H.B. Saanin

Wikipedia Minangkabau - Lubuak aka tapian ilimu
H.B. Saanin
Lahia9 Juni 1917
Lengayang, Hindia Balando
Maningga18 Maret 1988 (umua 70)
Banduang, Jawa Barat, Indonesia
KabangsaanIndonesia
Alma materNederlandsch-Indische Artsen School (NIAS)
Karojo
  • Dokter jiwa
  • pengajar

Prof. dr. H. Hasan Basri Saanin Datuk Tan Pariaman atau biaso disingkek H.B. Saanin (lahia di Pasisia Salatan, 9 Juni 1917 – maningga di Banduang, 18 Maret 1988 pado umua 70 taun) adolah saurang dokter jo guru gadang psikiatri Indonesia di Fakultas Kadokteran Universitas Padjadjaran.[1] Inyo bajaso mampajuangan layanan kasehatan jiwa di Sumatra Barat. Namonyo kini diabadian sabagai namo rumah sakik jiwa punyo Pamarentah Provinsi Sumatra Barat di Kota Padang.[2]

Pado maso awal kamerdekaan Indonesia, H.B. Saanin pernah manjadi pamimpin Harian Berita Indonesia di Jakarta.[3]

Kahidupan awal jo pandidikan[suntiang | suntiang sumber]

Hasan Basri lahia di Kayu Kalek, Kambang, Lengayang, Pasisia Salatan, Sumatra Barat pado tanggal 9 Juni 1917. Inyo adolah anak katigo dari salapan basudaro.[4]

Inyo manampuah pandidikan di Sekolah Desa Lasi Kecamatan IV Angkek, Kabupaten Agam, Hollandsch-Inlandsche School (HIS) jo Meer Uitgebreid Lager Onderwijs (MULO) Bukittinggi. Satalah itu, inyo ditarimo manjadi mahasiswa di Nederlandsch-Indische Artsen School (NIAS) Soerabaia. Pado Maso Pandudukan Japang, sakola iko ditutuik dan inyo bagabuang manjadi mahasiswa di Ika Daigaku Djakarta,[5] satu-satunyo sakola kadokteran pado maso Japang. Satalah kamardekaan Indonesia, Ika Daigaku dinasionalisasi manjadi Perguruan Tinggi Kedokteran, Balai Perguruan Tinggi Djakarta (cika baka Fakultas Kadokteran Universitas Indonesia), inyo mandapek gala dokter dari kampus tu pado 27 Nopember 1945.[6]

Samulo, inyo bacito-cito manjadi ahli hukum, tapi kamudian inyo manjadi psikiater.[7] Inyo sampek maambiak kuliah Tk C II Fakultas Hukum, Balai Pengajaran Tinggi Jakarta pado taun 1948.[8]

Karier[suntiang | suntiang sumber]

Pado tanggal 1 Desember 1945, dr. Hasan Basri mamulai karier jo bakarajo di Laboratorium Eijkman Jakarta.[9] Hasan Basri salanjuiknyo mulai bakarier di rumah sakik. Akibaik Agresi Militer Belanda I, pado 21 Januari 1947, pasien Koloni Orang Sakit Djiwa (KOSD) Ulu Gaduik Padang diungsian jo bagabuang ka RSU Sawahlunto nan inyo kapaloi, nan kamudian manjadi Rumah Perawatan Sakit Djiwa (RPSD) Sawahlunto.[10][11] Pado 4 Februari 1948, inyo bakarajo pulo di Tugas Transfusi Darah Palang Merah Indonesia (PMI) Sumatra Barat. Taun 1948–1949, inyo manjabaik sabagai Kapalo Rumah Sakik Umum (RSU) Bukittinggi. Dari taun 1949 sampai 1957, inyo batugas sabagai Kapalo RSU Sawahlunto, dokter di Kabupaten Sawahlunto/Sijunjuang, Kapalo Rumah Sakik Jiwa Sawahlunto jo Ulu Gaduik Padang, Kapalo Sekolah Jururawat Sawahlunto, jo Dokter Tambang Batu Bara Ombilin Sawahlunto. Pado 1954, Hasan Basri mamimpin pambangunan ulang jo pamugaran bangunan rumah sakik nan rusak jo pamindahan baliak pasien ka Padang.[2][12]

