Rumah Gadang Baanjuang Tanjung Raya
| Rumah Gadang Baanjuang (Nur Sutan Iskandar) | |
|---|---|
| Namo sasuai jo Sistem Registrasi Nasional Cagar Budaya | |
 | |
 Cagar budaya Indonesia | |
| Kategori | Bangunan |
| No. registrasi nasional | CB.615 |
| Lokasi | Agam, Sumatera Barat |
| Taun panatapan | 17 Oktober 2011 |
| Pamiliak | Keluarga Besar Rumah Gadang Baanjuang |
| Pangalola | BPCB Batusangkar |
| Koordinat geografi | 0°21′04″S 100°13′10″E / 0.3511915°S 100.2194123°E |
Rumah Gadang Baanjuang adolah ciek dari banyak objek wisata barupo bangunan Rumah Gadang, rumah adaik suku Minangkabau nan talatak di Kecamatan Tanjung Raya, Kabupaten Agam, Sumatra Barat. Bangunan iko tanamo juo jo namo Rumah Gadang Baanjuang Nur Sutan Iskandar karano rumah iko marupokan punyo kaluarga sastrawan Nur Sutan Iskandar, saurang sastrawan Angkatan Pujangga Baru jo Balai Pustaka. Rumah iko kini dipaliharo dek ahli warisnyo nan banamo Ibu Romlah, adiak bungsu Sutan Iskandar dari lain ibu. Bangunan iko alah dimasuakkan ka dalam situs cagar budaya Indonesia malalui SK Menteri NoPM.86/PW.007/MKP/2011 kategori Benda Cagar Budaya tahun 2011 jo nomor Registrasi Nasional RNCB.20111017.02.000615. Kini ko bagunan ko dikelola dek BP3 Batusangkar.[1][2]
Lokasi[suntiang | suntiang sumber]
Rumah Gadang Baanjuang iko talatak di komplek pasar Nagari Sungai Batang, Kecamatan Tanjung Raya, Kabupaten Agam, Sumatra Barat. Lokasinyo indak baitu jauah dari lokasi situs cagar budaya lainnyo yaitu Museum Rumah Kalahiran Buya Hamka, rumah kalahiran Buya Hamka. Di sabalah Rumah Gadang Baanjuang, ado pulo Rumah Baca Nur Sutan Iskandar, bangunan nan didirikan dek Dinas Pariwisata Kabupaten Agam pado tahun 2006 nan manyimpan babarapo karya populer Balai Pustaka, utamanyo karya dari Nur Sutan Iskandar.[3][4]
Karakteristik[suntiang | suntiang sumber]
Diliek dari sisi arsitekturnyo, rumah gadang iko cukuik unik karano mamiliki pabedaan nan agak mancolok bantuak rumah gadang pado umumnyo. Biasonyo bagian sampiang suok jo kida dari rumah gadang babantuak luruih, tapi Rumah Gadang Baanjuang iko pado bagian samping suok jo kidanyo maleba saolah-olah mambantuak teras sampiang, di mano teras sampiang ikolah nan marupokan anjuang. Salain itu, biasonyo lantai bagian anjuang labih tinggi, tapi rumah gadang iko lantainyo rato atau pamukaannyo samo jo lantai pado bagian utamo.[5]
Rumah iko tabagi manjadi duo ruangan, yaitu ruangan utamo jo ruangan lalok. Ruangan utamo marupokan ruangan tabukak nan baukuran 5 x 12,6 m, jadi sagalo kagiatan nan dilakukan salain di biliak lalok bisa nampak dkatiko mamasuki ruang utamo. Samantaro ruangan lalok, sasuai namonyo adolah ruangan nan fungsi utamonyo sabagai biliak lalok, di mana biliak partamo marupokan biliak untuak kaluarga inti samantaro biliak lainnyo marupokan biliak tamu untuak karabaik nan datang dari luar daerah.[5][2]
Kondisi terkini[suntiang | suntiang sumber]
