Musajik Rayo Limo Kaum

Musajik Rayo Limo Kaum pado Februari 2020

Musajik Raya Limo Kaum adolah salah satu musajik paliang tuo di Indonesia nan juo cagar budayo nan talatak di Nagari Lima Kaum, Kecamatan Lima Kaum, Kabupaten Tanah Datar, Sumatra Barat.

Musajik ko patamo kali dibangun wakatu patangahan abaik ka-17, samantaro musajik nan tagak kini ko dibangun kamudian, yaitunyo taun 1710. Sasuai jo namonyo musajik ko lataknyo persis di tangah-tangah Nagari Limo Kaum, yaitunyo di Balai Sariak, Jorong Tigo Tumpuak, kurang labiah 20 minik dari jalan ka arah Batusangkar manuju Padang.

Pado taun 2010, musajik ko ditetapkan dek Menteri Kebudayaan dan Pariwisata Indonesia sabagai cagar budaya, basamo jo musajik-musajik lainnyo di Sumatra Barat, saroman Masjid Bingkudu di Nagari Canduang Koto Laweh, Musajik Rao Rao di Nagari Rao Rao, dan Musajik Raya Ganting di Kota Padang.

Sijarah

Indak tahu pasti taun bara sabananyo musajik ko didirian, tapi asa mulo adonyo musajik ko barawal dari musajik di Nagari Limo Kaum nan didirian pado patangahan abaik ka-17, manyusul masuaknyo Islam ka Dataran Tinggi Minangkabau. Musajik itu lataknyo di Jorong Balai Batu dan masih babantuak bangunan baalehan batu indak badindiang ataupun atok, dalam bahaso Minangkabau disabuik baaleh batu, badindiang angin, baatok langik. Kiro-kiro 25 taun kamudian dibangun musajik pangganti di Jorong Tigo Tumpuak, nan kabaradoannyo indak batahan lamo, sakitar 35 taun dek kapasitas musajik indak memadai. Basamo masyarakaik, taun 1710, di ateh lokasi pagoda nan alah lamo ditinggaan penganutnyo dek masuak Islam, dibangunlah musajik nan kini dikenal sabagai Musajik Raya Limo Kaum.

Pembangunan musaijik ko dikarajoan basamo-samo dek masyarakaik satampek. Bangunannyo tabuek dari kayu jo papan, mulai dari dindiang sampai tiang, samantaro atok nan samulo tabuek dari ijuak, kini diganti jo seng. Dalam pakambangan salanjuiknyo. musajik ko alah babarapo kali dipelokan nan dikarajoan sacaro swadaya, tamasuak perbaikan jo palebaran mihrab, pembuatan surambi, perbaikan, dan pamasangan kaco jendela, panggantian bilah-bilah papan nan alah rapuah, dan pembuatan loteng.

Arsitektur

Musajik Raya Limo Kaum didirian jauah sabalun Balando masuak ka Minangkabau, sahinggo indak ado pangaruah arsitektur Barat atau Balando ka bangunan musajik ko. Arsitektur musajik ko umumnyo dipangaruahi corak Minangkabau dan bantuak atok marupokan sinkretisme antaro Hindu-Budha jo Islam. Musajik ko berdiri di ateh tanah segi-ampek, menggantian bangunan pagoda nan alah lamo ditinggaan penganutnyo dek mamaluak Islam. Atok musajik ko dibuek baundak-undak sabanyak limo tingkek jo permukaan atok nan indak data atau cekung; cocok untuak daerah baiklim tropis sarupo Minangkabau karano dapek labiah capek mangaliran aia hujan ka bawah. Antaro tingkatan atok nan ciek samo nan lainnyo ado celah untuak pancahayaan, samantaro di tingkek paliang ateh ado bangunan (puncak) badenah segidelapan nan punyo babarapo jendela kaco jo atok babantuak limas; dari ateh bangunan ko dapek mancaliak bangunan rumah-rumah panduduak di sakitaran musajik jo kota Batusangka.

Ruang utamo

Di ruang utamo nan bafungsi sabagai ruang sumbayang, ado tiang-tiang nan tabuek dari kayu jo tiang utamo badiameter 75 cm jo tinggi mancapai 55m; kayu nan digunoan dikumpuaan basamo-samo dek masyarakaik satampek salamo kiro-kiro satahun dari Bukik Sangkiang sampai Bukik Dadieh Talago Gunuang . Tiang utamo ditutuik jo tripleks, sahinggo mambantuak segidelapan nan di dalamnyo ado tangga naiak ka bagian puncak nan babantuak spiral atau malingka ka arah kiri.

Di bagian dindiang di ruang utamo ado babarapo jendela di satiok sisi, yaitunyo sisi utara jo selatan ditambah ampek di sisi barat jo timur. Dindiang itu barupo papan, baitu pulo jo lantai; kacuali lantai di bagian mihrab nan alah diganti jo keramik. Walaupun alah babarapo kali mangalami perbaikan, dindiang jo lantainyo sampai kinii masih tabuek dari papan, baitu pulo jo tiang nan masih tabuek dari kayu. Di bagian timur sabalah selatan ruang utamo tadapek bedug atau disabuik juo tabuah dalam bahaso Minangkabau nan tabuek dari pohon karambia badiameter dari ujuang ka ujuang 27 cm sampai 60 cm dan panjang 220 cm.

Surambi

Di sabalah timur atau di bagian muko ado surambi barupo ruangan nan tatutuik dindiang jo kaco jo pondasi nan tabuek dari beton dan punto pintu masuak dari utara dan selatan. Salain sabagai ruang paraliahan, surambi itu digunoan pulo sabagai tampek baraja Al-Qur'an dan tampek penitipan aleh kaki. Di bagian ateh surambi ado menara babantuak bangunan badenah segidelapan jo duo jendela kaco di satiok sisinyo dan dimahkotai dek samacam kubah babantuak susunan buah labu nan mangarucuik ka ateh.

Rujuakan

Daftar pustaka

• Ajisman; Almaizon (2004). Iim Imadudin. ed. Bangunan Bersejarah di Kabupaten Tanah Datar. Balai Kajian Sejarah dan Nilai Tradisional Padang. ISBN 979-938-849-X. 
• Gayo, Iwan (1985). "Masjid Bersejarah di Indonesia". Buku Pintar Seri Senior. Grasindo. ISBN 979-025-294-3. 
• "Wisata Tambo Religius ke Limo Kaum". Harian Haluan. 2012-08-08. Diakses tanggal 2012-10-18. 
• "Peraturan Menteri Kebudayaan dan Pariwisata Nomor PM.05/PW.007/MKP/2010 Tahun 2010", Menteri Kebudayaan dan Pariwisata Indonesia, 2010  .
• Jasmine, Almira (2012). Sejarah dan Teori Arsitektur II. Scribd.com. http://id.scribd.com/doc/82279486/Sejarah-Dan-Teori-Arsitektur-II. Diakses pado 18 Oktober 2012.