Luak

Wikipedia Minangkabau - Lubuak aka tapian ilimu
(Dialiahkan dari Luhak)
Loncat ke navigasi Loncat ke pencarian

Luak iko adolah namo wilayah nan marupoan daerah asli nenek-moyang urang Minang. Luak disabuik juo jo wilayah Darek atau Luak Nan Tigo.

  1. Luak Tanah Data, disabuik juo Luak Nan Tuo. Ungkapan untuak Luak Tanah Data: "Buminyo lembang, aianyo tawa, ikannyo banyak". Warna bendera: Kuniang.
  2. Luak Agam, disabuik jo Luak Nan Tangah. Ungkapan untuak Luak Agam: "Buminyo angek, aianyo karuah, ikannyo lia". Warna bendera: Sirah.
  3. Luak Limo Puluah, disabuik jo Luak Nan Bungsu. Ungkapan untuak Luak Limopuluah: "Buminyo sajuak, aianyo dingin, ikanyo jinak". Warna bendera: Hitam.

Tambo[suntiang | suntiang sumber]

Manuruik Tambo Alam Minangkabau, daulu katiko nenek moyang urang Minang masih tingga di puncak Gunuang Marapi, ado tigo sumua atau disabuik jo luak. Ado sabuah sumua (luak) nan talatak di tanah nan data. Urang nan ado di salingka luak tu, dapek minum disinan, nan kamudian hari katurunannyo mambukak daerah nan dinamokan Luak Tanah Data. Ado pulo sabuah sumua nan ditumbuhi rumpuik mansiang. Urang nan tingga di salingka sumua tu minum ka sinan, mako daerah nan dibukak katurunannyo disabuik Luak Agam. Sumua katigo manjadi tampek minum 50 keluarga. Kudian hari, daerah nan dibukak katurunan kaluargo tu dinamokan Luak Limopuluah.

Rantau[suntiang | suntiang sumber]

Satiok luak mampunyoi wilayah Rantau surang-surang:

  • Masyarakaik Luak Tanah Data marantau ka arah barat jo tenggara (Jambi, Kuantan, Painan, Indropuro, dll).
  • Masyarakaik Luak Agam, marantau ka arah utara jo barat (Pasaman, Panti, Rao, Lubuak Sikapiang, dll).
  • Masyarakaik Luak Limopuluah marantau ka arah daerah Riau darek (Kampar Kiri, Kampar Kanan, Rokan, Bangkinang, Rumbio, dll).

Salain itu ado juo wilayah nan disabuik Ujuang Darek Kapalo Rantau, iyolah daerah bateh wilayah Luak jo Rantau.