Materialisme

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Ludwig Feuerbach, filsuf Jerman nan mandukuang materialisme.

Materialisme adolah paham dalam filsafat nan manyatoan bahasonyo hal nan dapek dikatoan sabana-bana ado adolah materi.[1] Pado dasarnyo sado hal tadiri ateh materi jo sado fenomena adolah hasil interaksi material.[1] Materi adolah satu-satunyo substansi.[1] Sabagai teori, materialisme tamasuak paham ontologi monistik.[1] Akan tetapi, materialisme babedo jo teori ontologis nan didasaran pado dualisme atau pluralisme.[1] Dalam maagiah panjalasan tunggal tantang realitas, materialisme basubarangan jo idealisme.[2]

Materialisme indak mangakui entitas-entitas non-material takah roh, hantu, setan, jo malaikaik.[2] Palaku-palaku immaterial indak ado.[2] Indak ado Tuhan atau dunia adikodrati.[2] Realitas satu-satunyo adolah materi dan sagalo sesuatu marupoan manifestasi dari aktivitas materi.[2] Materi jo aktivitasnyo basipaik abadi.[2] Indak ada panggarak patamo atau sabab patamo .[2] Indak ado kahidupan, indak ado pikiran nan kekal.[2] Sadoalah gajala barubah, akhirnyo malampaui eksistensi, nan baliak lai ka dasar material primordial, abadi, dalam suatu paralihan wujuik nan abadi dari materi.[2]

Definisi materialisme[suntiang | suntiang sumber]

Kato "materialisme" tadiri dari kato "materi" jo "isme".[1] "Materi" dapek dipahami sabagai "bahan; benda; sagalo sasuatu nan tacaliak".[3] "Materialisme" adolah pandangan hiduik nan mancari dasar sagalo sasuatu nan tamasuak kahidupan manusia di dalam alam kabendaan samato, jo mangasampiangan sagalo sasuatu nan mangatasi alam indra.[3] Samantaro itu, urang-urang nan hiduiknya barorientasi ka materi disabuik sabagai "materialis".[3] Urang-urang iko adolah para pangusuang paham (ajaran) materialisme atau juo urang nan mamantiangan kabendaan samato (harato, pitih, dsb).[3]

Tokoh jo karya tantang materialisme[suntiang | suntiang sumber]

Filsuf nan patamo bana mamparkenalan paham iko adolah Epikuros.[4] Inyo marupoan salah satu filsuf paliang tanamo pado maso filsafat kuno.[4] Salain Epikuros, filsuf lain nan juo turuik mangambangan aliran filsafat iko adolah Demokritos jo Lucretius Carus.[4] Pandapek mereka tentang materialisme, dapek disamoan jo materialisme nan bakembang di Prancis pado maso pancarahan.[4] Duo karangan karya La Mettrie nan cukuik tanamo mawakili paham iko adolah L'homme machine (manusia masin) jo L'homme plante (manusia tumbuhan).[4]

Dalam wakatu nan samo, di tampek lain muncul saurang Baron d'Holbach nan mangamukoan suatu materialisme ateisme.[4] Materialisme ateisme sarupo dalam bantuak jo substansinyo, nan indak mangakui adonyo Tuhan sacaro mutlak.[2] Jiwa sabatuanyo samo jo fungsi-fungsi otak.[4] Pado abaik ka-19, muncul filsuf-filsuf materialisme asa Jerman takah Feuerbach, Moleschott, Buchner, jo Haeckel.[4][5] Merekalah nan kudian manaruihan kabaradoan materialisme.[4]

Ciri-ciri paham materialisme[suntiang | suntiang sumber]

Saindaknyo ado limo dasar ideologi nan dijadian dasar kayakinan paham iko:[2]

  • Sagalo nan ado (wujuik) barasa dari ciek sumber yaitu materi (ma’dah).[2]
  • Indak mayakini adonya alam ghaib.[2]
  • Manjadian pancaindra sabagai satu-satunyo alaik mancapai ilimu.[2]
  • Malatakan ilimu sabagai pangganti agamo dalam palatakan hukum.[2]
  • Manjadian kacondongan jo tabiat manusia sabagai akhlak.[2]

Kritik tarhadap materialisme[suntiang | suntiang sumber]

Salah satu kritik tarhadap paham materialisme dikamukoan dek aliran filsafat eksistensialisme.[2] Materialisme maajaan bahasonyo manusia pado akhianyo adolah thing, benda, samo takah benda-benda lainnyo.[2] Bukan barati bahasonyo manusia samo jo pohon, kabau, atau meja, sebab manusia dipandang labiah unggul.[2] Akan tetapi, sacaro mandasar manusia dipandang hanyo sabagai materi, yakni hasil dari proses-proses unsur kimia.[2] Filsafat eksistensialisme maagiah kritik tarhadap pandangan takah iko.[2] Caro pandang paham materialisme takah iko mareduksi totalitas manusia.[2] Manusia dicaliak hanyo manuruik hukum-hukum alam, kimia, jo biologi, sahinggo saolah samo takah hewan, tumbuhan, jo benda lain.[2] Padahal manusia mampunyo kompleksitas dirinyo nan indak dapek diukua, misalnyo sajo katiko bahadokan jo momen-momen eksistensial takah pangambilan kaputusan, kacamehan, takuik, jo sabagainya.[2]

Rujuakan[suntiang | suntiang sumber]

  1. a b c d e f Lorens Bagus. 2000. Kamus Filsafat. Jakarta: PT. Gramedia Pustaka Utama. Hlm. 593-600
  2. a b c d e f g h i j k l m n o p q r s t u v w x N. Drijarkara. 1966. Pertjikan Filsafat. Jakarta: PT Pembangunan Djakarta. Hal. 57-59.
  3. a b c d Kamus Besar Bahasa Indonesia. 2000. Jakarta: Balai Pustaka. Hlm. 946.
  4. a b c d e f g h i P. A. van der Weij. 1988. Filsuf-filsuf Besar Tentang Manusia. Jakarta: PT Gramedia Pustaka Utama. Hal 108-110.
  5. Bryan Magee. 2008. The Story of Philosophy. Yogyakarta: Kanisius. Hlm. 135-136.