Al-Bajan (majalah)
Al-Bajan adolah majalah Islam dwi-mingguan baaksara Arab-Melayu nan dikelola dek murik-murik Sumatera Thawalib di Parabek, dakek Kota Bukittinggi, Sumatra Barat. Majalah iko diedaran di jaringan sakolah Sumatera Thawalib. Edisinyo tabik partamo pado 25 September 1919 dan dipakiroan baranti tabik pado 1921 dek alasan pendanaan.[1]
Majalah iko mamuek tulisan tantang palajaran Islam, tarutamo fiqih jo tafisr Alquran.[2][1]
Sijarah
[suntiang | suntiang sumber]Kapalo redaksi (rais tahrir) Al-Bajan dipacik dek Djamain Abdul Moerad, saurang jurnalis nan parnah baraja ka Abdul Karim Amrullah. Anggota redaksi tadiri dari murik nan tahimpun dalam Jamiyah Sumatera Thawalib Parabek di bawah pimpinan Ibrahim Musa. Adapun badan atau perusahaan pangelola majalah (mudir) ditangani dek Labai Sain Al-Maliki, saurang guru Sumatera Thawalib di Parabek.[3][4]
Edisi patamo majalah Al-Bajan tabik pado 25 September 1919 atau 1 Muharram 1338 manurut kalender Hijriyah. Al-Bajan tabik duo kali dalam sabulan, tapeknyo pado awa jo patangahan bulan Hijriyah. Ciek nomor panerbitan rato-rato bajumlah 24 halaman, tamasuk halaman sampul.[1]
Di antaro kontributor Al-Bajan nan parnah tacatat adolah Muhammad Salih Ar-Rayhani, Haji Abdul Latif Syakur, Zainuddin Ahmad, Haji Ibrahim Abdul Ghani, H. M Siddiq, jo Basyuni Ahmad.[1] Pambaco majalah Al-Bajan indak tabatas di wilayah sakitar Parabek, tapi tasebar sampai ka Palembang, Aceh, jo Samananjuang Malaya.[1]
Isi
[suntiang | suntiang sumber]Sacaro umum, Al-Bajan ditulih dalam aksara Arab-Melayu. Aksara Latin hanyo digunoan di halaman sampul, pamberitahuan/pangumuman, jo Iklan.[5] Sampul majalah dalam aksara Arab-Melayu manampilkan susunan dewan redaksi jo katerangan tantang majalah sabagai “majalah Islamiyah pado pangajaran pangetahuan jo parkhabaran”. Adapun sampul majalah dalam aksara Latin manampilkan motto "oentoek keperloean segala hal tentangan Agama Islam". Saparuh dari halaman sampul baisi iklan babagai produk takah buku bahaso Arab, batiak jo ubek-ubek.[1]
Pado bagian isi, tata latak halaman dibuek manjadi duo bagian jo garis vertikal di tangah-tangah halaman, kecuali judul babarapo rubrik ka maambiak panuah posisi halaman. Adapun panomoran halaman majalah untuak ciek tahun panarbitan nomor halaman taruih basambuang satiok edisinyo. Edisi ka-24 nan manjadi edisi panutuik pado penerbitan tahun patamo barakhia di halaman 374.[1]
Baranti tabik
[suntiang | suntiang sumber]Al-Bajan baranti tabik pado tahun 1921 diduga dek alasan pandanaan. Saat iko, sabagian eksemplar usali Al-Bajan tasimpan di Perpustakaan Nasional, dan sabagian salinannyo ado di Pusat Dokumentasi jo Informasi Kebudayaan Minangkabau (PDIKM) Padang Panjang.[1]
Berdasarkan observasi Ahmat Adam pado 1980, edisi Al-Bajan nan tadokumentasi yakni panarbitan tahun patamo dari nomor 19–23 (18 Juni–15 Agustus 1920) jo panarbitan tahun kaduo dari nomor 1–10 (14 September 1920–25 Januari 1921).[1]
Di PDIKM Padang Panjang, hanyo ado salinan babarapo edisi Al-Bajan, tapi kondisinyo banyak bagian majalah hilang, teks indak langkok/susah dibaca.[1]
Respons
[suntiang | suntiang sumber]Kamunculan Al-Bajan disusul dek panarbitan sarupo dek jaringan Sumatra Thawalib di babagai daerah, di antaranyo Al-Basyir di Sungayang, Al-Ittiqan di Maninjau, jo Al-Imam di Padang Japang.[4]
Caliak pulo
[suntiang | suntiang sumber] |
Wikimedia Commons mampunyoi media nan bahubuangan jo Majalah Al Bajan |
- Al-Munir, majalah Islam nan tabik di Padang jo tacatat sabagai madia massa Islam patamo di Indonesia.
Rujuakan
[suntiang | suntiang sumber]- ↑ a b c d e f g h i j Ashdiq, Khairul (2019). Pers Islam Minangkabau: 1 Abad Majalah Al-Bajan Sumatera Thawalib Parabek (1919-2019). Padang: Surau Parabek. ISBN 978-602-61250-4-0.
- ↑ Arbi Syafri Tanjung. Ranah Minang di Tahun 1900-1930: Pers Sekolah Aja Ada!. 19 Juni 2011. Harian Haluan.
- ↑ Indah Khairunnisah (2014). Lembaga Pendidikan Islam (LPI) Sumatera Thawalib Parabek Bukittinggi: Transformasi Sistem Pendidikan dari Sistem Halaqah manjadi Sistem Klasikal Archived 2019-11-18 di Wayback Machine. (Skripsi). Universitas Indonesia.
- ↑ a b Yuliandre Darwis (2013). Sejarah Perkembangan Pers Minangkabau (1859–1945). Jakarta: Gramedia. hlm. 83–84.
- ↑ Sunarti, Sastri (2013). Kajian Lintas madia. https://books.google.co.id/books?id=5DFIDwAAQBAJ&pg=PA57&dq=%22ABoean+GoeRoe%22&hl=id&sa=X&ved=0ahUKEwj3qtiR7tTkAhVPXn0KHSe_DNEQ6AEIKzAA#v=onepage&q=%22ABoean%20GoeRoe%22&f=false. Diakses pado 16 September 2019.