Dulang

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Dulang barisi makanan nan dijujuang sambia bajalan dek padusi di Arosuka, Kabupaten Solok

Dulang atau talam mamiliki arati sabagai baki babantuak lingkaran jo bibia randah nan tabuek dari kuningan. Ukuran dulang indak mampunyai ukuran baku, tapi sacaro umum dulang nan ado di Minangkabau mampunyai diameter 80-100 cm. Hampie sadoalah masyarakat Minangkabau mamakai dulang dalam satiok acara adat baik acara nan basipaik surang-surang atau alek nagari di daerah darek maupun di daerah pasisia atau daerah rantau.

Samo halnyo jo baki, dulang maliliki fungsi sabagai tampek malataan jo mambaok makanan, cuma nan mambedakan dulang hanyo dipakai pado acara-acara adat sajo, atau acara khusus dan indak dipakai tiok hari atau tiok ado tamu. Dikaranoan ukuran dulang labiah gadang dari baki, sahinggo makanan nan bisa ditampungnyo pun samakin banyak, karano itu untuk mambaok dulang harus dijujung dan katiko manaian sarato manuruanan biasonyo ditolongan dek 2-3 urang.

Salain itu, dulang juo manjadi tampek untuk makan basamo nan di sabuik jo bajamba, dek ukuran dulang nan cukuik gadang sahinggo ciek dulang dapek manampuang 4-7 urang.

Wadah[suntiang | suntiang sumber]

Sabagai wadah, dulang biaso dipakai wakatu acara-acara adat samisal panikahan jo batagak gala. Dulang dibaok dek nan datang nan dipakai untuk makan basamo. Pihak nan mambaok dulang adolah si tamu baik itu bako, pasumandan, ataupun bisan.

Dulang dibaok jo caro dijujung dek kaum padusi samisal para bisan atau dunsanak sasuku dari si tamu. Sabalun dinaiakan di ateh kapalo, kapalo labiah dahulu dialeh jo kain saruang atau kain pajang nan diguluang dan dibuek babatuak lingkaran. Tujuan dibuek aleh damikian untuk manjago kedudukan dulang bia saimbang wakatu dibaok bajalan. Katiko sampai di tampek alek, dulang akan disabuik oleh kaum padusi tuan rumah nan kamudian dilataan di muko pelaminan tampek anak daro jo marapulai basandiang, kok acaranyo acara pakawinan. Kok acranyo batagak gala atau alek nagari lain mako dulang biasonyo disusun surang-surang oleh si pambaok, biasonyo babantuak alur nan teratur sehinggo bilo wakatu makan tibo bisa dipakai dari dua sisi.

Alaik musik[suntiang | suntiang sumber]

Di babarapo daerah dulang indak sajo bafungsi sabagai tampek makanan tapi juo dipakai sabagai alat musik untuk mangiringi dendang. Tradisi iko disabauik jo salawaik talam. Tradisi tasabuik hanyo ado di daerah Pariaman. Partunjukan salawat dulang biasanya dilakukan dalam rangka mamparingati hari-hari gadang agamo Islam jo alek nagari. Partunjukan iko indak dilakuan di kadai (lapau) atau lapangan tabukak.[1]

Caro mamakai dulang nan dipakai untuk alat musik di taradisi lisan salawat dulang babeda jo dulang nan sabagai wajan atau baki. Dulang pada tradisisi iko lebih mirip dipakai sarupo rabano, karano pamakainyo duduak baselo mako sisi paling bawah dulang akan barado di ujuang kaki dan sisi paling ateh akan di tahan jo siku nan kamudian sisi belakang dulang akan dipukul menyusikan dengan ritme si pandendang. Pabedaan lainnyo dulang di tradisisi iko hanyo dipakai dek kaum laki-laki nan bajumlah duo urang.

Caliak pulo[suntiang | suntiang sumber]

Rujuakan[suntiang | suntiang sumber]

  1. bpnbpadang (2015-06-15). "Salawat Dulang, Tradisi Lisan Minangkabau". Balai Pelestarian Nilai Budaya Sumatera Barat (dalam bahasa Inggris). Diakses tanggal 2019-09-21.