Musajik Tuo Siguntua

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Musajik Tuo Siguntua
Masjid Tua Siguntur
Makam Raja-Raja Siguntur.jpg

Musajik Tuo Siguntua diliek dari kompleks makam

Latak Dusun Ranah, Desa Siguntur, Kecamatan Sitiung, Kabupaten Dharmasraya, Sumatra Barat, Indonesia
Afiliasi agamo Islam
Kapamimpinan Ahli warih Karajaan Siguntua
Deskripsi arsitektur
Jinih arsitektur Musajik
Gaya arsitektur Minangkabau
Spesifikasi
Panjang 13,2 meter
Leba 13,2 meter

Musajik Tuo Siguntua talatak di Dusun Ranah, Nagari Siguntua, Kecamatan Sitiung, Kabupaten Dharmasraya, Sumatra Barat, Indonesia.[1] Musajik iko marupoan paninggalan Karajaan Siguntua nan bangunannyo dipakiroan alah baumua 100 taun labiah.[2][3][4]

Musajik Tuo Siguntua barado sa pakarangan jo pandam pakuburan rajo-rajo Siguntua, nan tapeknyo barado di subalah utara musajik. Di sabelah timur, tadapek rumah gadang paninggalan Karajaan Siguntua. Katigonyo yaitu, musajik, makam, jo rumah gadang alah ditetapkan dek pamarintah Indonesia sabagai cagar budayo pado 2007.[2][5][6]

Arsitektur Musajik Tuo Siguntua mangikuti bantuak musajik tradisional Minangkabau pado umumnyo, yaitunyo badenah pasegi jo atok limas barundak-undak. Konstruksinyo alah mangalami banyak parubahan sajak didirian, di antaranyo panggantian material atok, pondasi, jo dindiang.[7]

Sijarah[suntiang | suntiang sumber]

Siguntua marujuak pado namo daerah nan pernah manjadi pusek Kerajaan Malayu. Daerah Siguntua talatak di hulu Sungai Batanghari. Di kawasan iko, tadapek babarapo paninggalan Hindu-Budha. Siguntua dipakiroan lahia sabagai karajaan sasudah masuaknyo Islam. Namun, indak dikatahui pasti bilo masuaknyo Islam ka wilayah Siguntua.[8]

Maasjik Tuo Siguntua didirian di sisi selatan Sungai Batanghari, karano persis di sabarangnyo tadapek kompleks bangunan paninggalan Hindu-Budha, salah satunyo Candi Pulau Sawah.[9] Indak dikatuhui bilo pastinyo Musajik Tuo Siguntua didirian. Namun, manuruik panalusuran Balai Pelestarian Peninggalan Purbakala (BP3) Batusangkar, bangunannyo nan katiko kini dipakiroan alah baumua labiah dari 100 tahun.[2][3]

Dalam pajalanannyo, musajik iko sempat indak digunoan untuak baribadah, karano kondisi bangunan nan indak layak, tarutamo bagian lantai nan kayunyo alah lapuak.[9] Pamugaran baru dapek dikarajoan dek ahli waris dan masyarakaik satampek pado 1957. Lantai nan samulo bakolong dan tabuek dari papan kayu kini ko alah disemen.[10]

Selanjuiknyo, bagian atok, pondasi, dan dindiang alah diganti jo material baru dek BP3 Batusangkar pado taun anggaran 1992/1993. Salain itu, dilakukan pambongkaran pintu jo jendela, mambuek selasar, paga beton, paga kawek baduri, sarato pintu basi. Pangarajoan akhia barupo pangacetan rangko atok dindiang, pintu, jendela, jo paga tembok.[10][11]

Kini ko, Musajik Tuo Siguntua masih digunoan sabagai tampek ibadah, namun indak manyalanggaroan salat wajib sacaro bajamaah. Kagiatan ibadah wajib dipusekan di musajik nan baru nan barado di sabalah barat musajik. Walau demikian, pado bulan Ramadan, musajik iko manyalanggaroan salat Tarawih bajamaah sarato jo pangajian wirid.[9]

Rupo bangunan[suntiang | suntiang sumber]

Musajik Tuo Siguntua tagak di ateh tanah baukuran 20,44 x 20 meter. Bangunan utamo nan baguno sabagai ruang salat babantuak pasegi baukuran 13,2 x 13,2 meter.[8] Pintu manuju ruang utamo hanyo tadapek di sisi timur, tabuek dari kayu bawarna krem.[12] Pintu tasabuik baukuran 2,15 x 1 meter, badaun duo dan babantuak jalusi (ado ventilasi).[12]

Dindiang bangunan tabuek dari batu batang aia sataba 40 sampai 50 cm nan diplester semen.[2] Musajik iko punyo sapuluah jendela baukuran 1,75 x 0,75 meter nan masiang-masiang badaun duo dan tabuek dari kayu bawarna krem. Satiok daun jendela baukuran 1,75 x 0,37 meter.[10]

Sabagaimano musajik baarsitektur Minangkabau lainnyo, atok Musajik Tuo Siguntua barupo tajug, yaitunyo bantuak limas bujur sangkar barundak-undak jo pamukaan nan malangkuang ka dalam. Atok tabuek dari seng, ditopang dek tiang-tiang babahan kayu ulin. Tiang utamonyo atau disabuik tiang macu punyo diameter 40 cm dan tinggi 7,85 meter.[10][10]

Bangunan mihrab dibuek manjorok kalua di sisi barat baukuran 2,5 x 3 meter. Tadapek mimbar di mihrab musajik, tapi alah indak dipagunoan lai karano Musajik Tuo Siguntua indak digunoan lai untuak salat Jumaik.[2]

Tampek bawuduak tadapek di sabalah utara musajik baukuran 7 x 3 meter nan tabagi dalam tigo ruangan. Iko marupoan bangunan tambahan nan tabuek dari batu simin.[10]

Kawasan Musajik Tuo Siguntua dikalialiangi jo paga beton di bagian mungko dan paga kawek baduri di bagian sampiang dan balakang. Pintu masuak manuju laman musajik barado di bagian timur tabuek dari basi.[2][10]

Pakuburan[suntiang | suntiang sumber]

Musajik Tuo Siguntua barado sa pakarangan jo pandam pakuburan rajo-rajo Siguntua, nan barado di sabalah utara musajik. Pandam pakuburan nyo babantuak sagi limo baukuran 40 x 24,5 meter. Di dalamnyo, tadapek anam pakuburan nan masiang-masiangnyo hanyo ditandoi jo nisan dan jirat dari bata dan batu. Rajo-rajo Siguntua nan bamakam yaitunyo: Sultan Muhammad Syah bin Sora, Sultan Abdul Jalil bin Sultan Muhammad Syah Tuangku Bagindo Ratu II, Sultan Abdul Kadire Tuangku Bagindo Ratu III, Sultan Amirudin Tuangku Bagindo Ratu IV, Sultan Ali Akbar Tuangku Bagindo V, dan Sultan Abu Bakar Tuangku Bagindo Ratu VI.[2][10][6]

Rujuakan[suntiang | suntiang sumber]

Daftar pustaka[suntiang | suntiang sumber]