Musajik Saadah
Musajik Saadah atau Musajik As-Saadah adolah salah satu musajik tatuo di Indonesia nan talatak di Nagari Gurun, Kecamatan Sungai Tarab, Kabupaten Tanah Datar, Sumatra Barat. Musajik nan mulai digunoan pado taun 1917 ko dibangun pado taun 1910 jo arsitektur nan manyarupoi Masjid Rao Rao di Nagari Rao Rao, Sungai Tarab saketek.
Kini ko, salain digunoan untuak aktivitas ibadah umaik Islam, musajik ko digunoan pulo sabagai sarano pandidikan agamo bagi masyarakaik sakitar. Musajik ko alah ditetapan dek Menteri Kebudayaan dan Pariwisata Indonesia sabagai benda cagar budayo basamo babarapo musajik tuo lain di Sumatra Barat, takah Masjid Bingkudu di Canduang Koto Laweh, Masjid Rao Rao, dan Masjid Raya Ganting di Padang.[1]
Sajarah
[suntiang | suntiang sumber]Musajik ko dibangun sakitar taun 1910 dan mulai digunoan pado taun 1917. Sabelum musajik ko dibangun, di tampek nan samo sebalumnyo alah tagak sabuah musajik nan bangunannyo masih tabuek dari kayu. Namo musajik ko, nan dalam bahasa Arab bararti berbahagia, diagiah dek salah saurang ulama satampek, yakni H. Ramli Bakar. Pado awalnyo, pambangunan musajik ko didonaturi dek tokoh masyarakaik satampek, iyolah Ismail Datuk Paduko Intan jo malibatan saurang Tionghoa asa Padang sabagai arsitek.[2]
Arsitektur
[suntiang | suntiang sumber]
Bangunan utamo musajik marupoan ruang sumbayang badenah bujua sangka. Lantainyo masih barupo lantai semen biaso,samantaro itu lantai di bagian teras atau sarambinyo alah diganti jo lantai keramik bawarna putiah. Di dalam ruangan, tadapek ampek tiang utamo sabagai panopang atok jo panyanggo nan indak manggunoan basi, malainkan hanyo manggunoan bambu. Menuruik masyarakaik satampek, jumlah tiang nan ampek ko marupoan palambangan kato dalam adat Minangkabau, iyolah kato melereang, kato mandata, kato mandaki, jo kato manurun.[2]
Sarupo arsitektur musajik khas Minangkabau lainnyo, atok musajik ko tadiri babarapo tingkek nan agak cakuang saketek, hanyo sajo di tingkatan atok tarateh tadapek ruang babantuak persegi nan dimahkotai dek ampek atok bagonjong; ruangan nan samo tu tadapek pulo di atok bagian fasad. Manuruik masyarakaik satampek, atok tasabuik basusun limo sabagai bantuak perlambangan limo suku pado wakatu itu, iyolah Koto, Piliang, Bendang, Koto Anyiah, dan Pitopang.[3]
Sacaro kasaluruhan arsitektur pado musajik ko saketek manyarupoi arsitektur Masjid Rao Rao di Nagari Rao Rao, Sungai Tarab. Dalam pidato paringatan 100 taun Masjid Rao Rao pado taun 2008, Shodiq Pasadigoe, Bupati Tanah Datar wakatu itu menyabuikan bahwa musajik ko memang diminta dibangun sarupo jo Musajik Rao Rao.[4][5]
Rujukan
[suntiang | suntiang sumber]- Catatan kaki
- ↑ Permenbudpar PM.05/PW.007/MKP/2010.
- ↑ a b Ajisman & Almaizon 2004, hlm. 49.
- ↑ Ajisman & Almaizon 2004, hlm. 50.
- ↑ Kementerian Agama, hlm. 2.
- ↑ Arief 2008.
- Daftar pustaka
- Ajisman; Almaizon (2004). Iim Imadudin. ed. Bangunan Bersejarah di Kabupaten Tanah Datar. Balai Kajian Sejarah dan Nilai Tradisional Padang. ISBN 979-938-849-X.
- "Peraturan Menteri Kebudayaan dan Pariwisata Nomor PM.05/PW.007/MKP/2010 Tahun 2010". Menteri Kebudayaan dan Pariwisata Indonesia. 18 Nopember 2010..
- Arief, Farid N. (2008). "Refleksi 100 Tahun Masjid Rao-Rao". Kementerian Agama Indonesia. Diarsipkan dari versi asli tanggal 2014-11-02. Diakses tanggal 2013-01-08.
- Kementerian Agama Indonesia (PDF). Serial Rumah Ibadah Bersejarah: Masjid Raya Rao-Rao. http://www.kemenag.go.id/file/dokumen/Raorao.pdf. Diakses pado 8 Januari 2013.
