Musajik Wadi Al-Husein

Musajik Wadi Al-Husen nan barado di Thailand, labiah tapeknyo di propinsi Narathiwat, Thailand bagian salatan. Musajik kayu nan tamasuak tuo di Thailand.

'
Latak	Narathiwat Thailand
Afiliasi agamo	Islam
Status fungsi	Aktif/Masih dipakai
Deskripsi arsitektur
Jinih arsitektur	Musajik
Gaya arsitektur	Malay
Tahun salasai	1634

Musajik Wadi Al-Husen, atau Musajik 300 tahun, atau Musajik Talo Mano adolah salah satu musajik tuo nan barado di negara Thailand. Musajik ko labiah tapeknyo barado di Propinsi Narathiwat, Thailand bagian salatan. Musajik iko dipakai dek komunitas muslim nan barado di daerah tasabuik. Musajik Wadi Al-Husein iko dibangun pado tahun 1634 nan diparuntuakan untuak baribadah dek umaik muslim nan ado disinan katiko itu. Musajik iko marupoan musajik kayu tatuo nan barado di negara Thailand.

Sijarah

Musajik iko dibangun pado maso karajaan Pattani nan katiko itu di pimping dek saurang Sultan. Panduduak daerah tasabuik baragamo islam jo baragamo Budha. Pado tahun 1634, panduduak nan baragamo Islam jo baragamo Budha sacaro bagotong-royong mambangun musajik iko. Manuruik carito nan bakambang di masyarakaik satampek, pado dahulunyo katiko tajadi parang antaro karajaan Siam jo karajaan Pattani, ado saurang anak gadih padusi nan barasa dari karajaan Pattani nan lari dari parang tasabuik. Anak padusi tasabuik lari sarato mambawo sabuah Aiquran. Dalam palariannyo, anak padusi tasabuik tajatuah kadalam jurang nan kamudian disalamaikan dek urang kampuang dakek situ. Urang-urang nan manyalamaikannyo kamudian takajuik karano anak padusi tasabuik mambawo sabuah Alquran. Masyarakaik satampek akhianyo mambuek kaputusan jikalau parang alah salasai mako akan dibangun sabuah musajik. Carito lain nan mancaritoan bahwasanyo musajik iko dibangun dek Wan Husein Az-Sanawi, saurang guru nan datang ka Karajaan Pattani, pado tahun 1624. Di dalam musajik tasabauik kiniko tasimpan sabuah surek rencana pambangunan musajik samo jo sabuah Alquran nan ditulis tangan katiko itu.

Arsitektur

Musajik Wadi Al-Husein ko manggabuangan babarapo bantuak arsitektur dari negara Cino, Thailand, jo Melayu. Musajik ko dibangun jo babahan kayu, nan kayunyo barasa dari batang kayu kolibri jo batang kayu ulin. Untuak manyambuangan antaro kayu-kayu tasabuik mako digunoan pasak kayu karano katiko itu alum ado paku. Pado mulonyo bana atok dari musajik ko tabuek dari daun batang palam, namun kamudian di ganti jo ubin terakota. Musajik iko tadiri ateh duo bangunan. Bangunan nan labiah ketek adolah tampek mihrab nan atoknyo punyo tigo tingkek. Iko marupoan juo tampek manara nan bagaya Cino barado. Bangunan nan labiah gadang punyo labiah banyak pangaruah dari arsitektur Thailand nan atoknyo pelana bagaya Thailand. Dindiang kaduo bangunan tasabuik punyo desain jo pola Thailand, Cino, Melayu.

Kagiatan Kaagamoan

Kagiatan-kagiatan kaagamaan umaik islam banyak diadoan di musajik iko. Salain untuak baribadah, musajik iko baguno pulo sabagai pusek kagiatan komunitas muslim satampek. Musajik ko punyo hubungan baiak jo karajaan demak di Indonesia, nan mano katiko itu musajik tasabuik pernah di kunjuangi dek sultan demak jo sultan Palembang.

Pamugaran

Musajik Wadi Al-Husein atau musajik 300 tahun pernah mandapek dana untuak marenovasi musajik sabanyak 200 juta bath Thailand dari pamarintah Thailand pado tahun 2014. Kagiatan tasabuik dilaksanaan dek Pusek Administrasi Propinsi Pabatasan Salatan Thailand. Renovasi iko maliputi renovasi musajik, mampalaweh halaman sakitarnyo, jo manambahan fungsi musajik manjadi pusek komunitas. Renovasi musajik jo diharapkan untuak dapek mandatangan banyak wisatawan ka musajik 300 tahun ko.