Panyakik batu ampadu

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Panyakik batu ampadu
Namo lainBatu ampadu, kolelitiasis, kolesistolitiasis (batu ampadu pado kanduang ampadu), koledokolitiasis (batu ampadu pado sistem bilier)[1]
Gallstones.png
Batu ampadu biasonyo tabantuak dalam kanduang ampadu dan mamunculan gejala katiko maabek sistem biler (saluran ampadu)
Palafalan
SpesialisasiBadah umum
GejalaIndak ado, keram paruik kanan ateh[2][3][4]
KomplikasiRadang kanduang ampadu, radang pankreas, radang hati[2][4] Rates in many parts of Africa, however, are as low as 3%.[5]
AwitanSalapeh umua 40 taun[2]
Faktor risikoPil KB, kahamilan, riwayaik kaluarga, obesitas, diabetes, sirosis, turun barek badan sacaro capek[2]
DiagnosisManuruik gejala nan dikonfirmasi malalui ultrasonografi[2][4]
PanagahanAtua barek badan, diet tinggi serat, diet randah karbohidrat [2]
ParawatanAsimtomatis: indak ado[2]
Padiah: operasi[2]
PrognosisBaik salapeh dioperasi[2]
Frekuensi10–15% urang gadang (nagara maju)[4]

Panyakik batu ampadu atau kolelitiasis adolah panyakik nan tajadi katiko ado batu nan manyumbek kanduang sarato saluran ampadu inggo mambuek paradangan di sakaliliangnyo. Panyakik ko umum tajadi di nagara maju dan jarang di nagara bakambang. Namun dek samakin baiaknyo kaadaan sosial ekonomi, parubahan menu makan sarato samakin eloknyo sarana diagnosis, utamonyo ultrasonograsi, prevalensi panyakik ko di nagara bakambang condong maningkek.[6]

Faktor risiko tabantuaknyo batu ampadu antaro lain obesitas, diabetes melitus, estrogen, jo kahamilan, panyakik hemolitik (pamacahan komponen darah), jo sirosis.[7] Tando jo gejala dari panyakik ko antaro lain nyeri nan ilang timbua di paruik, paradangan akut di kanduang atau saluran ampadu, sarato komplikasi lain nan tajadi katiko batu sampai di saluran, cando pankreatitis, jo sirosis.[8]

Panyakik batu ampadu marupokan salah satu masalah gastrointestinal nan paliang acok manyababkan dilakukannyo pambadahan. Tiok taun, ado 500.000 tindakan operasi kolesistektomi di Amerika Sarikat. Kolelitiasis tajadi pado sakitar 10% populasi urang gadang di Amerika Serikat.[9] Angko kajadian panyakik ko pun maningkek sairiang patambahan umua.[7] Panalitian pun manunjuakan baso pamaresoan ultrasonografi mandeteksi 60-80% pasien jo batu ampadu nan asimtomatis.[10][11][8]

Tando jo gejala[suntiang | suntiang sumber]

Batu ampadu, talapeh dari barapopun ukurannyo, dapek indak manimbulkan gejala inggo tahunan. Pado kondisi cando ko indak paralu pananganan. Pado kondisi bangkiknyo sarangan batu ampadu, tajadi nyeri nan ilang timbua di sakitaran paruik kanan ateh, disaratoi pulo jo mual jo muntah. Nyeri samakin padiah dalam 30 minik inggo babarapo jam. Dapek pulo tajadi panjalaran nyeri ka antaro tulang balikek atau di bawah bahu kanan. Acok pulo bangkiknyo raso padiah tajadi salapek makan makanan balemah dan ampia taruih tajadi di malam hari atau sasudah minum baralkohol.[12]

Salain nyeri, mual, jo muntah, dapek pulo badan mandamam. Jikok batu maambek saluran dan tajadi kabocoran birilubin inggo saluran darah jo jaringan sakaliliangnyo, dapek pulo tajadi badan manguniang sarato gata. Pado kasus cando ko, kadar enzim hati dalam darah dapek maningkek.[12]

