Salawat Dulang
Salawat dulang atau salawaik dulang adolah salah ciek sastra lisan Minangkabau nan batema Islam barupo patunjukkan duo urang nan mambacoan hafalan teks sarato diiriangi dek tabuahan dulang nan tabuek dari kuningan badiameter 65 cm. Kato salawaik dulang barasa dari kato "salawat" yang barati selawat kapado Nabi Muhammad SAW. dan kato "dulang" yang artinyo talam atau piriang gadang yang tabuek dari loyang atau logam yang biaso digunokan pado makan basamo. Salawaik dulang berupo pertunjukan duo urang yang mandendangan lagu-lagu atau syair-syair yang diiriangan jo tabuahan dulang. Dulang yang dipakai babantuak bulek dan badiameter sakitar 65 cm.[1]
Panamoan
[suntiang | suntiang sumber]Salawat Talam adolah namo lain dari Salawat Dulang. Pabedaan panamoan itu hanyo disababkan dek pabedaan dialek; bahwasanyo dalam dialek Payakumbuh jo Pariaman, kato dulang disabuik juo jo talam. Di Payakumbuah iko, khususnyo di daerah Koto Panjang, ado tukang salawat nan tadiri dari tigo urang tiok ciek grup. Di Pariaman, grup Salawat Talam dapek dijumpoi di Toboh jo Kampung Dalam.[2]
Sijarah
[suntiang | suntiang sumber]Manuruik informasi dari muluik ka muluik, sijarah salawat dulang iko bamulo dari banyaknyo ahli agamo Islam Minang nan baraja agamo ka Aceh, di antaronyo Syekh Burhanuddin. Baliau kamudian pulang kampuang ka ranah Minang nan kamudian manatap di Pariaman. Dari daerah tasabuik, ajaran Islam manyeba ka saluruah wilayah MInangkabau. Katiko badakwah, Syekh Burhanuddin taingek pado kasenian Aceh nan fungsinyo manghibua sakaligus dapek manyampaikan dakwah, yaitunyo rebana. Syekh Burhanuddin pun kamudian maambiak talam atau dulang nan biaso digunoan untuak makan jo manabuahnyo sambia mandendangkan syair-syair dakwah. Informasi lain manyabuikan bahwasanyo salawat dulang iko barasa dari Tanah Datar. Di siko salawat dulang dikambangkan dek kalompok Tarekat Syatariah sabagai salah ciek caro untuak mandiskusikan palajaran nan inyo tarimo. Mako karano itu, pasan nan tadapek dalam patunuakan salawat dulang ko cenderung barisi ajaran tasawuf.[3]
Patunjuakan
[suntiang | suntiang sumber]Dalam patunjuakan atau panampilan salawat dulang, duo padendang duduak basubalahan jo manabuah dulang sacaro basamoan. Kaduonyo dapek badendang basamoan atau saliang sambuang-manyambuang suaro dalam syair.[4] Padendang pado umumnyo laki-laki. Namun, kiniko tadapek pulo padendang-padendang padusi meskipun alum baitu dapek ditarimo dek masyarakat Minangkabau sacaro umum.[5]
Panampilan salawat dulang barupo tanyo jawab, saliang sarang, jo saliang mampatahankan diri sahinggo padendang kadang di agai julukan manuruik namo-namo sinjata, sarupo "peluru kendali" jo "gas baracun" nan hanyo dapek dilaksanakan apobilo padendang bajumlah saindaknyo duo urang.[4] Pambacoan hafalan teks badurasi antaro 25 hinggo 40 minik, biasonyo barisi tafsiran dari ayat Alquran atau hadits nan alah ditulis sabalumnyo. Sesi pambacoan ciek teks iko disabuik salabuahan (disabuik juo satanggak atau satunggak).[5]
Patunjuakan salawaik dulang biasonyo dilakuan dalam rangko memperingati hari-hari gadang agamo islam. Patunjuakan salawaik dulang iko diadokan di musajik-musajik atau surau-surau yang ado di sagalo nagari di Minangkabau. Patunjuakan salawaik dulang biasonyo dimulai sasudah sambayang isya. Sipek dari salawaik dulang ko adolah batanyo jawek atau saliang babaleh syair-syair atau kato-kato yang nyo baokan. Kaduo pamain salawaik dulang saliang mampatahankan dirinyo dalam babaleh syair-syair atau kato-kato.[1]
Rujuakan
[suntiang | suntiang sumber]- ↑ a b bpnbpadang (2015-06-15). "Salawat Dulang, Tradisi Lisan Minangkabau". Balai Pelestarian Nilai Budaya Sumatera Barat (dalam bahasa Inggris). Diarsipkan dari versi asli tanggal 2019-09-21. Diakses tanggal 2019-10-24.
- ↑ Amir, Adriyetti. Dkk (2006). Pemetaan Sastra Lisan Minangkabau. Padang: Andalas University Press. pp. 77. ISBN 979-1097-08-9.
- ↑ Eka,, Meigalia,. Salawat dulang : keberlanjutan dan pewarisannya. Padang. ISBN 9786028580892. OCLC 962337104. https://www.worldcat.org/oclc/962337104.
- ↑ a b Amir, Zuriati & Anwar 2006, hlm. 53.
- ↑ a b Amir, Zuriati & Anwar 2006, hlm. 54.