Tingkuluak tanduak

Padusi Minangkabau batikuluak tanduak.

Pakaian adaik Minangkabau jo tikuluak tanduak dalam pentas tari piriang.

Tikuluak tanduak (diijo pulo tangkuluak tanduak) marupokan salah satu jinih panutuik kapalo padusi atau tikuluak dalam budayo urang Minangkabau nan bantuaknyo manyarupoi tanduak. Jinih panutuik kapalo ko tabuek dari kain nan dibantuak manjadi salendang panjang nan kudian dikreasikan manyarupoi tanduak jo duo sisi kida jo suok babantuak lancip co tanduak kabau. Jinih ko biaso digunokan dek padusi dalam pentas tari adaik, alek adaik, panyambutan tamu, jo pangiriang anak daro dalam acara panikahan.

Deskripsi

Tikuluak tanduak dipakai dek padusi Minangkabau basamoan jo pakaian adaik. Tikuluak tanduak biasonyo tabuek dari kain songket tanunan nan taba dan mudah dibantuak sarato biasonyo barono ameh ataupun sirah nan marupokan salah satu rono khas pakaian adaik Minangkabau. Pado bagian lakang tikuluak tanduak biasonyo diagiah hiasan babantuak kain nan taurai ka lakang.

Bantuak tikuluak tanduak pun baragam, ado nan ciek tingkek, duo tingkek, bahkan tigo tingkek. Biasonyo hal ko tagantuang dari mano tikuluak tanduak ko barasa. Tikuluak tanduak kabanyakan dibuek dari salendang tanunan khas Minangkabau jinih balapak, yaitu kain nan ditanun jo malewatkan banang ameh di saluruah bidang kain. Di sabagian daerah ado baragam caro mamakainyo sainggo bantuaknyo pun bavariasi. Di Kabupaten Agam ujungnyo runciang, di Payakumbuh ujungnyo papek, di daerah Lintau, Kabupaten Tanah Datar, tanduaknyo balenggek sarato baragam bantuak lainnyo. Pado alek panikahan, pangiriang anak daro juo mamakai hiasan pado kaduo ujuang tikuluak nan tabuek dari ameh atau lonan sepuhan.

Filosofi

Bantuaknyo nan manyarupoi tanduak acok difilosofikan subagai bantuak dari tanduak kabau nan marupokan bagian nan sangaik ikonik dalam masyarakaik Minangkabau. Salain itu bantuaknyo juo acok di analogikan jo bantuak gonjong rumah gadang nan marupokan rumah adaik khas Minangkabau, nan maknanyo baso padusi indak buliah mamikua baban nan talampau barek.

Makna filosofis dari Tikuluak tanduak nan manyarupoi rumah adaik Minangkabau adolah baso padusi subagai nan punyo rumah gadang atau bundo kanduang untuak kaumnyo. Sadangkan makna dari bantuaknyo nan sarupo tanduak kabau yaitu malambangkan kakuatan ati, basikareh dalam mancapai sasuatu nan elok, gigiah jo indak panah baputuih aso. Pado ujuang tikuluak dibuek tumpua nan aratinyo basipaik barani, romo tomo, jo indak nio malukoi ati urang lain. Panjang tanduak atau kadua sisi pado tikuluak musti samo nan aratinyo saimbang, basipaik adia sasuai kabutuhan jo kabaikan masyarakaik.

Galeri

• 
• 
• 
• 
• 
• 

Caliak pulo

• Tikuluak
• Tikuluak Koto Gadang
• Suntiang