Pado taun 1957, Hasan Basri manjabek sabagai Pangawas Kapalo Jawatan Kesehatan Provinsi Sumatra Tengah di Padang.[8][4] Pado taun 1959 sampai 1961, inyo dimutasi sabagai Dokter di Rumah Sakik Umum Rancabadak Banduang (kini Rumah Sakit Umum Hasan Sadikin). Sajak 1961 sampai 1981, inyo diangkek sabagai Direktur RSJ Bandung dan Cimahi (Cisarua) sarato Kapalo Bagian Penyakit Jiwa Rumah Sakik dr. Hasan Sadikin Banduang.[13] Inyo mamimpin rumah sakik tu salamo 28 taun.[14]

Hasan Basri diangkek sabagai Dosen Luar Biasa Bagian Psikiatri Fakultas Kadokteran Universitas Padjadjaran Banduang pado taun 1964. Pado 1973, inyo diangkek sabagai lektor kapalo di fakultas tu. Inyo diangkek sabagai guru besar/profesor psikiatri Universitas Padjadjaran pado 1978.[15] Inyo dikana sabagai dokter nan bisa manguasai jo manggabuangan ilmu hukum jo ilmu psikiatrik. Katiko aktif di Ikatan Dokter Indonesia (IDI) Jawa Barat, inyo dikana gigiah mambela kawan-kawan sajawatnyo nan dituduah malakuan malapraktik.[16]

Denny Thong mancatat Hasan Basri sabagai sosok nan basamangek tinggi, disiplin, jo sayang ka kaluarga. Kawan sajawat jo bawahannyo manganangnyo sabagai sosok nan marakyat jo kakaluargaan, walaupun bantuak mukonya tampak ‘pamberang’.[17]

Maningga dunia[suntiang | suntiang sumber]

Hasan Basri Saanin maningga dunia di Rumah Sakik Hasan Sadikin Banduang pado hari Jumek, 18 Maret 1988 satalah sambilan hari dirawek. Inyo mandarito panyakik liver, paru-paru, ginjal, jo pandarahan di usus. Sabalum maningga, inyo dibao ka rumah sakik dalam kondisi muntah darah akibaik pandarahan di usus. Operasinyo ditangani dek ahli badah banamo dr. Warko Karnadihardja. Inyo maninggaan surang bini jo tujuah urang anak.[4]

Pangharagoan[suntiang | suntiang sumber]

Pado tanggal 2 Nopember 2000, rumah sakik nan dulunyo parnah dikapaloi dek Hasan Basri Saanin di Padang dirasmian jo namo baru, yaitu Rumah Sakit Jiwa Prof. dr. Hasan Basri Saanin Datuk Tan Pariaman.[7]

Rujuakan[suntiang | suntiang sumber]

  1. ↑ Ikapi 1989, hlm. 48.
  2. ↑ a b "SEJARAH SINGKAT RS. JIWA PROF. HB. SAANIN PADANG". rsjhbsaanin.sumbarprov.go.id. 28 Maret 2018. Diakses tanggal 4 Januari 2024. 
  3. ↑ Basri 1983, hlm. 7.
  4. ↑ a b c "HB Saanin Meninggal Dunia". Diarsipkan dari versi asli tanggal 5 Januari 2024. Diakses tanggal 5 Januari 2024. 
  5. ↑ Eduard E 1997, hlm. 9.
  6. ↑ Basri 1983, hlm. 39.
  7. ↑ a b Thong 2013, hlm. 257.
  8. ↑ a b Basri 1983, hlm. 59.
  9. ↑ Basri 1983, hlm. 112.
  10. ↑ Thong 2013, hlm. 214.
  11. ↑ Umarak & Hardi 2023.
  12. ↑ Basri 1983, hlm. 63.
  13. ↑ Basri 1983, hlm. 61.
  14. ↑ Thong 2013, hlm. 111.
  15. ↑ Basri 1983, hlm. 69.
  16. ↑ Thong 2013, hlm. 258.
  17. ↑ Thong 2013, hlm. 115.
Daftar pustaka
Diambiak dari "https://min.wikipedia.org/w/index.php?title=H.B._Saanin&oldid=3148295"