Pado kasus nan labiah jarang, paradangan barek dapek marusak kanduang ampadu inggo mambueknyo malakek ka usus. Hal iko maransang tajadinyo ileus.[13] Kudian dapek pulo muncua komplikasi cando kolangitis asenden, yaitu katiko tajadi infeksi bakteri di sakitaran saluran bilier, sarato pankreatitis akut nan muncua sairiang taambeknyo saluran ampadu nan mambuek enzim pencernaan indak dapek masuak ka usus, dan marusak pankreas.[12] Pado kondisi nan labiah sarik, dapek tajadi kanker kanduang ampadu.[14]

Diagnosis[suntiang | suntiang sumber]

Diagnosis panyakik batu ampadu pado pamaresoan fisik ditandoi jo tando Murphy (Murphy's sign) katiko sadang bangkik raso padiahnyo. Tando Murphy ko dikatokan positif katiko nyeri takan batambah padiah wakato pandarito maelo angok panjang dek kanduang ampadu nan maradang takanai ujuang jari tangan pamareso dan pasien baranti maambiak angok. Umumnyo manjadi panando katiko batu ado dalam kanduang ampadu. Katiko batu maambek saluran ampadu, nan manjadi tando adolah hati manggadang sarato sklera mato ikterik (bagian putiah mato manguniang).[2]

Pamaresoan nan jadi baku ameh (gold standard) untuak managakkan diagnosis adolah jo pamaresoan ultrasonografi (USG). Ultrasonografi mampunyoi darajaik spesifisitas jo sensitifitas nan tinggi untuak mandeteksi batu kanduang ampadu saarato palebaran saluran ampadu intrahepatik (dalam hati) maupun ekstra hepatik (lua hati). Jo USG juo bisa mancaliak dindiang kanduang ampadu nan manaba dek fibrosis atau edema nan disababkan dek paradangan maupun sabab lain. Batu nan ado pado duktus koledukus distal (saluran ampadu nan di ujuang) kadang sulik dideteksi dek taalang dek udaro di dalam.[2]

Tatalaksana[suntiang | suntiang sumber]

Badah[suntiang | suntiang sumber]

Tindakan badah untuak maangkek kanduang ampadu disabuik kolesistektomi. Kolesistektomi mampunyoi 99% paluang untuak managah kakambuahan baliak dari kolellitiasis. Indak adonyo kanduang ampadu di badan indak mampunyoi dampak buruak untuak urang rami. Namun, ado sakalompok ketek urang nan muncua kondisi sindrom pascakolesistektomi (postcholecyctectomy syndrome) nan mambuek mual, gangguan pencernaan, diare, jo nyeri paruik barulang.[15]

Ado duo caro nan dipakai untuak kolesistektomi:[6]

  • Kolesistektomi tabukak (open cholecystectomy) nan dilakukan jo insisi atau sayatan paruik (laparotomi) di bawah tulang iga suok. Paralu 3-5 ari rawatan untuak puliah, jo paralu wakatu sapakan untuak bisa makan jo padok sacaro normal.
  • Kolesistektomi laparoskopik (laparoscopic cholecystectomy), mulai dipakai sajak 1980-an, dilakukan jo mambuek tigo atau ampek lubang ketek untuak mamasuakan kamera jo alaik. Jo caro iko, pasien dapek lansuang pulang di ari nan samo atau bisuak arinyo, lalu istirahaik di rumah salamo babarapo ari jo minum ubek antinyeri.

Sumbatan pado saluran ampadu gadang (common bile duct) dapek cegak jo mamakai taropong endoscopic retrograde sphincterotomy (ERS) following endoscopic retrograde cholangiopancreatography (ERCP).[6]

Konservatif[suntiang | suntiang sumber]

Ursodiol (asam ursodeoksikolat) adolah ubek nan diindikasikan untuak batu empedu radiolusens (kolesterol) nan badiameter kurang dari 20 mm pado pasien nan indak dapek manjalani kolesistektomi. Ubek ko mampunyoi saketek efek inhibitorik (maambek) pado sintesis jo sekresi asam ampadu endogen ka dalam cairan ampadu dan indak mampangaruahi sekresi fosfolipid ka dalam cairan empedu. Salapeh dosis barulang, ubek dapek mancapai kondisi saimbang sasudah kurang labiah 3 pakan. Dosis lazim nan dipakai iolah 8-10 mg/kgBB tabagi dalam 2-3 dosis arian. Intervensi ko paralu wakatu 6-18 bulan dan umumnyo barasia jikok batu barukuran ketek dan murni marupokan batu kolesterol, sarato mampunyoi angko kakambuahan sagadang 50 % dalam 5 taun.[6][16]

