Tarian kaba

Tarian kaba salah satu permainan rakyat Minangkabau

Tarian Kaba iyolah panamoan untuak babagai macam tari yang maangkek tema carito nan ado di kaba. Gerakannyo bapusek pado tangan jo kaki nan malangkah dan marentak. Contoh dari tari kaba adolah tari buai-buai.

Alaik musik panggiriang untuak tarian kaba pado umumnyo iyolah talempong jo adok (Adok iyolah sajenis alaik musik nan saroman jo rabana, tapi ukurannyo labiah gadang dari rabana nan biaso). Namun, katiko panari banyanyi, alaik musik nan dimainkan hanyolah adok sajo. Hal iko dek karano suaro talempong nan langkiang tajam akan mabuek suaro nyanyian indak jaleh tadanga.

Tarian kaba iko tamasuak ka dalam pamainan rakyaik Minangkabau. Walaupun pamainan iko dinamoan tari, babagai jenis carito nan diangkek dari kaba labiah mautamoan nyanyian daripado tari.

Pola gerakan

Pola gerakan katiko panari banyanyi indak talampau bavariasi, bahkan ado nan malangkah biaso bakaliliang arena sarupo gaya tukang kaba manyampaikan carito dalam bantuak yang lain. Bedanyo iyolah tukang kaba bamain, manyanyi, bagerak, dan manokok alaik bunyi-bunyian surang diri, sadangkan tarian kaba dilakukan dek babarapo penari sarato di iriangan jo babarapo pamain gandang adok.

Pokok dari tarian iko adolah nyanyiannyo, jikok nyanyian baranti karano papindahan adegan carito nan dinyanyian pamain akan manggarik-garikan badannyo. Contohnyo pado tarian ''si kambang'' atau di daerah lain ado nan manyabuiknyo tari buai-buai. Katiko manyanyi si pamain mambuek garik saroman mangayunkan anak ketek dalam gendongan atau mambuaikannyo dalam buaian. Katiko indak manyanyi, pamain sambia malangkah bakaliliang arena, gerakannyo saroman jo urang nan sadang manggendong anak. Pado tari buai-buai, si panari akan bakaliliang sambia manggendong anak dan kapalonyo manjunjuang sabuah kendi.

Carito

Kisah nan diangkek dalam tarian iko tagantuang pado pesanan. Ado kalanyo panyanyi indak bakisah malainkan bapantun sarupo pandendang nan di iriangi jo rabab atau saluang. Sasudah manyanyikan duo atau tigo pantun panyanyi kambali mambuek gerakan-gerakan. Nan pantiang dan manarik hati panonton dalam mancaliak tarian iko iyolah buah nyanyian nan diungkapkannyo.