Reksodiwiryo Wiyotoarjo
 | |
| Biografi | |
|---|---|
| Lahia | Malang (id)   |
| Kamatian | 21 Januari 1964 |
| Kagiatan | |
| Karajo | Anggota angkatan basanjato |
Letkol Ckm. dr. Reksodiwiryo Wiyotoarjo (lahia di Malang, Jawa Timur pado 1 Juli 1910 - maningga di Yogyakarta, 21 Januari 1964 pado umua 53 taun) adolah dotor di Indonesia. Inyo mangabdi sabagai dotor tantara di Sumatra Barat jo Riau pado maso pajuangan kamardekaan Indonesia. Inyo parnah manjadi Kapalo Rumah Sakik Pusek Angkatan Darat (RSPAD) Gatot Soebroto, Jakarta dari taun 1952 sampai 1956, katiko itu masih banamo Rumah Sakik Tantara Pusat (RSTP).[1] [2]
Kelahiran dan pendidikan
[suntiang | suntiang sumber]Reksodiwiryo Wiyotoarjo barasa dari Malang, Jawa Timur. Dalam buku Pejuang Kemerdekaan Sumbar-Riau yang disuntiang dek Soewardi Idris, Reksodiwiryo dilahiakan pado 1 Juli 1910.[2]
Reksodiwiryo sakola di Geneeskundige Hoogeschool te Batavia nan biaso disingkek GH te Batavia atau GHS (kini manjadi Fakultas Kadokteran Universitas Indonesia). Di situ, inyo mandapekan gala dotor badah. Reksodiwiryo masuak saangkatan jo Athos Ausri nan sudah tu manjadi dotor jo dipacayo sabagai Kapalo Rumah Sakit Umum Padang.[2]
Manjadi dotor
[suntiang | suntiang sumber]Batugas di Rengat, Riau
[suntiang | suntiang sumber]Sasudah manyalasaian pandidikan di GHS, Reksodiwiryo diangkek dek pamarintah Hindia Balando sabagai dotor Onderafdeling (wilayah adiministratif satingkek kadewanan nan diparintah dek saurang wedana bangsa Balando nan di sabuik Kontroleur) di Rengat, Riau. Inyo di ankek manjadi dotor pado taun 1939.
Pado taun 1942, Japang mulai manduduki Indonesia, tamasak wilayah Rengat. Inyo parnah dicari-cari dek tantaro Japang ka rumahnyo. Tapi tantaro Japang nan mambaok padangnyo hanyo basobok bini sarato anak bungsunyo. Walaupun ado kanai dek padang tantaro tu saketek, bini jo anaknyo salamat. Tantaro Japang tu pai dari rumah karano indak bisa manamukan dotor Rekso.
Sasudah Proklamasi Kamardekaan Indonesia, tantaro Japang pai dari Rengat. Dotor Rekso jo bininyo aktif dalam organisasi nan banamo Gerakan Indonesia Mudo atau GIM. Dek sabagian anak-anak mudo di Rengat, GIM ko disalah artikan jo Geen Indonesische Macht (indak ado kakuasaan Indonesia).
Dek salah arti ko, Dotor Reksi ditangkok dek anak mudo di Rengat kamudian disarahkan ka Polisi Tantara (kini polisi militer). Kaba Dotor Rekso ditangkok sampai ka talingo Komandan TKR/TRI di Riau, dalam hal iko Komandan Resimen IV/Pekanbaru, Letnan Kolonel Hasan Basri. Inyo mamarintahkan Perwira Kasihatan Resimennyo, yaitu Pambantu Letnan Mochtardin, barangkek dari Pakanbaru ka Rengat basamo ciek pleton tantaro.
Sampai di Rengat, Mochtardin jo rombongan basobok jo Kapalo Polisi Tantaro disitu, Letnan Kandow. Salain itu Mochtardin basobok lo Kapalo Anak Mudo di Rengat, Tengku Ali. Dari urang tu dapeklah informasi kalau Dotor Rekso disangko alah maracuni anak-anak mudo di Rengat jo barusaho mamasukkan tantaro Balando (NICA). Akan tetapi, panjalehan babeda didanga Mochtardin dari bini Dotor Rekso kalau salah sangko ko tajadi karano salah paham tantang GIM.
Akhianyo, Mochtardin mangadoan rapek di kantua polisi tantaro di Rengar. Dalam rapek tu, Mochtardin manjalehan kalau tuduhan ka Dotor Rekso itu indak batua. Tapi salah ciek dari aktivis anak mudo tu mandasak supayo dotor Rekso jo kaluarganyo dibunuah. Mandanga itu, Mochtardin maagiah patimbangan kapado masarakaik nan ado basonyo di Rengat hanyo ado 2 urang dotor badah. Kalau dotor Rekso dibunuah berarti hanyo ado surang dotor badah nan masih iduik. Labiah ancak kalau tanago nyo sabagai dotor dimanfaatkan untuak parjuangan kamardekaan Indonesia.
Kiro-kiro 15 hari sasudah rapek tu, Komandan Resimen IV/Pakanbaru Letnan Kolonel Hasan Basri mamarintahkan kalau Dotor Rekso sarato kaluarganyo dibaok ka Bukittinggi malewati Sungai Dareh. Satibonyo di Bukittinggi, Dotor Rekso 'dipareso' dek Kapalo Kasihatan Divisi IX/Banteng, Dotor A. Nazaruddin. Kamudian disarankan untuak basadio manarimo jabatan sabagai Kapalo Dinas Kasihatan Tantara di Sawahlunto jo pangkek Kapten.
