Batu basurek

Wikipedia Minangkabau - Lubuak aka tapian ilimu
Contoh batu basurek

Batu basurek, Batu batulih, atau Prasasti adolah piagam atau dokumen nan ditulih pado bahan nan kareh jo tahan lamo. Panamuan batu basurek pado sajumlah situs arkeologi, manandokan akhia dari zaman prasejarah, yakni periode dalam sijarah kuno Indonesia nan masyarakaiknyo alun mangenal tulisan, manuju zaman sijarah, di mano masyarakaiknyo alah mangenal tulisan. Ilmu nan mampalajari tantang batu basurek disabuik Epigrafi.

Batu basurek kuno[suntiang | suntiang sumber]

Di antaro babagai sumber sijarah kuno Indonesia, sarupo naskah jo barito asiang, prasasti dianggap sabagai sumber tapantiang karano mampu mambarikan kronologis suatu paristiwa. Ado banyak hal nan mambuek suatu prasasti sangaik manguntuangkan dunia panalitian maso lampau. Salain manganduang unsua pananggalan, batu basurek pun manjalehan sajumlah namo jo alasan batu basurek tu dibuek.

Di Minangkabau, batu basurek banyak dapek diliek di daerah Batusangka tarutamo di Pagaruyuang, Saruaso, Padang Panjang, Rambatan jo Ombilin (tapi danau Singkarak). Salain itu, ado juo di daerah Lubuk layang Selatan, Kecamatan Rao Mapattunggul, Kabupaten Pasaman, Sawahlunto Sijunjung (Padangroco), Muara Takus jo di Mahat.[1]

Batu basurek iko bahubuangan jo maso karajaan Adityawarman nan mamarintah sakitar abaik ka-14. Dipakiroan ado sakitar 30 buah batu basurek tapi hanyo ado babarapo sajo nan dapek dibaco, diantaronyo:

  • Batu basurek Kubu Ra-jo I (duo buah batu basurek)
  • Batu basurek Kubu Ra-jo II
  • Batu basurek Pagaruyuang IV
  • Batu basurek Pagaruyuang V
  • Batu basurek Pagaruyuang VI
  • Batu basurek Pagaruyuang VII
  • Batu basurek Pagaruyuang VIII

Babarapo batu basurek nan lain nan pantiang adolah:

  • Batu basurek Banda Bapahek
  • Batu basurek Saruaso I
  • Batu basurek Saruaso II
  • Batu basurek Lubuk Layang
  • Batu basurek Rambatan

Batu basurek modern[suntiang | suntiang sumber]

Dalam pangaratian modern di Indonesia, batu basurek acok dikaitkan jo tulisan di batu nisan atau di gaduang, utamonyo wakatu palatakan batu partamo atau parasmian suatu proyek pambangunan. Dalam barito-barito media massa, misalnyo, kito acok mandanga presiden, wakil presiden, mantari, atau kapalo daerah marasmikan gaduang A, gaduang B, jo sataruihnyo jo pangguntiangan pita jo panandotanganan batu basurek. Dengan demikian istilah batu basurek tatok lestari hinggo kini.

Rujuakan[suntiang | suntiang sumber]

  1. Abidin, Masoed (2005). Ensiklopedi Minangkabau. Padang: Pusat Pengkajian Islam dan Minangkabau.