Marthias Dusky Pandoe

Martias Duski Pandoe adolah urang nan lahia di provinsi Sumatera Barat, tanggal 10 Mei 1930 di Lawang, Kabupaten Agam, anak katigo dari limo baradiak kakak. Ayahnyo, Dusky adolah seurang ulama tradisional dan ibunyo Jawani. Namo Pandu ditambahan karano wakatu tu di Lawang ado garakan Kapanduan al-Hilal, anak organisasi Permi, dan Martias acok manyalinok di antaro barisan pandu tu.

Martias Duski Pandoe adolah seurang wartawan terkemungko di sumatera barat sakitaran taun 1960-1990 an. Pado wakatu ketek inyo mandapaek pandidikan agamo sacaro tradisional di surau, baraja mangaji (mambaco) al-qur'an jo sistem halaqah. Kamudian inyo baraja di sakolah rakyat (SR), katiko sanjo baraja di sakolah agamo ibtidaiyah muhammadiyah di pasa Lawang. Pandidikannyo basambuang ka sakolah lanjutan patamo Jongens Standar Vervolkscholl untuak sakolah formal sadangkan sanjonyo masuak Tsanawiyah, juo punyo muhammadiyah. Inyo sempat pindah ka Tsanawiyah Panyinggahan di tapi Danau Maninjau, tapi sampai kelas 2 (duo) karano alah indak batah lai. Marthias sajak ketek sangaik akrab jo kahidupan kampuang nan sangaik bersahaja, mangimpau kabau. Sajak awal Agustus taun 1945, inyo indak lai basikolah, inyo labiah acok maabihan wakatu di pasa manjuaan sabun, rokok, korek api, jo barang-barang lainnyo. Pado taun 1945-an inyo marantau ka Palembang, asalnyo hiduik sabagai panjua rokok. Nasib nyo barubah sajak di angkek sabagai anak dek pengusaho kayo Tuan Abdullah, karajo sabagai pancataik kapa masuak jo kalua.