Rujuakan[suntiang | suntiang sumber]

  1. Quick, Clive R. G.; Reed, Joanna B.; Harper, Simon J. F.; Saeb-Parsy, Kourosh; Deakin, Philip J. (2013) (dalam bahaso en). Essential Surgery E-Book: Problems, Diagnosis and Management: With STUDENT CONSULT Online Access. Elsevier Health Sciences. p. 281. ISBN 9780702054839. https://books.google.com/books?id=RYhRAAAAQBAJ&pg=PA281. 
  2. a b c d e f g h i j k "Gallstones". NIDDK. November 2013. Diarsipkan dari versi asli tanggal 28 July 2016. Diakses tanggal 1 Desember 2020. 
  3. Lee, JY; Keane, MG; Pereira, S (June 2015). "Diagnosis and treatment of gallstone disease". The Practitioner. 259 (1783): 15–9, 2. PMID 26455113. 
  4. a b c d Ansaloni, L (2016). "2016 WSES guidelines on acute calculous cholecystitis". World Journal of Emergency Surgery : WJES. 11: 25. doi:10.1186/s13017-016-0082-5. PMC 4908702alt=Dapat diakses gratis. PMID 27307785. 
  5. editors, Ronnie A. Rosenthal, Michael E. Zenilman, Mark R. Katlic (2011). Principles and practice of geriatric surgery (edisi ke-2nd). Berlin: Springer. p. 944. ISBN 9781441969996. https://books.google.com/books?id=VcgmpMZE6a8C&pg=PA944. 
  6. a b c d Lesmana L. Batu Empedu dalam Buku Ajar Penyakit Dalam Jilid 1. Edisi 3. Jakarta: Balai Penerbit Fakultas Kedokteran Universitas Indonesia. 2000.380- 4.
  7. a b Schirmer BD, Winters KL, Edlich RF. Cholelithiasis and cholecystitis. J Long Term Eff Med Implants. 2005;15(3):329-38.
  8. a b Malet P.F. Complications of Cholelithiasis, dari Liver and Biliary Diseases, Edisi II, hal 673-691, Editor Kaplowitz N., Williams & Wilkins, 1996
  9. Hunter JG. Gallstones Diseases. In : Schwarzt’s Principles of Surgery 8th edition. 2007. US : McGraw-Hill Companies.826-42
  10. Greenbergen N.J., Isselbacher K.J. Diseases of the Gallbladder and Bile Ducts, dari Harrison’s Principles of Internal Medicine, Edisi ka-14, hal.1725-1736, Editor Fauci dkk. Mc Graw Hill, 1998
  11. Jacobson I.M. Gallstones, dari Current Diagnosis and Treatment in Gastroenterology, Editor Grendell J.H., McQuaid K.R., Friedman S.L., hal. 668-678, Appleton & Lange , 1996
  12. a b c "Gallstones (Cholelithiasis) Clinical Presentation: History, Physical Examination". emedicine.medscape.com. Diarsipkan dari versi asli tanggal 2016-11-14. Diakses tanggal 2020-11-29. 
  13. Fitzgerald JE, Fitzgerald LA, Maxwell-Armstrong CA, Brooks AJ (2009). "Recurrent gallstone ileus: time to change our surgery?". Journal of Digestive Diseases. 10 (2): 149–151. doi:10.1111/j.1751-2980.2009.00378.x. PMID 19426399. 
  14. "Complications". nhs.uk. Diakses tanggal 2020-11-29. 
  15. Zackria, R; Waheed, A (January 2019). "Postcholecystectomy Syndrome". StatPearls. PMID 30969724. 
  16. Bloom AA, Katz J. Cholecystitis. Diunduh tanggal : 1 Desember 2020.