Dinas di Sawahlunto
[suntiang | suntiang sumber]Dinas Kasihatan Tantaro di Sawahlunto nan dipimpin dek Dotor Reksodiwiryo, kironyo ado di bawah komando Reseimen III/Kuranji, Padang. Dalam operasionalnyo, baiak itu panyadioan asrama, poliklinik, paviliun tampek parawatan, sarato ubek. Dinas Kasihatan Tantaro di Sawahlunto banyak manggunoan fasilitas Rumah Sakik Ombilin nan dipimpin dek dotor Darwis wakatu itu.[3]
Samaso Dotor Rekso mamimpin Dinas Kasihatan Tantaro di Sawahlunto, inyi parnah marintis palatihan atau pandidikan Parawat Tantaro nan palaksanaanyo bagabuang jo Rumah Sakik Ombilin. Banyak paserta nan ikuik wakatu itu adolah sabanyak 25 urang, tamasuak 4 urang dari Riau.
Katiko tajadinyo Agresi II Balando pado tangga 19 Desember 1949, Dinas Kasihatan Tantaro di Sawhlunto tapaso manuju Alahan Panjang. Di Alahan Panjang, dinas ko hanyo samai tangga 12 Januari 1950. Sasudah itu Alahan Panjang dibom dek Balando nan mambuek 4 urang luko-luko. Dotor Rekso jo timnyo indak dapek manolong 4 urang nan kanai tu, karano Dotor Rekso alah mambukak Rumah Sakik Timbulun atau Muaro Labuah di Solok Selatan. Sajak itu, gerilya kasihatan nan sajatinyo alah dimulai dek dotor Rekso jo anggota Dinas Kasihatan Tantaro Resimen III/Kuranji Padang sajak dari Ombilin jo Alahan Panjang, balajuik ka kawasan - kawasan lainnyo. Ado sabanyak 40 kawasan nan dilalui sapanjang gerilya tu. Dotor Rekso mambaok pulo bini jo anaknyo dalam bagerilya tu
Akhia Kahidupan
[suntiang | suntiang sumber]Pado 25 Juni 1956 Letkol. dr. Reksodiwirjo mangundurkan diri dari dinas militer jo manyarahan jabatannyo kapado Letkol dr. Muhammad Tarekat Prawirowijoto. Basamo jo bininyo, dotor Rekso manatap di Yogyakarta, sampai inyo maningga pado tangga 21 Januari 1964.
Untuak manganangnyo, Kolonel Ahmad Husen mangusuakan kapado Direktur Kasihatan TNI AD supayo namo Rumah Sakik Tantaro nan ado di Padang diabadikan jo namo Rumah Sakik Tantaro Dr. Reksodiwiryo. Katiko paresmian rumah sakik ko bini dotor Rekso didatangkan dari Jakarta kamudian diagiah kahormatan untuak mambukak salubuangnyo.[4]
Kahidupan pribadi
[suntiang | suntiang sumber]Salamo iduiknyo, Dotor Rekso jo bininyo hanyo punyo 2 anak laki-laki. Anak partamo banamo Irawan, inyo maningga dalam kacalakaan pawasat tabang di Pulau Tertane sabagai pilot Angkatan Lauik. Anak kaduonyo banamo Ir Iskandar nan bakarajo di perusahaan swasta di Jakarta. Iskandar punyo duo anak, yaitu Bediantini jo Haris.[4]
Rujuakan
[suntiang | suntiang sumber]- ↑ Langgam.id 2020.
- ↑ a b c Yayasan Pembangunan Pejuang 1945 Sumatra Tengah 2001.
- ↑ Departemen Kesehatan RI 1978.
- ↑ a b Husein, Ahmad 1991.
Daptar Pustaka
[suntiang | suntiang sumber]- "20 Oktober dalam Catatan Sejarah Sumatra Barat". Langgam.id (dalam bahasa Indonesia). 2020-10-20. Diakses tanggal 2020-12-24.
- (dalam bahaso id) Pejuang Kemerdekaan Sumbar-Riau: Pengalaman Tak Terlupakan. Yayasan Pembangunan Pejuang 1945 Sumatra Tengah. 29 Nopember 2001. pp. 134-138. https://books.google.co.id/books?id=Ab1wAAAAMAAJ&pg=PA134&dq=dr+reksodiwiryo&hl=id&sa=X&ved=2ahUKEwjDjaPPga_tAhWBbisKHU7CDYMQ6AEwAXoECAEQAg#v=onepage&q=dr%20reksodiwiryo&f=false.
- Husein, Ahmad (1991). Sejarah Perjuangan Kemerdekaan RI di Minangkabau 1945–1950. Jilid 2. Jakarta: Badan Pemurnian Sejarah Indonesia Minangkabau. https://books.google.co.id/books?id=pBe5aH2yhbwC&q=dr+reksodiwiryo&dq=dr+reksodiwiryo&hl=id&sa=X&ved=2ahUKEwjQ6rOSgq_tAhUPU30KHXkvCYIQ6AEwA3oECAIQAg.
- Sejarah Kesehatan Nasional Indonesia. volume 1. Jakarta: Departemen Kesehatan RI. 29 Nopember 1978. https://books.google.co.id/books?id=NtwKn5i0v3oC&pg=PA144&dq=dr+reksodiwiryo&hl=id&sa=X&ved=2ahUKEwi11uLuga_tAhVJ7XMBHWJPA0wQ6AEwAHoECAEQAg#v=onepage&q=dr%20reksodiwiryo&f=false.