Klindamisin

Wikipedia Minangkabau - Lubuak aka tapian ilimu
Loncat ke navigasi Loncat ke pencarian
Klindamisin
Clindamycin Structural Formula V2.svg
Clindamycin 3D 3jz0.png
Data klinis
Palafalan /klɪndəˈmsn/
Namo dagang Cleocin, Clinacin, Dalacin, lainnyo
Namo lain 7-chloro-lincomycin
7-chloro-7-deoxylincomycin
AHFS/Drugs.com Monograph
MedlinePlus a682399
Lisensi data
Kategori pado kahamilan
  • AU: A
  • US: B (No risk in non-human studies)
Rute
masuak ubek
oral, topikal (pamakaian lua), suntik (IV atau IM), intravaginal
Kelas ubek Makrolida
Kode ATC
Status legal
Status legal
Farmakokinetik data
Bioavailabilitas 90% (muluik)
4–5% (topikal)
Ikatan protein 95%
Metabolisme Hepar
Eliminasi wakatu paruah 2–3 jam
Ekskresi Saluran ampadu jo ginjal (kiro-kiro 20%)
Identifiers
Nomor CAS
PubChem CID
DrugBank
ChemSpider
UNII
KEGG
ChEBI
ChEMBL
CompTox Dashboard (EPA)
ECHA InfoCard 100.038.357 Sunting ini di Wikidata

Klindamisin adolah sajinih ubek antibiotik turunan dari eritromisin nan masuak dalam golongan makrolida.[1] Antibiotik ko dipakai untuak malawan infeksi barek nan disababkan dek bakteri anaerob atau pun bakteri aerob sarupo streptokokus, stafilokokus, pneumokokus, sarato protozoa. Panyakik-panyakik nan biasonyo diubek jo ubek ko antaro lain infeksi tulang, infeksi sandi,[2] infeksi paradangan panggua (pelvic inflamatory disease), radang tabuang angok (faringitis), infeksi talingo tangah, radang paru (pneumonia), inggo masalah kulik sarupo jirawek (akne). Klindamisin dapek pulo dijadikan ubek panagah muncua (profilaksis) panyakik radang jantuang (endokarditis) ataupun pangganti ubek penisilin pado urang nan alergi jo penisilin.[3] Klindamisin tasadio dalam bantuak ubek minum kapsul (oral), suntik (intravena), jo oles (topikal) pado pamukaan kulik.[4]

Indikasi[suntiang | suntiang sumber]

Klindamisin dipakai pado pasien nan tainfeksi bakteri Staphylococcus aureus, Streptococcus viridans, Streptococcus pneumoniae, Streptococcus pyogenes, jo Actinomyces israelli. Salain itu, klindamisin aktif pulo untuak manyarang bakteri Bacteriodes fragilis sarato anaerobik lainnyo. Walau baitu, klindamisin tatap dipatimbangkan hanyo untuak infeksi barek atau sangaik barek dek ado efek sampiang kolitis pseudomembranosa nan marupokan infeksi bakteri lain.[5]

Salain dapek dipakai untuak malawan bakteri, klindamisin dapek dipakai pulo untuak malawan parasit protozoa, sarupo Plasmodium fasiparum. Parasit ko marupokan panyabab malaria. Klindamisin diagiah dalam bantuan kombinasi jo klorokuin atau kuinin nan ekfektif gunonyo untuak pasien anak. Dalam bantuak kombinasi jo kuinin, manjadi piliahan untuak padusi nan manganduang utamonyo di daerah nan alah resisten jo klorokuin.[6][7] Walau baitu, alah ado Plasmodium falciparum nan resisten jo klindamisin bak cando nan ditaliti di urang Amazon Peru.[8]

Efek sampiang[suntiang | suntiang sumber]

Efek sampiang umum nan muncua dek klindamisin antaro lain mual, muntah, ruam sirah, raso indak nyaman di paruik, jo gangguan ginjal.[3] Diare dilaporkan tajadi pado 2-22% pamakai ubek ko. Bisa pulo tajadi kaluahan kolitis pseudomembranosa nan ditandoi jo damam, padiah di paruik, diare badarah, jo adonyo lendir pado feses. Gejala-gejala ko dapek muncua salamo terapi jo ubek ko atau bapakan-pakan sasudah terapi. Kok dipareso jo manaropong ka dalam paruik (prostoskopi) ka tampak adonyo lapisan-lapisan (membran) putiah kakuniangan pado pamukaan usus gadang (kolon). Kaluhan kolitis dilaporkan muncua pado 0,1--10% pasien. Hal iko disababkan dek toksin nan dihasiakan dek bakteri Clostridium difficile. Bakteri ko sabananyo bukan bakteri nan biaso ado di usus (flora normal). Panyakik ko disabuik juo sabagai kolitis psudeomembranosa tarasosiasi jo antibiotik (antibiotic-associated pseudomembranosa colitis) dek biaso muncua pado pasien nan kabanyakan diagiah antibiotik, khususnyo klindamisin. Ubek musti diantian pamakaiannyo kok gejala diare atau kolitis tu lah muncua dan dapek diganti jo ubek lain, sarupo vankomisin atau metronidazol.[5]

Sediaan[suntiang | suntiang sumber]

