Musajik Rao Rao

Dari Wikipedia baso Minang, ensiklopedia bebas
Loncat ke navigasi Loncat ke pencarian
Musajik Rao Rao
Masjid Rao Rao, Tanah Datar, Sumatra Barat.jpg

Musajik Rao Rao pado Oktober 2008

Latak Nagari Rao Rao, Kecamatan Sungai Tarab, Kabupaten Tanah Datar, Sumatera Barat, Indonesia
Afiliasi agamo Islam
Deskripsi arsitektur
Jinih arsitektur Musajik
Gaya arsitektur Minangkabau
Pambukoan tanah 1908
Tahun salasai 1918
Spesifikasi
Minaro 1

Musajik Rao Rao adolah salah satu musajik tatuo di Indonesia nan talatak di Nagari Rao Rao, Kecamatan Sungai Tarab, Kabupaten Tanah Datar, Sumatera Barat.[1] Musajik nan mamadukan arsitektur Minangkabau jo Persia ko mulai dibangun pado tahun 1908 jo atok babahan ijuak sabalun akianyo diganti manjadi seng.[2]

Sajak didirikan, musajik ko alah panah mangalami karusakan nan cukuik banyak dek gampo pado tahun 1926 jo tarakia 2009.[3][4] Namun sajak dibangun, musajik ko alun panah dipugar sacaro total. Renovasi nan panah dilakukan anyo barupo paluruihan minaro nan miriang pado tahun 1975 jo panggantian saluruah keramik lamo jo nan baru sakitar tahun 1990-an.[5][6]

Kini ko, salain digunokan untuak aktivitas ibadah umaik Islam, musajik ciek lantai ko digunokan juo sabagai sarana pendidikan agamo. Mulonyo, musajik ko taleso pulo dijadikan tampek panyusunan strategi pajuangan malawan panjajahan Ulando.[3][1]

Sijarah[suntiang | suntiang sumber]

Musajik Rao Rao talatak di jalan arah dari Batusangkar manuju Bukittinggi, tapeknyo di Nagari Rao Rao, Kecamatan Sungai Tarab, Kabupaten Tanah Datar, Sumatera Barat.[2] Musajik ko mulai dibangun pado tahun 1908,[7] sabagai pangganti Musajik Atok Ijuak di Rao Rao nan dibongka dek karano kondisi bangunannyo alah indak layak.[8] Di tanah wakaf H. Mohammad Thaib Caniago, musajik ko dibangun sacaro basamo dek masyarakaik Nagari Rao Rao ateh usulan Abdurrachman Datuak Majo Indo.[9] Pado akia tahun 1918, pambangunan musajik ko dapek disalasaian.[3]

Arsitektur[suntiang | suntiang sumber]

Musajik Rao Rao, 1900-an

Arsitektur pado musajik ko marupokan papaduan dari baragam corak, umumnyo yaitu Persia jo Minangkabau. Bak cando arsitektur musajik khas Minangkabau lainnyo, atok musajik ko tadiri dari ampek tingkek nan agak mancakuang, hanyo sajo di atok tingkek paliang ateh ado ruang babantuak persegi jo ampek atek bagonjong mangarah ka ampek panjuru mato angin, samantaro pado bagian minaronyo ado ruang babantuak segidalapan baratokkan gobah.[3][8]

Di dalam ruang sumbayang batagak ampek tiang utamo nan tabuek dari beton.[3] Di bagian mihrab musajik nan baru dibuek mimbar permanen pado tahun 1930, dihiasi hiasan barupo pacahan kaco keramik. Mimbar tasabuik barukuran 3 × 1,38 meter jo tinggi 3,1 meter.[3]

Dalam paringatan 100 tahun Musajik Rao Rao pado Oktober 2008, Shodiq Pasadigoe, Bupati Tanah Datar wakatu tu mangecekan, ado duo musajik lain di saluruah Sumatera Barat nan mirip jo musajik ko karano memang dimintak dibangun sarupo,[5][1] yakni Musajik Saadah nan lataknyo di Sungai Tarab, Kabupaten Tanah Datar juo tapeknyo di Nagari Gurun jo Musajik Raya Koto Baru di Sungai Pagu, Kabupaten Solok Selatan.[10]

Bangunan lain[suntiang | suntiang sumber]

Di sabalah kida musajik ko tagak sabuah bangunan balantai duo barukuran 7 × 10 m. Bangunan nan disabuik "Markaz" tu salasai dibangun pado tahun 2001. Samantaro itu di sabelah suok musajik ko juo tagak sabuah bangunan nan dipakai sabagai sikolah agamo, nan sajak tahun 1982 baganti namo manjadi "Darul Huda" (sabalunnyo Madrasah Islamiyah).[5]

Rujuakan[suntiang | suntiang sumber]

Catatan kaki

Pautan lua[suntiang | suntiang sumber]