Rumah Gadang Kajang Padati
Rumah Gadang Kajang Padati adolah rumah gadang di Minangkabau yang indak punyo atok bagonjong, tapi mangadopsi bantuak atok padati yang barupo atok palano yang ujuang-ujuangnyo marunciang. Rumah gadang ko dapek dicaliak di Padang, khususnyo di daerah Kuranji, Pauh, jo Koto Tangah.[1]
Pado maso Kasultanan Aceh, tadapek aturan rumah gadang indak buliah maniru rumah gadang di darek, tapi harus ado paduan Aceh jo Minangkabau. Dek baitu, rumah gadang ko mandapek pangaruah dari Aceh, tarutamo pado bantuak janjang jo ukirannyo.[2]
Sijarah
[suntiang | suntiang sumber]Kasultanan Aceh diawali dek karajaan Samudra Pasai yang salanjuiknyo manjadian Aceh bakambang manjadi daerah kosmopolitan. Kasultanan Aceh yang talatak di ujuang utara Pulau Sumatra tu manjadi pintu masuak Selat Malaka sarato talatak di bibia pantai Lautan Hindia. Urang-urang dari sajumlah balahan bumi lainnyo tibo ka Aceh bukan hanyo untuak mancari rempah jo maisi pabekalan sajo, namun mangambangan paradaban sarupo para musafir Arab jo Gujarat.[3]
Sajumlah aspek budaya benda daerah pasisia dipangaruhi dek kasultanan Aceh, tamasuak rumah gadangnyo yang bagaya melayu (Aceh). Tampak dari adanyo pancatatan sakitar taun 1500 yang manyabuikan basonyo arsitektur dalam pambuatan rumah gadang tu manjadi salah satu kainginan dari kasultanan Aceh. Pado taun tu tajadi pulo panikahan putra Minangkabau jo putri Aceh. Namun panikahan tu indak barakhia elok, sahinggo mambuek Aceh kecewa jo manyarang Minangkabau baliak. Salain itu Aceh manguasoi sumber komoditas padagangan pantai barat.[3]
Bamulo pado taun 1607 katiko Aceh dipimpin dek Sultan Iskandar Muda manguasoi pasisia barat, Aceh batindak sabagai pamonopoli padagangan jo ikuik campua dalam hal adaik kabudayaan, bahkan turuik sato mangaluaan paraturan. Salah satu aturannyo yaitu basonyo rumah gadang harus dibuek jo mamaduan pangaruah Aceh jo Minangkabau, sarato indak buliah maniru rumah gadang di darek.[2]
Sajumlah panaliti bapandapek alasan dibalakuannyo aturan tu dek manimbang pasoalan topografi wilayah yang indak mamungkinan dibangunnyo rumah gadang sarupo di daerah darek. Dek baitu, tadapek pabedaan antaro rumah gadang di daerah darek jo daerah pasisia sarupo Kota Padang.[2]
Tipologi
[suntiang | suntiang sumber]
Rumah gadang Kajang Padati dibangun untuak kamanakan yang bahubungan tali budi atau kamanakan yang didakekan. [4] Sacaro arsitektural bangunan ko mirip jo rumah gadang tipe atok Tungkuih Nasi. Pabedaannyo talatak pado atoknyo yang barupo atok palano yang ujuang-ujuangnyo indak ditinggian. Dinamoan kajang padati dek bantuak atoknyo mangadopsi bantuak atok padati, yaitu alat transportasi tradisional yang dielo dek kabau.
Pado bagian muko rumah tadapek janjang yang tahubuang jo teras. Janjang ko ditutuik jo pintu kipeh di bagian atehnyo. Pintu ko punyo atok yang manuruikan arah atok rumah induaknyo. Bagian bawah dari atok tu diagiah tiang panyanggo suapayo atok indak rabah. Tiang panyanggo tu diagiah pulo panguek yang tahubuang jo rumah induak di sisi kida jo suok. Dek adonyo atok, tiang, jo panyanggo, mambuek area janjang manjadi sarupo ruang paralihan sabalun masuak ka dalam rumah. Salain itu, bantuak janjang sarupo jo bantuak janjang pado rumah Gayo Aceh, tamasuak bantuak ukirannyo.[5]
Bangunan rumah badenah segi ampek jo ampek persegi panjang sajajar sarato malintang arah jalan. Bantuak rumah barupo pangguang sarato tadapek kolong di bagian bawah rumah yang digunoan untuak taranak jo tampek panyimpanan. Sadangkan jumlah ruang biasonyo ganjia, mulai dari 3, 5, baitu salanjuiknyo.[5]
Ornamen Interior
[suntiang | suntiang sumber]Bantuak motif ornamen pado Rumah Gadang didominasi dek pangaruah Aceh sarato tadapek pulo pangaruah Minangkabau. Bantuaknyo diadopsi dari flora jo fauna di alam sarato geometris. Sabagian gadang ornamen tadapek pado singok, lespang, kisi-kisi langkan, kisi-kisi janjang, lubang angin, sarato pintu kamar. Namo motif ornamen tu sarupo sulur, itiak pulang patang, daun puluik-puluik, saik galamai, kipeh cino, putik bunga, rante, gigor buya, awan si om, jo tulak angin.[6]
Fungsi Ornamen
[suntiang | suntiang sumber]Pado Rumah Gadang Kajang Padati, ornamen-ornamennyo punyo fungsi yang sasuai jo bantuak, tujuan, sarato panempatannyo, sarupo fungsi estetika, simbolis, jo konstruktif.
