Batu basurek Ombilin

Wikipedia Minangkabau - Lubuak aka tapian ilimu
Loncat ke navigasi Loncat ke pencarian

Batu basurek Ombilin adolah ciek batu basurek nan ditamuan di jorong Ombilin, Nagari Simawang,Kecamatan Rambatan, Tanah Datar, Sumatera Barat.[1][2] Batu basurek ko ditamuan di tapi Danau Singkarak, tapeknyo di alaman muko Puskesmas Rambatan.[1] Batu basurek ko bahannyo dari batu andesit, bagian atehnyo pacah, sadang bagian nan tasiso baukuran tinggi 95 cm, leba 48 cm, jo teba 30 cm.[1] Indak ado tangga nan tatulih pado batu basurek ko, namun dari isi jo bantuak tulisannyo dipakiroan barasa dari maso Rajo Adityawarman, iyolah abaik ka-14.[1][3]

Tadapek 10 barih tulisan nan ditulih dalam bahaso Sanskerta jo mamakai uruf pasca Pallawa,[1] nan bantuaknyo mulai manyarupoi uruf Jawa Kuno.[4] Manuruik de Casparis, isi batu basurek ko tabagi dalam 4 sloka, di mano 2 sloka babantuak sardula jo 2 sloka lainnyo babantuak malini.[1]

Satalah sampek disimpan di Ruang Koleksi Balai Pelestarian Cagar Budaya (BPCB) Sumatera Barat, sajak Kamis 6 Juli 2017 batu basurek ko dipindahkan ka Nagari Simawang,Kecamatan Rambatan, Tanah Datar.[5][6] Pamindahan ko dek ado rancano diaktifkannyo baliak jalua kareto api Sawahlunto-Padang, inggo ado risiko ka mambuek batu basurek ko rusak.[5][6]

Naskah[suntiang | suntiang sumber]

Barikuik aliah aksara batu basurek ko, kato-kato nan dalam tando kuruang marupoan pakiroan de Casparis (1992).[1] Sisi muko batu basurek ko batulisan sbb.:[1]

1. ...
2. na saila suryya pratapa, nahi nahi nrpa wangsa wangsa bi
3. dya narendra ... [nahi nahi ... dharma dharma] madityawarmma //o//
4–8. indak tabaco
9. ... rajadiraja marpahyata
10. ... matra ri mahasarwa

Sadang sisi sampiang batulisan sbb.:[1]

1. swahasta
2. likhitam

Tajamahan[suntiang | suntiang sumber]

Manuruik de Casparis, kok mamakai metrum malini, kato-kato nan ilang indak tabaco lai dapek tarisi jo aratinyo dapek dipakiroan.[1]

Tajamahan arati sisi muko sbb.:[1]

pamimpin nan elok, ... (meskipun) bukan katurunan rajo-rajo, tapi inyo adolah rajo dari Widyadhara bansonyo...

Tajamahan arati sisi sampiang sbb.:[1]

ditulih jo tangannyo surang

Catatan: Tulisan di sisi sampiang ko, dek de Casparis langkoknyo aruih dibaco svahastena maya Adityawamana, nan aratinyo: "(iko ditulih) dek ambo, Adityawarman". Mangko dari tu dapeklah disangko baso Rajo Adityawarman tu lai mangarati bahaso Sanskerta juo.[3]

Caliak pulo[suntiang | suntiang sumber]

Rujuakan[suntiang | suntiang sumber]

  1. a b c d e f g h i j k l Kusumadewi, Sri Ambarwati (2012). Adityawarman (1347-1374 Masehi): Kajian Epigrafi. Depok: Fakultas Ilmu Pengetahuan Budaya, Program Studi Arkeologi, Universitas Indonesia. pp. 22-24. http://lib.ui.ac.id/file?file=digital/20322904-T-PDF%20Adityawarman-full%20text.pdf. 
  2. Sistem Registrasi Nasional Cagar Budaya (2016). "Prasasti Ombilin". cagarbudaya.kemdikbud.go.id. https://cagarbudaya.kemdikbud.go.id/public/objek/detailcb/PO2014030300001/prasasti-ombilin. Diakses pado 30 Agustus 2018. 
  3. a b Kozok, Uli (2006). Kitab Undang-Undang Tanjung Tanah: Naskah Melayu Yang Tertua. Jakarta: Yayasan Obor Indonesia. pp. 38-40. ISBN 979-461-603-6. https://books.google.co.id/books?id=Z8Z6XXYuFJ0C&pg=PA38&dq=Prasasti+Ombilin&hl=id&sa=X&ved=0ahUKEwiW5Lzwm5TdAhXNbCsKHccIC0YQuwUIKjAA#v=onepage&q=Prasasti%20Ombilin&f=false. 
  4. Utomo, Bambang Budi; Shuhaimi, (Nik) Hassan, bin Nik Abd. Rahman (2008). Zaman Klasik Di Nusantara: Tumpuan Kajian Di Sumatera. Dewan Bahasa dan Pustaka. pp. 117. ISBN 9836299874, 9789836299871. https://books.google.co.id/books?id=etJRAQAAMAAJ&q=Prasasti+Ombilin&dq=Prasasti+Ombilin&hl=id&sa=X&ved=0ahUKEwiW5Lzwm5TdAhXNbCsKHccIC0YQ6AEITzAJ. 
  5. a b Haluan Sumbar (7 Juli 2017). "Prasasti Peninggalan Raja Adityawarman Ini Dipindahkan, Apa Sebab?". news.okezone.com. https://news.okezone.com/read/2017/07/07/340/1730771/prasasti-peninggalan-raja-adityawarman-ini-dipindahkan-apa-sebab. Diakses pado 30 Agustus 2018. 
  6. a b Andries, Rivo Septi (6 Juli 2017). "Jalur Kereta Api Ombilin Diaktifkan, Prasasti Raja Adityawarman Ini Dipindahkan". www.harianhaluan.com. https://www.harianhaluan.com/news/detail/65701/jalur-kereta-api-ombilin-diaktifkan-prasasti-raja-adityawarman-ini-dipindahkan/1. Diakses pado 30 Agustus 2018. 

Pautan lua[suntiang | suntiang sumber]

  • Istiawan, Budi (2006) Selintas Prasasti dari Melayu Kuno, Cet.1, Balai Pelestarian Peninggalan Purbakala Batusangkar (Wilayah Kerja Provinsi Sumatera Barat dan Riau), hlm 39-40.