Pandemi Covid-19 di Britania Raya

Pandemi Koronavirus di Britania Raya

Panyakik	COVID-19
Virus strain	SARS-CoV-2
Lokasi	Inggris
Kasus partamo	York, North Yorkshire
Tangga mulo	31 Januari 2020 (4 years, 10 months, 4 weeks and 2 days)
Asa	Wuhan, Hubei, Tiongkok
Kasus takonfirmasi	78,991
Cegak	79
Maningga	9,875
Situs resmi
'Coronavirus (COVID-19): latest information and advice' at www.gov.uk

Pandemi koronavirus 2019 di Britania Raya bamulo pado tanggal 31 Januari 2020 katiko ado urang Cino nan bamalam di sabuah hotel di York.

Pandemi koronavirus 2019 sandiri adolah pandemi nan tajadi dek koronavirus 2019 (COVID-19) nan marusak sistem barangok. Organisasi Kasihatan Dunie (WHO) nan kudian manyatokan pandemi koronavirus 2019 sabagai pandemi dunie pado tanggal 11 Maret 2020.

Alua kajadian

Januari 2020

Kasus infeksi koronavirus 2019 patamo di Inggirih dialami dek duo urang Cino nan bamalam di sabuah hotel di York. Sasudah dinyatokan positif tajangkik koronavirus 2019 pado tanggal 31 Januari 2020. Duo urang Cino ko kudian hari dipindahkan dari Hull University Teaching Hospital ka fasilitas isolasi di High Consequence Infectious Diseases Unit di Newcastle upon Tyne.

Pado hari itu juo, misi panyalamaikan urang Inggirih dari Wuhan alah sampai ka RAF Brize Norton. Dari 83 urang nan disalamaikan indak manunjuakkan tado-tando infeksi, tapi kasodalahnyo dikarantina di sabuah blok parumahan karyawan Arrowe Park Hospital di Wirral.

Proses panyalamaikan iko mandapek banyak reaksi jo malalui proses panjang sabalunnyo apokah pamarintah harus manyalamaikkan urang Inggirih dari daerah nan paliang tadampak sajo di Cino atau indak samo sakali untuak mahalau datangnyo koronavirus 2019 di Inggirih. Emily Thornberry dari Partai Buruh mangaritik pamarintahan Boris Johnson nan takasan lambek dalam manantuan sikap untuak urang Inggirih di Cino, indak takah nagari lain nan labiah dahulu jo labiah siap mamulangkan urangnyo dari derah tadampak takah pamarintah Japang, Parancih, jo Spanyol. Urang-urang Inggirih di Wuhan diagiah kaba jikok inyo dapek disalamaikkan, namun pasangan atau anak-anak nan bapaspor Cino indak bisa, rancano iko dibatalkan dek masih ado urang Inggirih nan tatingga dek kabijakan iko.

Februari 2020

Sapanjang bulan Februari, koronavirus 2019 makin banyak kasusnyo di Inggirih. Kasus koronavirus 2019 katigo dikonfirmasi di Brihgton pado 6 Februari, apak-apak ko tajangkik dalam pajalannyo ka Singapua. Sabalun sampai di Inggirih, pado 28 Januari, inyo sempat juo datang ka Haute-Savoie, Parancih nan mambuek inyo manulari 6 urang lainnyo dalam kunjuangan ka Parancih jo sakaliguih manjadi kasus infeksi koronavirus 2019 patamo nan dialami dek urang Inggirih.

Sasudah kasus iko, pamarintah Inggirih mauimbau urangnyo untuak baliak dari Cino, Japang, Hong Kong, Makau, Malaysia, Korea Salatan, Singapua, Taiwan jo Thailand jo tando-tando takah damam, batuak, jo gangguan sistem barangok, untuak maisolasi diri surang salamo 14 hari jo mahubungi nomor non-darurat palayanan kasihatan 111.

Pado tanggal 10 Februari, kasus positif koronavirus 2019 batambah manjadi 8 kasus di Inggirih nan dikonfirmasi masih bahubuangan jo pasien di Brighton. Pado hari itu juo, sekretaris State for Health and Social Care mangumumkan Regulasi Proteksi Kasihatan 2020 nan isinyo maagiah wewenang ka patugas kasihatan untuak mangisolasi urang nan tajangkik maumun nan barisiko tinggi tainfeksi. Aturan iko juo manjadikan Arrowe Park Hospital, Merseyside, Hotel Kents Hill Park, dan Milton Keynes manjadi unit isolasi. Sahari kudian, kasus kasambilan din Inggirih sakaligus kasus patamo di London dikonfirmasi.

Pado tanggal 23 Februari, kasus di Inggirih batambah manjadi 13 kasus aktif nan sairiang dikatahuinyo 4 urang Inggirih nan tainfeksi di kapa Diamond Princess nan dikarantina di Japang, duo urang pasien kudian dipindahan ka Royal Hallamshire Hospital di Sheffield, ciek urang di Royal Liverpool University Hospital, jo salah surang lainnyo di Royal Victoria Infirmary Newcastle upon Tyne.

Pado tanggal 27 Februari, kasus di Inggirih batambah manjadi 16 urang sakaligih mangonfirmasi kasus patamo di Irlandia Utara, saurang wanita nan baru baliak dari wilayah Italia utara.

Wales maumuman kasus patamo pado tanggal 28 Februari dari saurang nan juo tainfeksi dari pajalanan dari Italia Utara. Pado hari nan samo, 2 kasus baru diidenfitikasi dari salah surang pasien nan jadi kasus ka 20 di Inggirih, iko marupokan kasus patamo infeksi walau indak ado ka lua nagari.

Pamarintah Inggirih kudian mambalakukan uji masal pado 10.483 urang dan mangonfirmasi 3 kasus baru dari uji pado tanggal 29 Februari, katigonyo barasa dari Gloucestershire, Hertfordshire, dan Berkshire. Panalusuran manamukan duo urang tainfeksi dari pajalanan di Italia jo surang lai dari pajalanan di Asia.