Portal:Minangkabau/Pembuka
|
Minangkabau atau biaso basingkek Minang adolah kalompok etnis asli Nusantara nan wilayah panyobaran kabudayoannyo maliputi kawasan nan kini masuak ka dalam propinsi Sumatra Barat (kacuali Kapulauan Mentawai), saparuah daratan Riau, bagian utaro Bengkulu, bagian barat Jambi, pasisia barat Sumatra Utaro, barat dayo Aceh, dan Nagari Sambilan, Malaysia. Pado pambicaroan urang awam, orang Minang salalu disamoan sabagai urang Padang, marujuak kapado namo ibu kota propinsi Sumatra Barat iyolah Padang. Tapi, masyarakat iko biasonyo manyabuik kalompoknyo dangan sabutan urang awak, nan bamaksuik samo jo urang Minang tu sandiri.
Manuruik A.A. Navis, Minangkabau labiah kapado kultur etnis dari suatu rumpun Melayu baragamo Islam nan tumbuah dan godang basobok sistem monarki saroto manganuik sistem adat nan khas. Masyarakat iko alah manarapkan sistem proto-demokrasi sojak maso pra-Hindu dangan tradisi musyawarah dan adonyo Karapatan Adat Nagari untuak manantuan parmasalahan hukum ataupun hal-hal pantiang lainnyo. Prinsip adaik Minangkabau tatuang singkek dalam parnyatoan Adat basandi syarak, syarak basandi Kitabullah (Al-Qur'an), nan bâaroti adaik balandaskan ajaran Islam. Kini masyarakaik Minang marupoan masyarakaik panganuik matrilineal tabosegh di dunia walaupun budayonyo sandiri sangek kuek diwarnoi ajaran agamo Islam.
Masyarakaik Minangkabau sangek manonjol di bidang parniagaan, sabagai profesional, dan intelektual. Inyo marupoan pawarih tarhormat dari tradisi tuo Karajaan Malayu, Sriwijaya jo Kaisar Uda nan gemar manggaleh dan dinamis. Thomas Stamford Raffles, alah malakuan ekspedisi ka pusek Karajaan Pagaruyuang di padalaman Minangkabau, mancatat, Minangkabau iyolah sumber kakuatan dan asa bangso Melayu, nan kudian panduduaknyo tasobar loweh di Kapulauan Timua. Hampir saparuah jumlah kasaluruahan anggota masyarakaik iko barado dalam parantauan dan pado umumnyo inyo bamukim di kota-kota bosegh, ajak Jakarta, Bandung, Pekanbaru, Medan, Batam, Palembang, dan Surabaya. Di lua wilayah Indonesia, etnis Minang banyak tadapek di Kuala Lumpur, Seremban, Singapura, Jeddah, Manchester, London, Sydney, dan Melbourne.