Gunung Omeh, Lima Puluh Kota

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Gunuang Omeh
Kecamatan
Nagara  Indonesia
Provinsi Sumatera Barat
Kabupaten Lima Puluh Kota
Pamarintahan
 • Camat -
Laweh 156,54 kilometer pasagi
Kapadekan 86 jiwa/km²
Nagari/kelurahan /3

Gunuang Omeh (bahaso Indonesia: Gunung Mas) adolah sabuah kecamatan di Kabupaten Lima Puluh Kota, Sumatera Barat, Indonesia dan baibu kota di Koto Tinggi. Kecamatan ko baru tabantuak pado taun 2006.[1] Sabalunnyo basamo Kecamatan Suliki mambantuk Kecamatan Suliki Gunuang Omeh. Kecamatan iko tanamo sabagai pangasia limau siam gunuang omeh (biaso disabuik jesigo; jeruk siam gunuang omeh),[2] kawasan tambang ameh Manggani, dan juo taleso manjadi salah satu dari salapan tampek di Sumatera Barat nan manjadi ibu kota Republik Indonesia pado maso Pamarintahan Darurat Republik Indonesia (PDRI).[3]

Geografis[suntiang | suntiang sumber]

Kecamatan Gunuang Omeh mampunyoi laweh wilayah 156,54 km² dan talatak pado katinggian 700-1100 mdpl. Jarak dari ibu kota kecamatan jo ibu kota kabupaten yaitu sajauah 53 km.

Nagari talweh yaitu Nagari Koto Tinggi salaweh 74,00 km² dan nan takaciak yaitu Nagari Talang Anau salaweh 18,54 km².

Bateh wilayah[suntiang | suntiang sumber]

Utara Kabupaten Pasaman
Selatan Kecamatan Suliki
Barat Kabupaten Agam
Timur Kecamatan Bukit Barisan


Pamarintahan[suntiang | suntiang sumber]

Tugu PDRI di Balai Koto Tinggi, Gunuang Omeh

Kecamatan Gunuang Omeh alah maalami ampek kali panggantian camat sajak badiri dari taun 2006 jo pusek pamarintahan di Koto Tinggi. Kecamatan Gunuang Omeh tadiri ateh tigo nagari jo 17 jorong, nagari-nagari tasabuik yaitu:

  • Nagari Koto Tinggi, tadiri ateh 8 jorong:
    1. Kampuang Melayu
    2. Kampuang Muaro
    3. Sungai Dadok
    4. Sungai Siriah
    5. Puah Data
    6. Aia Angek
    7. Lokuang
    8. Lubuak Aua
      Rumah Kalahiran Tan Malaka di Pandam Gadang, Gunuang Omeh
  • Nagari Pandam Gadang, tabagi manjadi 6 jorong:
    1. Ikan Banyak
    2. Koto Marapak
    3. Koto Panjang
    4. Kampuang Patai
    5. Kampuang Goduang
    6. Sungai Mangkirai
  • Nagari Talang Anau, tadiri ateh 3 jorong:
    1. Talang Anau
    2. Simpang Padang
    3. Luak Begak

Niago[suntiang | suntiang sumber]

Kecamatan Gunuang Omeh mampunyoi tigo pasa atau biasa disabuik pokan (Dialek Padang: pakan, dek hanyo bukak sakali sapakan) atau balai, yaitu Pasa Kasiak Kuduang pado Ari Kamih, Pasa Talang Anau pado Ari Sinayan, jo Pasa Koto Tinggi pado Ari Satu.[1]

Tani, parak, jo taranak[suntiang | suntiang sumber]

Komoditi tani unggulan di Kecamatan Gunuang Omeh adolah limau siam gunuang omeh. Pado taun 2017, produksi limau dari kecamatan iko mancapai 24.600 ton. Salain limau, komoditas lain nan cukuik gadang dihasilkan yaitu padi, jo laweh area sawah nan ado mancapai 923 ha jo produksi mancapai 9.706 ton.[1]

Di bidang taranak, binatang nan ditaranakkan di Kecamatan Gunuang Omeh di antaronyo jawi, kambiang, kabau, ayam kampuang, jo itiak.[1]

Patambangan[suntiang | suntiang sumber]

Tambang ameh marupokan hasil tambang nan tanamo dari Gunuang Omeh, tapeknyo di kawasan Manggani nan talatak di hutan suaka Jorong Pua Data, Nagari Koto Tinggi. Pado mulo abaik ka-19, kawasan Manggani taleso dikalola padok panambangannyo dek Balando dan dilanjuikan dek Amerika Serikat inggo mampunyoi baragam fasilitas bak cando kota. Namun, panambangan gadang di area tasabuik alah ditinggakan sajak 1930-an.[4][5] Kini hanyo panambangan ameh sacaro ilegal nan dilakukan dek panduduak satampek sajo nan bajalan dek lokasi panambangan nan ado di hutan suaka.[6] Potensi biji ameh nan takanduang di kawasan Manggani dipakirokan mancapai 900.000 ton jo logam murni 5,85 ton. Takaik jo itu, pamarintah mulai maningkekan pangawasan pado kawasan tasabuik, talabiah panah tajadi padok panambangan nan malibaikkan warga nagara asiang (WNA).[7]

Talempong Batu nan ado di Kanagarian Talang Anau.

Salain itu, galian lain nan dihasilkan di Gunuang Omeh yaitu batu jo kasiak. Hasil galian batu gunuang di Nagari Pandam Gadang biaso diproduksi manjadi batu asah.[3][1]

Tampek-tampek pantiang[suntiang | suntiang sumber]

Tampek-tampek pantiang nan manjadi objek raun, budayo, jo sijarah di Kecamatan Gunuang Omeh di antaronyo:

  • Agrowisata Jeruk Siam Gunuang Omeh, Koto Tinggi
  • Sarasah Lubuak Bulan, Koto Tinggi
  • Ikan Larangan, Pandam Gadang
  • Kantua PDRI, Koto Tinggi
  • Monumen Bela Negara, Koto Tinggi (masih dibangun)
  • Rumah Tan Malaka, Pandam Gadang
  • Talempong Batu, Talang Anau
  • Tugu PDRI, Koto Tinggi
  • Ngalau Aia Singkek Kototinggi
  • Panorama "Puncak Kubu Park" Kototinggi
  • Pakampungan Adaik "Nagari Saribu Gonjong Limo" Kototinggi
  • Ngalau Imam Bonjol Kototinggi
  • Pamandian Lubuak Liwuang Sungai Dadok Kototinggi
  • Kawasan Bungo Raflesia "Gadutensis" di Aia Singkek Kototinggi
  • Arung Jeram Sungai Bawah Tanah Ngalau Taratai Titian Dalam Pandam Gadang

Rujuakan[suntiang | suntiang sumber]