Rumah Gadang

Dari Wikipedia baso Minang, ensiklopedia bebas
Lompek ka: navigasi, cari
Rumah gadang nan ado di Nagari Pandai Sikek jo duo buah Rangkiang di mukonyo

Rumah Gadang adolah namo untuak rumah adaik Minangkabau nan banyak dijumpai di propinsi Sumatera Barat, Indonesia. Rumah iko bafungsi sabagai tampek tingga basamo jo tampek diadoannyo upacaro-upacaro adaik di Minangkabau.[1]. Salain di Sumatra Barat, rumah gadang dapek pulo dijumpai di Nagari Sambilan nan ado di Malaysia.

Indak sadoalah darek di Minangkabau buliah didirian rumah adaik iko, hanyo darek-darek nan alah bastatus nagari sajo Rumah Gadang buliah didirian, baitu pulo di rantau.

Fungsi[suntiang | suntiang sumber]

Rumah gadang model kini nan ado di Nagari Padang Laweh

Rumah Gadang bafungsi sabagai tampek tingga basamo, nan mampunyoi aturan-aturan jo tata krama. Jumlah kamar bagantuang jo jumlah padusi nan tingga di dalamnyo. Satiok padusi dalam kaum nan alah basuami mandapekan ciek kamar. Samantaro itu padusi nan alah gaek jo anak-anak mandapekan kamar di dakek dapua. Sadangkan gadih ramajo mandapekan kamar basamo di ujung Rumah Gadang.

Sadoalah bagian dalam Rumah Gadang marupoan ruangan lapeh kacuali kamar tidua. Bagian dalam tabagi dari lanjar jo ruang nan ditandoi dek tiang-tiang. Tiang nan babanjar dari muko ka lakang manandoi lanjar, sadangkan tiang nan babanjar dari kiri ka kanan manandoi ruang. Biasonyo ado duo atau tigo lanjar di Rumah Gadang, tagantuang jo gadang rumah. Sadangkan jumlah ruangnyo biasonyo ganjia, antaro tigo jo sabaleh.

Rumah Gadang biasonyo dibangun diateh tanah milik kaluargo induak dalam kaum sacaro turun tamurun [2], nan hanyo diwarihan dari padusi ka padusi dalam kaum [3]. Dilaman mukonyo, biasonya ado duo buah Rangkiang, nan digunoan untuak manyimpan padi. Ruang nan ado pado ujuang kanan jo ujuang kiri Rumah Gadang disabuik anjuang, nan bafungsi sabagai tampek pangantin jo tampek peangubekan kapalo adaik. Indak jauah dari tampek Rumah Gadang didirian, biasonyo dibangun ciek buah surau kaum, nan bafungsi sabagai tampek ibadah, tampek pandidiakan jo tempek tingga laki-laki dalam kaum nan alah gadang jo nan alun manikah.

Arsitektur[suntiang | suntiang sumber]

Arsitektur pado Rumah Gadang mampunyoi ciri khas nan babeda jo rumah adaik lain nan ado di Indonesia, tautamo bantuak puncak atoknyo nan runciang manyarupoi tanduak kabau. Dahulunyo atok Rumah Gadang dibuek dari bahan ijuak nan dapek tahan hinggo puluahan taun [3]. Rumah Gadang babantuak ampek pasegi panjang nan tadiri dari bagian muko jo bagian lakang. Bagian muko Rumah Gadang biasonya panuah jo ukiran nan umumnyo bamotif aka, bungo, daun jo bidang geometri [4]. Sadangkan bagian lakangnyo nan di lua dilapihi jo bambu.

Bangunan Rumah Gadang iko dibuek gadang ka ateh, namun indak mudah rabah dek guncangan [4]. Salain itu, satiok elemen dari Rumah Gadang mampunyoi makno tasaurang nan dilatari dek tambo nan ado dalam adaik jo budayo masyarakaik Minangkabau. Pado umumnyo Rumah Gadang mampunyoi ciek tangga nan talatak pado bagian muko. Samantaro itu, dapuanyo dibuek tapisah pado bagian lakang rumah nan didempetan jo dindiang.

Ukiran[suntiang | suntiang sumber]

Pado bagian dindiang Rumah Gadang dibuek dari papan, sadangkan bagian lakangnyo dibuek dari bambu. Papan dindiang dipasang vertikal, samantaro itu sadoalah papan nan manjadi dindiang jo manjadi bingkai diagiah ukiran, sahinggo saluruah dindiang manjadi panuah dek ukiran.

Pado dasanyo ukiran pado Rumah Gadang marupoan ragam hias pangisi bidang dalam bantuak garih malingka atau pasegi. Pado umumnyo, motifnyo adolah tumbuhan marambek, aka nan badaun, babungo jo babuah. Pola aka biasonyo babantuak lingkaan, aka bajajaran, bahimpikan, bajalinan jo sambuang manyambuang. Salain itu, cabang atau rantiang akanyo bakaluak ka lua, ka dalam, ka ateh jo ka bawah.

Rujuakan[suntiang | suntiang sumber]

  1. ^ Rumah Gadang Sumatera Barat Serba Unik Pado 11 Juli 2011.
  2. ^ Graves, Elizabeth E., (2007), Asal-usul elite Minangkabau modern: respons terhadap kolonial Belanda abad XIX/XX, Jakarta:Yayasan Obor Indonesia, ISBN 978-979-461-661-1.
  3. ^ a b Dawson, Barry; Gillow, John (1994), The Traditional Architecture of Indonesia, London: Thames and Hudson, ISBN 0-500-34132-X.
  4. ^ a b Navis, A.A., Cerita Rakyat dari Sumatera Barat 3, Grasindo, ISBN 979-759-551-X.