Taman Alam Lumbini
 Pagoda Lumbini nan barado di tangah-tangan taman alam lumbini, Berastagi | |
| Informasi | |
|---|---|
| diresmian pado | 30 -31 Oktober 2010 |
| informasi tampek | |
| lokasi | Desa Tongkoh, Dolat Rakyat, Berastagi |
| kabupaten | Karo |
| Website | tamanalamlumbini.org |
Taman Alam Lumbini adolah sabuah kawasan hutan nan barado di dataran tinggi Berastagi, Kabupaten Karo, Sumatera Utara. Taman alam iko barado indak baitu jauah dari pusek ibu kota Propinsi Sumatera Utara, Medan. Lueh Taman Alam Lumbini ko kiro-kiro sakitar tigo hektar. Nan paliang dikana dari taman ko iolah bangunan pagodanyo karano di dalam kawasan taman alam ko tadapek tampek ibadah umaik budha, nan banamo Pagoda Lumbini.[1][2]
Latak jo kaadaan kawasan[suntiang | suntiang sumber]
Taman Alam Lumbini talatak tapeknyo di Desa Tongkeh, Kecamatan Dolat Rakyat, Berastagi, Kabupaten Karo, Pripinsi Sumatera Utara. Taman alam lumbini iko bajarak kiro-kiro sakitar 50 km dari Kota Medan atau labiah kurang sakitar 2 sampai 3 jam pajalanan jiko ditampuah ko kandaraan. Kondisi daerah Berastagi tasabuik marupoan daerah nan barado di katinggian. Khusunyo lokasi taman alam ko nan barado di Kecamatan Dolat Rakyat mambuek daerah ko mampunyoi udaro nan dingin karano barado di katinggian 1.192 m dari pamukaan lauik.[3] Taman Alam Lumbini iko barado di ateh lahan nan mampunyoi kontur atau pamukaanyo nan babukik-bukik, jurang, sarato jo punyo banyak lambah-lambahnyo. Letak kawasanko barado agak jauah dari karamian atau pakampuangan sahinggo mambuek taman iko punyo suasana nan tanang. Salain itu taman alam ko mampunyoi banyak batang kayu nan masih tajago sahinggo mambuek tampek iko punyo udaro nan bahawo sajuak.[4]
Sijarah[suntiang | suntiang sumber]
Taman Alam Lumbini nan di Berastagi ko sabanayo iolah tampek nan diparuntuakan untuak palatiahan-palatihan diri dek umaik Budha sarupo meditasi sarato jo kagiatan-kagiatan kaagamoan Budha lainnyo nan batujuan untuak pangambangan ilimu agamo Budha tasabuik. Di dalam taman alam lumbini ko tadapek sabuah kuil Budha atau namo lainyo disabuik juo jo Pagoda nan sangaik rancak jo megah. Taman Alam Lumbini ko diresmian pado tanggal 30 jo 31 Oktober taun 2010. Samanjak dibukak sacaro resmi, taman alam ko indak hanyo manjadi tampek ibadak dek umaik budha namun bisa juo manjadi salah ciek destinasi atau tampek tujuan wisata religi nan mampunyoi sabuah pagoda atau kuil Budha nan tinggi jo rancak di Indonesia. Sasuai jo namonyo, pagoda tasabuik banamo Pagoda Taman Alam Lumbini. Di namoi Lumbini dikaranoan namo tasabuik marupon namo sabuah tampek atau desa nan barado di kaki Gunuang Himalaya, Nepal. Tampek tasabuik marupoan tampek di mano Pangeran Siddharta Gautama, pamimpin agamo Budha, dilahiakan pado taun 563 SM dek saurang ratu nan banamo Mayadevi dan pado akhianyo anaknyo tu kan manjadi Buddha. Pagoda iko mulai dibangun samanjak taun 2007, dibangun manyarupoi bantuak dari Pagoda Shwedagon nan barado di Myanmar. Di dalam