Idrus

Idrus
Idrus kiro-kiro taun 1955
Lahia	12 September 1921 Padang, Sumatra Barat, Hindia Balando
Maningga	18 Mei 1979 (umua 57) Padang, Sumatra Barat, Indonesia
Kabangsaan	Indonesian
Karojo	Panulih
Pasangan	Ratna Suri Hussein.

Idrus (lahia 12 September 1921 – maningga 18 Mei 1979 pado umua 57 taun) adolah saurang panulih Indonesia nan dikana sabagai pangarang carito pendek jo novel bagenre realistis. Inyo dikana sabagai salah saurang sastrawan nan mawakili Angkatan '45.

Biografi

Idrus lahia di Padang, Sumatera Barat pado tanggal 12 September 1921. Pandidikannyo dijalaninyo di sakolah-sakolah punyo Balando sabalum pandudukan Japang di Indonesia. Samaso basakolah, inyo mambaco karya-karya panulih Barat jo balatiah manulih carito pendek. Inyo manyalasaian pandidikannyo pado taun 1943, kamudian mulai bakarajo di Balai Pustaka, sabuah parusahaan panarbitan punyo negara, sabagai saurang editor. Antaro taun 1943 sampai 1944, Idrus manulih anam carito pendek nan akhianyo ditabikan dalam koleksi Corat-Coret di Bawah Tanah.

Pado mulo Revolusi Nasional Indonesia, katiko kalompok revolusioner Indonesia manyatoan kamerdekaan satalah Japang manyarah, Idrus sadang barado di Surabaya, Jawa Timur. Katiko sadang di sinan, inyo manyaksian Partampuran Surabaya, katiko tantara Inggirih nan dikapaloi dek Aubertin Walter Sothern Mallaby jo tantaro revolusi nan dikapaloi dek Moestopo baparang. Sabagai hasilnyo, inyo mulai manulih novela "Surabaja" tantang masalah kamanusiaan nan tajadi katiko parang sarato dampaknyo pado bulan Oktober 1945 sampai Mei 1946. Panulih jo kritikuih sastra Indonesia Muhammad Balfas manggambarkannyo sabagai "satu-satunyo karya nan manyindia revolusi Indonesia".

Pado maso parang, karya Idrus samakin kontemplatif, di antaronyo "Jalan Lain ke Roma", novelet Perempuan dan Kebangsaan (dimuek di majalah Indonesia pado taun 1949), jo novel Aki (1950). Satalah mandapek takanan dari Lembaga Kebudajaan Rakjat nan didukuang dek komunis, Idrus malarikan diri ka Malaysia. Di sinan, inyo manabikan Dengan Mata Terbuka (1961), jo Hati Nurani Manusia (1963). Tulisan-tulisannyo salanjuiknyo indak bagitu ditarimo baiak.

Idrus pindah ka Melbourne, Australia, pado taun 1965 untuak kuliah di Universitas Monash. Inyo lulus dari universitas tu pado taun 1974 jo gala master di bidang seni. Inyo maningga dunia pado tanggal 18 Mei 1979 di Kampung Tanah, Padang, Sumatra Barat. Katiko itu, inyo sadang mangaja gala doktor dari Monash jo manjabat sabagai dosen.

Gaya

Dari Ave Maria ke Djalan Lain ke Roma, edisi ka-1 (1948)

Idrus manulih jo gaya nan manakankan aspek realitas nan labiah kareh, manggunoan kalimek-kalimek nan singkek jo ringkeh sarato mangabaikan estetika nan umum pado era Balai Pustaka jo Poedjangga Baroe. Balfas manganggap gaya Idrus panuah dek sinisme jo sarkasme. Tapi, manjalang revolusi salasai, gayanyo manjadi makin kontemplatif. Cadiak pandai sastra asa Balando, A. Teeuw, bapandapek bahwasonyo Idrus dipangaruahi dek karya-karya Ernest Hemingway, John Steinbeck, Erskine Caldwell, jo Willem Elsschot.

Kabanyakan tokoh pado karya-karya Idrus adolah urang biaso, babeda jo karya panulih lainnyo nan kabanyakan adolah urang tapandang atau bangsawan, contohnyo karya Amir Hamzah. Iko disababkan dek motivasi politik pamarentah Japang nan mamarentah pado taun 1942 sampai partengahan 1945. Japang mamandang paralu untuak mampromosian supayo rakyat biaso bisa marabuik kakuasaan.

Pangaruah

Idrus acok dianggap sabagai panaruih Chairil Anwar dek gaya baru pado tulisannyo. Inyo dianggap pulo sabagai tokoh nan mawakili sastrawan generasi '45. Akan tatapi, Teeuw indak sapandapek jo partanyaan iko. Manuruiknyo, kontribusi Chairil Anwar jauah labiah signifikan.

Kahidupan pribadi

Idrus manikah jo Ratna Suri pado taun 1948. Kaduonyo punyo ampek urang anak laki-laki, yaitu Nirwan, Slamet Riyadi, Rizal, jo Taufik, sarato duo urang anak padusi banamo Damayanti jo Lanita. Idrus adolah saurang poliglot nan fasiah babahaso Jerman, Inggirih, Balando, jo Indonesia.

Rujuakan

Catatan kaki

Daftar pustaka

• Balfas, Muhammad (1976). "Modern Indonesian Literature in Brief". di dalam L. F., Brakel. Handbuch der Orientalistik. 1. Leiden, Netherlands: E. J. Brill. ISBN 978-90-04-04331-2. https://books.google.com/books?id=NbY3AAAAIAAJ. 
• "Idrus" (dalam bahaso id). Encyclopedia of Jakarta. Pemerintah Kota Jakarta. http://www.jakarta.go.id/web/encyclopedia/detail/3665/Idrus. Diakses pado 5 Maret 2012.  Archived 26 December 2012 di Wayback Machine.
• "Idrus" (dalam bahasa Indonesia). Badan Bahasa. Diarsipkan dari versi asli tanggal 29 December 2022. Diakses tanggal 29 December 2022. 
• Parrott, J. G. A. (October 1975). "Who Killed Brigadier Mallaby?". Indonesia. 20 (20): 87–111. doi:10.2307/3350997. hdl:1813/53609 . JSTOR 3350997. 
• Teeuw, A. (1980) (dalam bahaso id). Sastra Baru Indonesia. 1. Ende: Nusa Indah. OCLC 222168801. https://books.google.com/books?id=YVSjHAAACAAJ.