- Sulur
Ornamen ko tamasuak ka dalam ornamen tambuih yang talatak di bagian lubang angin. Bantuaknyo manyarupoi flora jo bafungsi sabagai hiasan sarato tampek sirkulasi udaro.
- Itiak Pulang Patang
Ornamen ko tamasuak ka dalam ornamen tambuih yang talatak di bagian lubang angin, singok, kisi-kisi, jo janjang. Bantuaknyo basumber dari fauna jo bafungsi sabagai hiasan, tampek sirkulasi udaro, sarato pambateh janjang.
- Daun Puluik-Puluik
Ornamen ko tamasuak ka dalam ornamen tambuih yang talatak di bagian lubang angin. Bantuaknyo manyarupoi flora jo bafungsi sabagai hiasan sarato tampek sirkulasi udaro.
- Saik Galamai
Ornamen ko indak tamasuak ka dalam ornamen yang talatak di pintu muko. Bantuaknyo geomteris jo bafungsi sabagai hiasan di pintu muko.
- Kipeh Cino
Ornamen ko indak tamasuak ka dalam ornamen yang talatak di bagian kusen pintu muko. Bantuaknyo geomteris jo bafungsi sabagai hiasan di di kusen pintu muko.
- Putiak Bungo
Ornamen ko indak tamasuak ka dalam ornamen yang talatak di bagian kusen pintu muko. Bantuaknyo basumber dari flora jo bafungsi sabagai hiasan di kusen pintu muko sarato pintu kamar.
- Rante
Ornamen ko indak tamasuak ka dalam ornamen yang talatak di bagian kusen pintu muko. Bantuaknyo geometris jo bafungsi sabagai hiasan di kusen pintu muko sarato pintu kamar.
- Gigor Buya
Ornamen ko indak tamasuak ka dalam ornamen yang talatak di bagian kusen pintu muko jo biliak. Bantuaknyo basumber dari fauna jo bafungsi sabagai hiasan di kusen pintu muko sarato pintu kamar.
- Awan si Om
Ornamen ko indak tamasuak ka dalam ornamen yang talatak di bagian pintu biliak. Bantuaknyo basumber dari flora jo geomteris sarato bafungsi sabagai hiasan di kusen pintu muko sarato pintu kamar.
- Tulak Angin
Ornamen ko tamasuak ka dalam ornamen yang talatak di bagian kisi-kisi langkan, kisi-kisi janjang jo listplank. Bantuaknyo geometris jo bafungsi sabagai hiasan di kisi-kisi langkan, kisi-kisi janjang jo listplank.
Pola Ruang
[suntiang | suntiang sumber]Tampak Ateh
[suntiang | suntiang sumber]Kok dicaliak dari ateh, tadapek bagian elemen interior rumah gadang ko. Bagian tu sarupo biliak, sarambi, ruang tangah, jo dapua. Biliak bafungsi sabagai tampek panyimpanan barang-barang privasi rumah gadang ko. Pado ruang tangah tadapek tonggak tuo, yaitu tonggak patamo yang diambiak dari sakian banyak tonggak lainnyo yang akan manopang rumah gadang.
Di bagian dapua tadapek janjang, lasuang, tungku, jo alat-alat memasak lainnyo.[7] Lantai di bagian dapua dibuek labiah randah dari rumah induaknyo sarato susunan papan lantai yang labiah ranggang. Hal itu batujuan supayo mamudahan dalam mambarasiahan atau manyapu bagian tu.
Tampak Muko
[suntiang | suntiang sumber]Pado bagian muko akan tampak atok yang punyo sajumlah elemen sarupo singok, listplank, loteang, jo kayu reng. Panutuik atok bagian suok atau kida tabuek dari seng atau anyaman bambu. Bagian palanonyo tabuek dari ijuak atau seng. Tadapek pulo kolong yang tadiri dari pondasi jo buluah panutuik kolong. Kolong tu digunoan untuak taranak jo tampek panyimpanan.
Tampak Sampiang
[suntiang | suntiang sumber]Di bagian sampiang rumah gadang tadapek tonggak tuo yang tadiri dari tiang karangka pambantu jo pondasi. Salain itu tadapek dindiang sampiang yang tabuek dari palupuah.
Rujuakan
[suntiang | suntiang sumber]- Catatan Kaki
- ↑ Rahmat Irfan Denas 2019.
- ↑ a b c Nasbahry Couto 2013, hlm. 6.
- ↑ a b Nasbahry Couto 2013, hlm. 4.
- ↑ Purwanita Setijanti 2012, hlm. 4.
- ↑ a b Desy Aryanti, hlm. 18.
- ↑ Fernando Rullis 2018, hlm. 10.
- ↑ Fernando Rullis 2018, hlm. 15.
- Daftar Pustaka
- Purwanita Setijanti (2012). "Eksistensi Rumah Tradisional Padang dalam Menghadapi Perubahan Iklim dan Tantangan Jaman" (PDF). Institut Teknologi Sepuluh November. Diarsipkan dari versi asli (PDF) tanggal 2020-10-20. Diakses tanggal 2019-09-24.
- Desy Aryanti. "Tipologi Rumah Tradisional Padang".
- Fernando Rullis (2012). "Studi Tentang Bentuk, Fungsi Ornamen dan Penataan Ruang Interior Rumah Gadang Kajang Padati Kota Padang". Universitas Negeri Padang.
- Rahmat Irfan Denas (2019). "Kajang Padati Padang yang Tergerus". Harian Khazanah.