Meskipun manjadi ciek dari banyak benda cagar budaya, daya tarik Rumah Gadang Baanjuang iko masih kalah dibandingkan jo objek wisata lain takah Danau Maninjau jo Museum Rumah Kalahiran Buya Hamka. Iko dikaranokan pangalolaan sarato parawatan nan kurang mandapekan parhatian baiak dari pamarintah maupun masarakaik sakitar.[3]
Biasonyo, komplek cagar budaya Nur Sutan Iskandar, tarutamo Rumah Baca ramai dikunjungi pelajar jo mahasiswa dari babagai daerah, karano kayo bahan bacaan. Namun babarapo tahun balakangan, pelajar samakin saketek mangunjungi Rumah Baca paninggalan panulih jo pujangga nasional asa dari Danau Maninjau ko.[3]
Ciek dari banyak pangalola rumah baca sakaligus kaponakan dari almarhum Nur Sutan Iskandar, Jusni manyabuikkan bahsonyo inyo sangaik prihatin dek saketek bana minat baco pelajar kini ko. Saharusnyo, untuak mandapekkan ilmu, dibutuahkan bahan bacaan sabagai referensi jo wawasan. Padahal papustakaan tu manyadiokan buku bacaan nan sangaik kayo jo ilmu pangatahuan. Bahkan ado buku karangan sastrawan asa dari Balando jo Inggris nan manjadi koleksi nan langka.[3]
Jusni baharok pulo kapado pamarintah daerah untuak manambah buku-buku lainnyo, sahinggo bahan bacaan samakin manarik minat baco generasi panaruih, khususnyo di Kecamatan Tanjung Raya Maninjau. Indak hanyo itu, inyo baharok pulo supayo komplek dari mandiang mamaknyo tu baliak diminati sarato mampu manariak pangunjuang untuak tibo bukan sakadar untuak mambaco. Manuruiknyo kini ko bahan bacaan samakin manipih karano banyak pangunjuang nan maminjam jo acok dibaok tanpa sapangatahuan panjago atau pangalola. Kamudian untuak mangatasi hal tu, pangalola ka mampaketat pangunjuang, tarutamo nan suko maminjam jo mambaok buku kalua dari Rumah Baca. Mereka baharok pulo ka Pamarintah Daerah maupun donator lainnyo untuak manambahkan buku-buku nan bisa manarik pelajar mambaco buku di Rumah Baca Nur Sutan Iskandar.[3]
Baiak Rumah Baca maupun Rumah Gadang Baanjuang nan barado dalam satu komplek ko butuah paharatian labiah dari masarakaik sakaliliang, supayo bisa manjadi ciek dari banyak objek wisata nan diparatian pulo karano mangana potensi nan diagiah dek situs cagar budaya iko masih layak untuak dikambangkan labiah ancak.
Referensi[suntiang | suntiang sumber]
- ↑ "Rumah Gadang Baanjuang ( Nur Sutan Iskandar ) - Sistem Registrasi Nasional Cagar Budaya". cagarbudaya.kemdikbud.go.id. Diarsipkan dari versi asli tanggal 2021-05-24. Diakses tanggal 2021-06-14.
- ↑ a b "Museum Rumah Adat Baanjuang". asosiasimuseumindonesia.org. Diakses tanggal 2021-06-14.
- ↑ a b c d e Prokabar: Nur Sutan Iskandar dan Potret Rumah Baca di Nagari Sungai Batang Archived 2021-06-14 di Wayback Machine.. 30 Juli 2018. Diakses 14 Juni 2021.
- ↑ Wonderful Minangkabau: Wisata Sumbar
- ↑ a b BPCB Sumatra Barat: Rumah Gadang Baanjuang Tanjung Raya Agam Archived 2021-06-14 di Wayback Machine.. 20 November 2017. Diakses 14 Juni 2021.
Pranala luar[suntiang | suntiang sumber]
- (Indonesia) Cagar Budaya oleh Kemdikbud: Rumah Gadang Baanjuang (Nur Sutan Iskandar) Archived 2019-02-20 di Wayback Machine.
- (Indonesia) Cagar Budaya Kabupaten Agam Sumatra Barat oleh Kemdikbud Archived 2021-06-14 di Wayback Machine.