Wajik

Wajik

Asa
Nagara asa	Indonesia
Kaâhlian mamasak	Masakan Indonesia
Rincian
Jinih	kulek-kulek jo jajanan pasar (id)
Bahan utamo	sipuluik jo Gula cokelat (id)

Wajik biasonyo dihidangkan sabagai makanan palangkok di acara-acara adaik atau upacara adaik

Wajik marupokan sajinih makanan panutuik. Wajik ko acok disadiokan katiko acara - acara di Minangkabau, sarupo acara baralek, mandoa, manakok hari, batimbang tando, maupun acara lainnyo nan basangkuikpauik jo makan minum. Kabanyakan wajik ko tasuo di daerah darek, tapi kini dapek juo basobok wajik ko di Padang walau indak baitu banyaknyo. Biasonyo dijojoan di kadai - kadai.

Wajik ko adolah makan nan babahan baku sipuluik nan ditambah saka atau gulo anau. Mungkin ado pulo nan mangiro samo jo lamang, tapi wajik ko jauah babeda jo lamang. Walaupun samo-samo babahan baku sipuluik.

Caro mambuek wajik

Untuak mambuek wajik ko diparaluan babarapo bahan-bahanyo diantaronyo iolah bareh puluik sakitar sakilo, aia santan karambia kiro-kiro sabanyak 650 mili liter, sarato jo gulo anau sakilo. Sasudah bahan-bahan tadi alah takumpua, nan partamo harus dilakuan iolah mambasuah bareh puluik dulu. Jiko bareh puluik tadi alah dicuci sacaro barasiah, bareh puluik tasabuik kamudian di kukuih hinggo nyo manjadi satangah masak. Katiko manunggu bareh puluik nan dikukuih tadi manjadi satangah masak, campuan aia santan karambia jo gulo anau di kuali nan lain. Aduak santan tasabuik jo gulo anau sampai marato gulonyo. Kamudian, katiko puluik katan tadi alah masak mako masuakan puluik katan tasabuik ka dalam santan karambia nan alah bacampua gulo anau tadi. Salanjuiknyo aduak-aduak sampai puluik jo gulo anau manyatu. Kalau alah salasai, puluik tasabuik bawarna itam nan kamudian di angkek jo di pindaan ka ateh talam. Kamudian di biaan dingin. Kalau alah dingin puluik nan bawarna itam tadi di karek-karek sarupo pasegi ampek nan kamudian di namoan wajik.