Batiak Tanah Liek
Batiak Tanah Liek adolah bantuak kain batiak nan asanyo dari daerah Minangkabau. Batiak iko manggunoan tanah liek sabagai paronoannyo sainggo rononyo condong coklat. Partamo kali kain dirandam salamo saminggu jo tanah liek, sasudah itu kain dicuci jo diagiah parono alami lain nan barasa dari tumbuah-tumbuahan.[1]
Batiak tanah liek baitu banilai di Minangkabau sajak saisuak inggo kini. Kain ko masih banyak dipakai dek urang-urang gaek bahkan inggo usang jo lusuah. Batiak ko dipakai baiak dek padusi ataupun laki-laki, utamonyo dek pangulu, niniak mamak, jo bundo kanduang dalam alek adat, basamo jo kain songket. Kini kain ko lah dijadikan usaho nan banilai jua sarato dijadikan buah tangan dari Sumatera Barat.[1][2][3]
Sijarah
[suntiang | suntiang sumber]Asa batiak ko diduga dari nagari Cino nan masuak ka nagari Minangkabau pado abaik ka 16 nan batampek di Pagaruyuang, Batusangkar. Batiak tanah liek panah ilang indak bajajak katiko maso panjajahan Japang. Karano usaho Wirda Hanim, teknik batiak ko ditunjuakan baliak pado taun 1994.[4] Mulonyo Wirda Hanim mancaliak motif batiak ko dipakai dek panduduak nagari Sumaniak, Kecamatan Salimpauang, Batusangkar, Kabupaten Tanah Datar. Inyo suko jo batiak nan langka tu inggo baniaik untuak mambangkikan baliak seni tradisional batiak tanah liek nan ampia binaso.[5]
Motif-motif
[suntiang | suntiang sumber]Motif batiak tanah liek tradisional adolah kudo lauik jo buruang hong. Kini salain motif Cino nan ditunjukan, ado juo motif Minangkabau, contohnyo siriah dalam carano, kaluak paku, kuciang lalok, batuang kayu, tari piriang, jo kipeh.[6]
Zaman kini ko motif-motif baru ditunjukan ka panduduak satampek nan idenyo diambiak dari kakayoan jo budayo alam Minangkabau, contohnyo motif tabuik, Jam Gadang jo rumah gadang.[7] Kini ado 3 tampek untuak mambuek batiak tanah liek di Provinsi Sumatera Barat di antaronyo di Kota Padang, Kabupaten Pesisir Selatan, jo Kabupaten Dharmasraya. Tiok-tok daerah punyo corak surang manuruik lingkuangan tiok-tiok daerah, bahkan di Dharmasraya alah mulai mangambangkan motif baru, sarupo bungo sawit.[8]
Barikuik motif-motif batiak tanah liek:[9][8][1]
- Motif Rumah Gadang
- Motif Jam Gadang
- Motif Tabuik
- Motif Kapa Malin Kundang
- Motif Tari Minang
- Motif rangkiang
- Motif kipeh cino
- Motif saik ajik
- Motif kaluak paku
- Motif bungo/ pohon sawit
- Motif pohon gatah
- Motif lansek manih
- Motif siriah gadang
- Motif bungo pinang
- Motif aka sagagang
- Motif bungo melati
- Motif bungo rayo
- Motif kabau padati
- Motif balam
- Motif buruang hong
- Motif itiak pulang patang
- Motif buruang merak
- Motif ramo-ramo
Paronoan
[suntiang | suntiang sumber]Ciri khas dari batiak tanah liek adolah bahan parononyo barasa dari parono alam. Paronoan utamo nan dipakai yaitu tanah liek. Salain itu dapek dipakai pulo paronoan dari kulik jariang, manggih, gatah gambia, jarami padi, kulik mahoni, kulik rambutan, jo tumbuahan lain.[8][1]
Rujuakan
[suntiang | suntiang sumber]- ↑ a b c d Sefrina, I., & Rahmidani, R. (2018). Strategi Inovasi Produk pada Usaha Batik Tanah Liek Bundo Kanduang. Jurnal Ecogen, 1(1), 71-86.
- ↑ Efriani, R., Nazar, E., & Nelmira, W. (2018). Aturan Pakaian Untuk Menghadiri Baralek Perkawinan Bagi Wanita Di Kenagarian Vii Koto Talago Kecamatan Guguak Kabupaten Lima Puluh Kota. E-Journal Home Economic and Tourism, 15(2).
- ↑ "Batik Tanah Liek Cenderamata dari Pesisir Selatan". Berita Sumatera Barat Terkini (dalam bahasa Indonesia). 2018-01-06. Diakses tanggal 2019-10-01.
- ↑ Busana, Informasi. "Ciri Khas Batik Tanah Liek" (dalam bahasa Indonesia). Diakses tanggal 2019-10-01.
- ↑ Liputan6.com (2019-01-08). "Batik Tanah Liek, Batik Unik Khas Sumatera Barat". liputan6.com (dalam bahasa Indonesia). Diakses tanggal 2019-10-01.
- ↑ Media, Kompas Cyber. "Batik Tanah Liek, Batik Kuno Minangkabau yang "Bangun" dari Mati Suri Halaman all". KOMPAS.com (dalam bahasa Indonesia). Diakses tanggal 2019-10-01.
- ↑ Media, Kompas Cyber. "Simbol Minangkabau Jadi Motif Batik". KOMPAS.com (dalam bahasa Indonesia). Diakses tanggal 2019-10-01.
- ↑ a b c Fajri, E., Erwin, M. S., Heldi, I., & Si, M. (2015). Studi Tentang Batik Tanah Liek Citra Mandiri Kecamatan Sitiung Kabupaten Dharmasraya Provinsi Sumatera Barat. Serupa The Journal of Art Education, 4(1).
- ↑ Oktora, N., & Adriani, A. (2019). STUDI BATIK TANAH LIEK KOTA PADANG (Studi Kasus di Usaha Citra Monalisa). Gorga Jurnal Seni Rupa, 8(1), 129-136.