Adaik basandi syarak

Adaik basandi syarak adolah salah satu prinsip utamo nan mangatur adaik Minangkabau. Prinsip ko barasa sasudah Parang Pidari malalui sabuah sumpah satie di Bukik Marapalam. Sumpah ko disapakati dek tigo tungku sajarangan nan tadiri dari niniak mamak, alim ulama, jo cadiak pandai.

Adaik basandi syarak dapek juo di aratian bahwasanyo saluruih adaik nan dipakai dalam masyarakaik Minangkabau harus basandi pado syarak Islam, nan didasari pado al-Quran jo sunnah (syarak basandi Kitabullah). Versi nan labiah langkok mamuek fakta sijarah Islam di Minangkabau nan tibo malalui lauik dan basuo jo pangaruah adaik di tanah nan tinggi (syarak mandaki adaik manurun).

Pado kaba Minangkabau

Si Amaik mandi ka luak
Luak parigi paga bilah
Bilah bapilah kasadonyo
Adaik basandi syarak
Syarak basandi kitabullah
Sanda manyanda kaduonyo
Pinang masak bungo bakarang
Timpo batimpo saleronyo
Jatuah baserak daun sungkai
Tiang batagak sandi dalang
Kokoh-mangokoh kaduonyo
Adaik jo syarak takkan bacarai
Adaik basandi syarak
Syarak basandi Kitabullah
Syarak mangato-adaik mamakai
Camin nan indak kabua
Palito nan indak padam
Alam takambang jadi guru
Adaik basandi syarak
Syarak basandi Kitabullah

Hiduik batampek mati bakubua
Kuburan hiduik di rumah gadang
Sakik basilau-mati bajanguak
Nan tuo dihormati
Nan ketek dikasiahi
Samo gadang bao bakawan
Ibu jo bapak labiah sakali
Kalau dibalun sabalun kuku
Kalau dikambang saleba alam
Walau sagadang biji labu
Bumi jo langik ado disitu
Sakali aia gadang
Sakali tapian baranjak
Sakali musim batuka
Sakali caro baganti
Nan adaik barubah indak