pagoda Taman Alam Lumbini ado tasimpan sabanyak 2.958 rupo patuang Budha, 30 rupo patuang Arahat, sarato jo 108 relik suci nan hampia kasadoalahannyo didatangan langsuang dari Myanmar, termasuk puncak pagoda nan di ateh stupa satinggi 46,8 meter. [5] Pambangunan kasaluaruhan komplek Taman Alam Lumbini sarato jo replika pagoda lumbini nan balantai duo iko marupoan sumbangan dari babagai kalompok-kalompok agamo Budha nan barado di babagai negara di lua Indonesia.[6][7][8]
Tampek wisata[suntiang | suntiang sumber]
Pagoda Taman Alam Lumbini[suntiang | suntiang sumber]
Pagoda iko marupoan replika atau maniru bantuak dari Pagoda Shwedagon nan talatak Myanmar. Replika Pagoda Shwedagon di Taman Alam Lumbini ini marupoan replika tatinggi nomor duo nan pernah ado diantaro replika sajinih nan ado di lua Myanmar dan juo marupoan kategori pagoda Budha nan tatinggi di Indonesia. Tinggi pagoda ko 46,8 meter, panjangnyo 68 meter, jo leba nyo 68 meter, dan pagoda ko di dilapisi jo cat nan bawarna ameh tarang.[1] Pagoda iko mandapek penghargaan dari Museum Rekor Indonesia (MURI) nan masuak pado kategori tatinggi di Indonesia sarato jo kagiatan kabaktian nan dihadiri dek bhiksu tabanyak, dimano ado sabanyak 1.250 anggota Sangha nan hadir, tadiri dari 100 urang bhiksu dari Indonesia, 650 urang dari Myanmar, 400 urang dari Thailand, dan urang-urang dari 20 negara lainnyo nan ikuik di kagiatan nan banamo Puja Bakti.[1][7] Di dalam pagoda ko tadapek relief-relief nan unik jo patuang-patuang Buddha nan manghiasi bangunan utamo dari pagoda. Ado pulo tadapek menara nan puncak nyo babantuak marunciang ka ateh langik. Di bawah dari puncak pagoda tasabuik tadapek hiasan-hiasan nan babantuak galang-galang ameh nan panjangnyo kiro-kiro 1,5 meter. Di puncak pagoda tu ado puluahan lonceng nan dapek babunyi katiko kanai angin.[9]
Taman Lumbini[suntiang | suntiang sumber]
Salain pagoda nan manjadi daya tarik untuak wisatawan bakunjuang ka tampek iko iolah karano adonyo taman bungo jo tumbuah-tumbuahan. Taman ko barado di lua pakarangan dari Pagoda tasabuik. Taman ko labiah tapeknyo barado di sampiang bangunan pagoda. di taman ko dapek dicaliak bamacam-macam jinih bungo sarato jo tanaman hieh lainnyo. Salain itu tadapek juo patuang-patuang binatang, sarato ado pulo patuang Budha. Di taman ko dapek juo dicaliak ruang untuak panalitian tanaman. Tumbuahan di dalam komplek iko juo diagia papan namanyo, nan mano barisi katarangan namo Latin, Indonesia, jo bahasa lokal yaitunyo Bahaso Karo. Taman nan barado di sampiang Pagoda lumbini ko manambah rancak kawasan Taman Alam Lumbini.[7] Di dalam taman ko tadapek juo jambatan gantuang nan panjangnyo mancapai 100 meter. Di bawah jambatan tu tadapek pulo taman-taman ketek sarato jo kolam nan aia nyo basumber dari mato aia.[2]
Caro bakunjuang[suntiang | suntiang sumber]
