangan (oleh-oleh) misalnyo: kota Padang tanamo jo bingkuang, kota Padangpanjang tanamo jo pergedel jaguang, kota Bukittinggi jo karupuak sanjai, kota Payakumbuh jo galamai. Salain itu, Sumatera Barat juo punyo ratusan resep, sarupo kipang kacang, bareh randang, dakak-dakak, rakik maco, pinyaram, Karupuak Balado, jo tamasuak juo maasiakan Kopi Luwak (Kopi siso Musang).

Pers jo Media[suntiang | suntiang sumber]

TVRI Sumatera Barat

Ampia sadoalah saluran stasiun televisi nasional alah dapek manjangkau kawasan Sumatera Barat. Salain itu provinsi iko punyo juo babarapo stasiun televisi lokal, sarupo TVRI Sumatera Barat, Padang TV, Minang TV, TV E, Favorit TV jo Bukittinggi Televisi (BiTV).

Rato-rato di satiok kabupaten jo kota di provinsi iko alah punyo pamancar radio salain miliak pamarintah juo swasta, sarupo RRI Padang, Radio Classy FM, Radio Jelita FM, Radio SK FM, Radio Fanesa 5 FM jo sabagainyo.

Sumatera Barat juo banyak punyo media cetak jinih surek di antaronyo ANTARA (Kantor Berita Indonesia) Biro Sumbar,[26] Harian Padang Ekspres, Harian Haluan, Harian Singgalang jo lain-lain. Media cetak tasabuik juo tasadio jo dapek diakses sacaro online malalui internet.

Pado awalnyo Sumatera Courant marupoan koran partamo nan tabik di Sumatera Barat dek pamarintah Hindia-Balando pado tahun 1862. Salanjuiknyo tahun 1877 tabik Padangsche Handelsblad miliak swasta. Kaduo surek kaba iko manggunokan bahaso Balando, jo baru pado tahun 1890 tabik surek kaba bulanan Pelita Kecil nan alah manggunokan bahaso Melayu.[27]

Rujuakan[suntiang | suntiang sumber]

  1. ^ a b "Jumlah Penduduk Sumatera Barat". BPS Sumbar. http://sumbar.bps.go.id. Diakses pado 29 September 2010. 
  2. ^ Indonesia's Population: Ethnicity and Religion in a Changing Political Landscape. Institute of Southeast Asian Studies. 30 Agustus 2003. 
  3. ^ a b c d Asnan, Gusti (2007). Memikir ulang regionalisme: Sumatera Barat tahun 1950-an. Yayasan Obor Indonesia. ISBN 978-979-461-640-6. 
  4. ^ Amran, Rusli (1981). Sumatra Barat hingga Plakat Panjang. Penerbit Sinar Harapan. 
  5. ^ "Potensi Sektor Kelautan dan Perikanan Sumatera Barat". Dinas Kelautan dan Perikanan Sumatera Barat. http://dkp.sumbarprov.go.id/index.php?mod=profil&id=6. Diakses pado 16 Mai 2012. 
  6. ^ Sieh, K.; Natawidjaja, D. (2000). "Neotectonics of the Sumatran fault, Indonesia". Journal of Geophysical Research, 105 (B12). pp. 28, 295-28, dan 326. http://www.tectonics.caltech.edu/sumatra/downloads/papers/P00e.pdf. 
  7. ^ a b www.tempointeraktif.com Wajah Baru Bakal Dominasi DPRD Sumatera Barat. TempoInteraktif. Edisi 19-05-2009
  8. ^ Merekalah Yang akan Duduk di DPRD Sumbar.
  9. ^ politik.vivanews.com Hanura Ungguli PPP di DPRD Sumatera Barat. VivaNews. Edisi 19-05-2009.
  10. ^ Haris, Syamsuddin, 2005, Pemilu langsung di tengah oligarki partai: proses nominasi dan seleksi calon legislatif Pemilu 2004, Gramedia Pustaka Utama, ISBN 978-979-22-1695-0.
  11. ^ Marsden, William, (2009), The History of Sumatra, BiblioBazaar, ISBN 978-0-559-09304-3.
  12. ^ Arif, Mahmud, (2008), Pendidikan Islam Transformatif, PT LKiS Pelangi Aksara, ISBN 978-979-1283-40-3.
  13. ^ Asnan, Gusti, (2007), Memikir ulang regionalisme: Sumatera Barat tahun 1950-an, Yayasan Obor Indonesia, ISBN 978-979-461-640-6.
  14. ^ (Inggirih) Time for N. Maluku to become tourist destination. Antaranews. 8 Mei 2011. Diakses pada 21 November 2011.
  15. ^ travel.kompas.com Pacu "Kudo" Bangkitkan Pariwisata Lokal (diakses 28 Oktober 2010)
  16. ^ www.tourdesingkarak.com TdS (diakses pada 6 Juni 2011)
  17. ^ Phillips, Nigel, (1981), Sijobang: sung narrative poetry of West Sumatra, Cambridge University Press, ISBN 978-0-521-23737-6.
  18. ^ Pauka K., (1998), Theater and martial arts in West Sumatra: Randai and silek of the Minangkabau, Ohio University Press, ISBN 978-0-89680-205-6.
  19. ^ www.indosiar.com Sajian Tarian Khas Mentawai (diakses pada 25 juli 2010)
  20. ^ Graves, Elizabeth E., (2007), Asal-usul elite Minangkabau modern: respons terhadap kolonial Belanda abad XIX/XX, Jakarta:Yayasan Obor Indonesia, ISBN 978-979-461-661-1.
  21. ^ Azinar Sayuti, Rifai Abu, (1985), Sistem ekonomi tradisional sebagai perwujudan tanggapan aktif manusia terhadap lingkungan daerah Sumatera Barat, hlm. 202, Departemen Pendidikan dan Kebudayaan, Proyek Inventarisasi dan Dokumentasi Kebudayaan Daerah.
  22. ^ Navis, A.A., Cerita Rakyat dari Sumatera Barat 3, Grasindo, ISBN 979-759-551-X.
  23. ^ Mengenal Rumah Adat, Pakaian Adat, Tarian Adat, Dan Senjata Tradisional, PT Niaga Swadaya, ISBN 979-788-145-8.
  24. ^ Schefold R., (1991), Mainan bagi roh: kebudayaan Mentawai, PT Balai Pustaka, ISBN 979-407-274-5.
  25. ^ Ramli, Andriati, 2008, Masakan Padang: Populer & Lezat, Niaga Swadaya, ISBN 978-979-1477-09-3.
  26. ^ www.antara-sumbar.com Antara Sumbar
  27. ^ Syamdani, (2009), PRRI, pemberontakan atau bukan, Media Pressindo, ISBN 978-979-788-032-3