Maisi sasuduik
.jpg)
Maisi sasuduik (biaso disingkek sasuduik atau manyuduik; diijo pulo manyuduk) marupoan salah satu rangkaian tradisi panikahan urang Minangkabau di Luhak Limo Puluah Koto. Tradisi iko manjadi syaraik bagi pihak laki-laki untuk maminang padusi.[1] Banamo maisi sasuduik dikaranokan syaraik nan musti ditabuih dek laki-laki yaitu malangkoki kalangkokan isi biliak padusi,[2] paliang saketek barupo: dipan, kasua, meja badak, sarato lamari baju; salabiahnyo disasuaian jo kasanggupan dari pihak laki-laki.[3][4]
Tradisi manyuduik hanyo basipaik adat salingka nagari nan aratinyo tradisi iko hanyo balaku di wilayah Limo Puluah Koto (daerah Kabupaten Lima Puluh Kota jo Payakumbuah kini). Kok ado panikahan nan beda nagari sarato balain adaik inggo babeda luak, tradisi iko buliah ado buliah indak sasuai mupakaik kaduo pihak nan ka manikah. Sairiang jo sistem badunsanak nan dipakai dek budayo Minangkabau yaitu matrilineal, hal iko barakibaik suami musti tingga di rumah mintuonyo sainggo maisi sasuduik diraso paralu.[5][1]
Tradisi manyuduik panah pulo diangkek dalam sabuah film pado 2013 nan bajudul Salisiak Adaik. Film tasabuik maangkek pabedaan adaik nan saliang batulak balakang antaro adaik Piaman jo Payokumbuah. Di Piaman, ado adaik bajapuik nan ma pihak padusi maanta sajumlah pitih ka pihak laki-laki, sadangkan di Payokumbuah mamakai adaik sasuduik.[6][7]
Kalangkokan
[suntiang | suntiang sumber]Syaraik nan musti ditabuih dek laki-laki yaitu malangkoki kalangkokan isi biliak padusi. Isi billiak paliang saketek barupo: dipan, kasua, meja badak, sarato lamari baju, salabiahnyo disasuaian jo kasanggupan dari pihak laki-laki. Jikok si laki-laki barasaki labiah buliah dilangkoki sampai ka aleh kasua, kain saok, kalambu, badak-badak sarato kalangkokan biliak mandi. Kini, maisi sasuduik indak hanyo barupo barang nan tampak mode nan tasabuik sabalunnyo, tapi alah buliah dalam bantuak pitih tunai. Nan kudian pihak padusi nan mambalanjoan tapi musti untuak kaparaluan biliak. Kok kalangkapan biliak alah sudah dan diraso cukuik, tapi piti masih ado basiso baru buliah dibalian ka bantuak nan lain, cando kaparaluan untuak mampaelokan rumah. Nan indak buliah adolah jikok pitih maisi sasuduik dipakai untuak bahan-bahan pangan kaparaluan alek panihakan.[5][3][4]
Adat
[suntiang | suntiang sumber]Pakaro maisi sasuduik disampaikan wakatu acara manaiakan siriah atau dalam tradisi Luhak 50 Koto disabuik "makan lamang", ado pulo nan manyabuiknyo manjarah. Wakatu palaksanaan iko kurang labiah duo bulan, paliang lambek sabulan, sabalun dilaksanakan akad sainggo maisi sasuduik salain manjadi syaraik panihakan juo manjadi tando mulo baso rancana panikahan kaduo balah pihak alah samo-samo direstui dan indak diungkai lai atau basifaik maikek. Kok ado salisiah paham atau masalah di kudian ari sabalun acara akad balansuang mangko isi sasuduik ka manjadi panantu kaluarga mano nan mamulai masalah. Katiko isi sasuduik dikaluaan sarato dibaliakan ka pihak nan laki-laki mangko disimpulkan baso pihak padusilah nan maungkai janji, atau sabaliaknyo kok isi sasuduik indak dibaliakan mangko pihak laki-lakilah nan maungkai janji.[4]
Caliak pulo
[suntiang | suntiang sumber]Rujuakan
[suntiang | suntiang sumber]- ↑ a b Devi, Silvia (2014) (dalam bahaso Indonesia). Kedudukan dan peran bundo kanduang dalam sistem kekerabatan matrilineal di Minangkabau. Padang: Direktorat Jenderal Kebudayaan. http://repositori.kemdikbud.go.id/13015/.
- ↑ emen (2015-06-15). "4 Masalah Percintaan di Minangkabau Yang Memilukan". infoSumbar (dalam bahasa Indonesia). infosumbar. Diakses tanggal 2019-09-22.
- ↑ a b Umulhusni, Annisa (2019-06-27). "Uang Sasuduik dalam sistem perkawinan di Nagari Situjuah Gadang Kecamatan Situjuah Limo Nagari Kabupaten Lima Puluh Kota Provinsi Sumatera Barat" (dalam bahasa Indonesia). Diarsipkan dari versi asli tanggal 2019-09-22. Diakses tanggal 2019-09-22.
- ↑ a b c "TRADISI MAISI SASUDUIK DI NAGARI BATUHAMPAR KABUPATEN LIMA PULUH KOTA MENURUT PERSPEKTIF HUKUM ISLAM". Zishof eLibrary (dalam bahasa Indonesia). Diarsipkan dari versi asli tanggal 2019-09-22. Diakses tanggal 2019-09-22.
- ↑ a b Arnita, Arnita (2017). "Hantaran Sasuduik pada Adat Perkawinan di Kanagarian Koto Nan Gadang Kota Payakumbuh" (dalam bahasa Indonesia). Diakses tanggal 2019-09-22.
- ↑ InfoSumbar (2016-10-03). "10 Fakta Tentang Film Salisiah Adaik". infoSumbar (dalam bahasa Indonesia). Diakses tanggal 2019-09-22.
- ↑ R, Iwan. "Kisah 'Salisiah Adaik' Payakumbuh dan Pariaman Dipertontonkan di Payakumbuh". KlikPositif (dalam bahasa Indonesia). Diarsipkan dari versi asli tanggal 2019-03-09. Diakses tanggal 2019-09-22.
