Datuak di Minangkabau

Datuak di Minangkabau adolah gala adaik nan agiahan kapado sasaurang malalui kato sapakaik sabuah kaum atau suku nan ado di daerah Minangkabau (provinsi Sumatra Barat) dan salanjuiknyo disatujui hinggo ka tingkek rapek adaik dek para tokoh pamuko adaik satampek (Kerapatan Adat Nagari biaso disingkek jo KAN). Gala iko sangaik dihormati dan hanyo dipakai dek kaum laki-laki Minang nan kan atau alah manjadi pamangku adaik/tokoh pamuk adaik atau Pangulu (namo lain dari Datuak) dek sabuah suku atau kaum tatantu di Minangkabau.

Sabalum gala iko disandang saurang, harus diadoan sabuah upacara adaik atau nan di maoan jo malewakan gala (Bahasa Minang), jo caro sakurang-kurangnyo mamotong saikua kabau dan kamudian diadoan jamuan makan. Dan jiko calon Datuak tasabuik indak mampu untuak maadoan acara tu, mako inyo indak punyo hak untuak manyandang gala Datuak tasebuik.

Saurang nan bagala Datuak dapek juo disamoan jo pamimpin sabuah kaum atau suku dan gala tasebuik khusus untuak kaum atau suku nan dimakasuik, tatapi kadangkalanyo ado juo gala Datuak nan diagian kapado saurang (laki-laki) hanyo sabagai gala kahormatan sajo.

Saurang nan alah manyandang gala Datuak dan di-lewa-kan, mako masyarakaik satampek indak dipabuliahan lai mamanggia namo sabelumnyo tatapi harus mamanggia jo namo galanyo tu, jiko ado masyarakaik satampek nan dikatahui manghino jo marandahan saurang nan bagala Datuak, mako urang tasebuik kan dapek sanksi adaik.

Pewarihan gala Datuak

Babeda jo tradisi Melayu nan lain, gala datuak dapek diwarihan manuruik sistem matrilinial. Bilo saurang Datuak maningga dunia, gala Datuak tasabuik dapek diwarihan kapado dunsanak laki-lakinyo, atau kemenakan nan paliang dakek hubuangan karabaiknyo dari garih ibu. Namun dapek juo diwarihan kapado salain karabaik dakeknyo asa masih dalam suku tasabuik, dan biasanyo kasado urang dalam suku tu manyatujuinyo. Datuak nan baru diangkek tatap mamakai gala nan samo, tanpa ado tambahan lain digala tasabuik. Jadi misal sabalumnyo A Datuak Bandaro jika kudian diganti dek si B, mako gelar barikuiknyo B Datuak Bandaro.

Jiko sabuah suku alah bakambang sacaro banyak, dan kamudian alah bacarai sacara kalompok ka daerah lain, dan jiko suku tasebuik maraso paralu maangkek Datuak nan baru, mako biasanyo gala Datuak sabalumnyo tatok dipakaian jo caro manambah ciek atau duo kato lai sasudah namo Datuak sabalumnyo. Misalnyo namo Datuak sabalumnyo adolah Datuak Bandaro mako gala Datuak turunannyo adolah Datuak Bandaro Putiah atau Datuak Bandaro nan Putiah. Dan satiok suku dapek malakuan pamekaran bagantuang dari kato sapakaik suku masiang-masiang.

Gala-gala Datuak

Gala Datuak tagantuang pado masiang-masiang suku nan ado di Minangkabau. Badasaan tingkek status sosial dari gala masiang-masiang Datuak dapek diliek dari gala gadangnyo nan diikuikan sasudah gala Datuak tasabuik. Untuak gala Datuak nan partamo atau tatuo biasonyo tadiri dari ciek suku kato dan barasa dari bahaso Sanskerta, misalnyo Datuak ketemanggungan. Sadangkan bilo tadiri dari duo kato atau labiah, biasanyo dinamoan gala balahan atau pacahan, misalnyo Datuak Parpatiah nan Sabatang. Dan kamudian sasudah masuaknyo pangaruah Islam, mako gala Datuak ado diserap dari bahaso Arab. Barikuik daftar gala Datuak nan utamo dalam tambo dan tradisi umum daerah Minang:

1. Datuak Ketumanggungan
2. Datuak Parpatiah nan Sabatang
3. Datuak Bandaro
4. Datuak Makhudum
5. Datuak Indomo
6. Datuak Sinaro

Liek pulo

• Datuk
• Gelar Datuk