Untuak bakunjuang ka Taman Alam Lumbini ko mambutuahkan wakatu sakitar 2 sampai 3 jam pajalanan kandaraan dari kota Medan manuju ka Berastagi. Kamudian, dilanjuikan jo angkutan umum lainyo manuju Tugu Buah Jeruk nan lataknyo barado di Simpang Dolat Rayat. Salanjuiknyo pajalanan dilanjuikan jo bajalan kaki sakitar labiah kurang 30 minik dari Simpang tasabuik manuju ka arah Taman Alam Lumbini.[1] Untuak masuak ka dalam kawasan Taman Alam Lumbini, pangunjuang indak kan dimintak biaya tiket masuak. Satiok pangunjuang nan kan masuak ka lokasi Taman Alam Lumbini hanyo dimintak untuak maisi buku tamu nan barado tapek di mungko gerbang masuak. Namun, ado pulo nan harus diparatian dek pangunjuang katiko bakunjuang ka Pagoda, yaitunyo harus sopan, jago taratik, jo indak mambawo makanan ka dalam, salaintu pagoda kan ditutuik kalau umaik Budha katiko tu sadang baibadah.[10][11] Objek wisata iko alah mampunyoi fasilitas panunjang nan baguno untuak mambuek nyaman para pangunjuang nan kan bakunjuang atau bawisata ka tampek iko. Fasilitas nan ado di lokasi iko diantaronyo toilet, fasilitas palayanan informasi, taman-taman rekreasi, sarato tadapek pulo arena bamain untuak anak-anak. Salain itu, tadapek pulo babarapo kadai-kadai ketek nan manjua makanan jo minuman sarato jo manjua oleh-oleh.[1][2][11]
Poto Taman Alam Lumbini[suntiang | suntiang sumber]
-
Pagoda Lumbini -
Komplek taman lumbini
Rujuakan[suntiang | suntiang sumber]
- ↑ a b c d e "Pesona Pagoda Tertinggi di Indonesia di Taman Alam Lumbini, Karo". kumparan (dalam bahasa Indonesia). Diakses tanggal 2019-12-09.
- ↑ a b c YG, Super Admin. "Website Kabupaten Karo - Taman Alam Lumbini Wisata Alternatif di Berastagi". www.karokab.go.id (dalam bahasa Indonesia). Diarsipkan dari versi asli tanggal 2019-12-09. Diakses tanggal 2019-12-09.
- ↑ "Website Kabupaten Karo - Letak dan Geografis". www.karokab.go.id. Diarsipkan dari versi asli tanggal 2019-12-11. Diakses tanggal 2019-12-11.
- ↑ "Wilayah Kabupaten Karo. Karo adalah suku asli yang mendiami Dataran Tinggi Karo, Kabupaten Deli Serdang" (PDF). webcache.googleusercontent.com. Diakses tanggal 2019-12-11.
- ↑ antaranews.com (2012-12-26). ""Taman Alam Lumbini" ramai dikunjungi saat liburan". Antara News. Diakses tanggal 2019-12-11.
- ↑ "Taman Alam Lumbini - Replika Shwedagon Pagoda". tamanalamlumbini.org. Diarsipkan dari versi asli tanggal 2019-12-01. Diakses tanggal 2019-12-11.
- ↑ a b c Yumpu.com. "Sriwijaya Magazine Januari 2017". yumpu.com (dalam bahasa Indonesia). Diakses tanggal 2019-12-11.
- ↑ "Lumbini Development Trust- Birthplace of Buddha, Historical Place of Nepal, The World Heritage SiteLumbini Development Trust". lumbinidevtrust.gov.np. Diakses tanggal 2019-12-11.
- ↑ "Wisata ke Tanah Karo, Intip Kemegahan Pagoda Emas di Taman Lumbini". iNews.ID (dalam bahasa Inggris). 2019-03-08. Diakses tanggal 2019-12-11.
- ↑ YG, Super Admin. "Website Kabupaten Karo - Taman Alam Lumbini jadi Primadona". www.karokab.go.id (dalam bahasa Indonesia). Diakses tanggal 2019-12-11.
- ↑ a b antaranews.com (2012-12-26). ""Taman Alam Lumbini" ramai dikunjungi saat liburan". Antara News. Diakses tanggal 2019-12-11.