Klindamisin tasadio dalam bantuak ubek minum, ubek suntik, jo ubek pamakaian lua. Ubek minum klindamisin tasadio dalam bantuak kapsul jo dosis 75, 150, jo 300 mg. Pado anak-anak ubek tasadio dalam bantuak suspensi (larutan) minum 75mg/5mL. Namun, anak-anak kurang katuju dek baunnyo. Pado pamakaian suntik, baiak untuak suntikan vena (intravena) atau suntikan otot (intramuskular), dipakai bantuak larutan klindamisin fosfat 150mg/mL dalam ampul 2 jo 4 mL. Untuak pamakaian lua, tasadio dalam bantuak gel, lotion,foam, jo krim.[9][4][10]

Interaksi[suntiang | suntiang sumber]

Interaksi jo ubek lain dapek babeda-beda. Pado interaksi jo eritromisin (makrolida lainnyo) atau kloramfenikol dapek mamunculan efek antagonis dek caro karajo nan samo. Samantaro jo golongan ubek paambek saraf otot (neuromuscular blocking drugs) sarupo vekuronium, dapek mampalamo maso karajo ubeknyo.[3][11]

Caro karajo[suntiang | suntiang sumber]

Klindamisin marupokan ubek bakteriostatik, bakarajo jo maambek pambuatan (sintesis) protein bakteri pado tingkek ribosom 50S sainggo pakambangbiakan bakteri dapek taranti. Klindamisin juo dapek manjadi bakterisidal (mambunuah bakteri) bagantuang pado konsentrasi ubek, bakteri, sarato lokasi infeksi.[9]

Rute masuak ubek klindimisin nan babeda juo mahasiakan daya serap tubuah nan babeda. Pado rute oral (muluik), ubek ampia dapek taserap panuah. Ubek ko pun indak tapangaruah jo makanan dalam lambuang. Kadar puncak ubek ko tacapai dalam wakatu 1 jam jo rute oral, sadangkan jo rute suntik (intramuskular) dicapai dalam satu inggo tigo jam. Samantaro untuak wakatu paruah dapek mancapai 2-3 jam dan samakin panjang pado pandarito gangguan ginjal atau hepar.[5][9]

Klindamisin dapek taseba laweh ka babagai cairan tubuah, tulang, jo jaringan. Namun, indak dapek masuak sampai ka cairan serebrospinal (cerebrospinal fluid), di utak atau sumsum tulang balakang, walaupun sadang tajadi infeksi selaput utak (meningitis). Di dalam tubuah, 90% klindamisin ka tarikek jo protein albumin sainggo basamo aliran darah dapek pulo malalui sawar plasenta antaro mandeh jo janin pado padusi nan manganduang.[5]

Klindamisin maalami metabolime di hepar sainggo pandarito gangguan hepar musti labiah baelok-elok dalam pamakaiannyo.[3] Kudian klindamisin dikaluakan dari tubuah sabagian gadang malaui urin jo saketek nan malalui ampadu. Hanyo 10% klindamisin nan tabuang dari tubuah.[5]

Rujuakan[suntiang | suntiang sumber]

  1. BPOM Makrolida.
  2. Smieja, Marek. Current indications for the use of clindamycin: A critical review. Pulsus Group Inc. OCLC 804434375. http://worldcat.org/oclc/804434375. 
  3. a b c d BPOM Klindamisin.
  4. a b Swari.
  5. a b c d e FK UI, hlm. 727.
  6. "Clindamycin as an Antimalarial Drug: Review of Clinical Trials". Antimicrobial Agents and Chemotherapy 46 (8): 2315–20. 5 Juli 2002. doi:10.1128/AAC.46.8.2315-2320.2002. ISSN 0066-4804. PMID 12121898. PMC 127356. Diarsipan dari nan asli pada 29 September 2011. https://web.archive.org/web/20110929084456/http://aac.asm.org/cgi/reprint/46/8/2315.pdf. 
  7. "Treatment of malaria in the United States: a systematic review". JAMA 297 (20): 2264–77. 5 Juli 2007. doi:10.1001/jama.297.20.2264. PMID 17519416. 
  8. "Genome scanning of Amazonian Plasmodium falciparum shows subtelomeric instability and clindamycin-resistant parasites". Genome Research 20 (11): 1534–44. 5 Juli 2010. doi:10.1101/gr.105163.110. PMID 20829224. 
  9. a b c "Cleocin, Clindesse (clindamycin) dosing, indications, interactions, adverse effects, and more". reference.medscape.com. Diakses tanggal 2019-12-09. 
  10. LiverTox: Clinical and Research Information on Drug-Induced Liver Injury [Internet]. Bethesda (MD): National Institute of Diabetes and Digestive and Kidney Diseases; 2012-. Clindamycin. [Updated 2017 Oct 12].
  11. "Clindamycin-induced neuromuscular blockade". Can J Anaesth 42 (7): 614–7. 5 Juli 1995. doi:10.1007/BF03011880. PMID 7553999. 

Daftar pustaka[suntiang | suntiang sumber]

  • BPOM. "5.1.5 Makrolida". Pusat Informasi Obat Nasional. Badan Pengawas Obat dan Makanan Republik Indonesia. Diakses tanggal 9 Desember 2019. 
  • BPOM. "Klindamisin". Pusat Informasi Obat Nasional. Badan Pengawasan Obat dan Makanan Republik Indonesia. Diakses tanggal 9 Desember 2019. 
  • Swari, Risky Candra (10 Agustus 2018). "Clindamycin obat apa?". Hello Sehat. Hello Health Group Pte. Ltd. Diakses tanggal 9 Desember 2019. 
  • FK UI (2009). Farmakologi dan Terapi Edisi 5. Jakarta: Balai Penerbit FKUI. ISBN 9789791610407.