Kartu kredit

Wikipedia Minangkabau - Lubuak aka tapian ilimu
Kartu kredit bamerek visa jo mastercard

Kartu kredit adolah sabuah alaik pambayaran sacaro non tunai nan manggunoan kartu nan dikaluan dek bank. Kartu kredit dapek mambantu sasaurang untuak malakuan transaksi di muko nan kamudian dibayaian dek pihak bank talabiah daulu, namun pado akhianyo urang nan mamakai kartu kredit tasabuik harus mambayia nominal nan alah di tantuan dek pihak bank satiok awa bulan ka bank basangkutan. Urang nan mamakai kartu kredit ko mampunyoi wakatu nan fleksibel untuak babalanjo, salain itu kartu kredit ko dapek pulo malayani transaksi sacaro onilne.[1] Kartu kredit manjadi hal nan sangaik baguno untuak nasabah nan mangarati jo bijak dalam caro pamakaiannyo tapi akan badampak negatif jiko nasabah nan punyo kartu kredit ko indak mangatahui aturan main dari kartu kredit.[2]

Sijarah[suntiang | suntiang sumber]

Sistem pambayaran samacam iko mulai muncua katiko babarapo pom bensin jo toko-toko di Amerika mampakenalkan samacam kartu babalanjo pada tahun 1900-an. Kartu ko samacam kartu member nan batujuan untuk konsumen supayo loyal atau setia babapanjo di tampek tasabuik. Pada tahun 1946, mulailah dipakenalkan pamabayaran jo manggunoan sistem kartu kredit nan diprakarsai dek institusi perbankan nan banamo Flatbush National Bank of Brooklyn. Tujuannyo tantu sajo untuak mamudahan konsemen untuak batransaksi jo toko-toko nan juo marupoan nasabah dari bank tasabuik. Tahun 1950, Frank McNamara bersama rekannyo, Ralph Schneider datang ka sabuah restoran nan kamudian mambayia tagiahan makan malamnyo dengan manggunoan kartu nan unik. Sabalumnyo, baliau makan malam basamo kawan-kawannyo, namun inyo lupo mambawo dopet untuak mambayia. Akhianyo inyo mancari solusi sabagai pangganti pitih tunai atau dompet. Ikolah nan manjadi cikal baka pambayaran manggunoan sistem kredit.[3]

Pada tahun 1958, American Express mangaluakan kartu kreditnyo nan banamo AMEX. Kamudian disusul dek Bank of America mangaluaan kartu kreditnyo nan pliang tanamo yaitunyo VISA. Salanjuiknyo pado tahun 1970-an, pamarintah Amerika mangaluaan regulasi kabijakan manganai aturan jo panggunaan kartu kredit. Samanjak itu, parusahaan kartu kredit bakambang pesat hinggo kasaluruah dunia.[3]

Jinih-jinih kartu kredit[suntiang | suntiang sumber]

Kartu kredit manuruik limitnyo[suntiang | suntiang sumber]

Kartu kredit jinih iko dibagi manjadi babarapo jinih kartu badasakan limit nan diagia dek pihak bank kapado si pangguno kartu, yaitu nyo Classic, Gold, Platinum, signature, jo Infinite.[4]

Kartu kredit manuruik afiliasinyo[suntiang | suntiang sumber]

Kalau dicaliak kartu kredit manuruik afiliasinyo, kartu kredit nan iko dibagi manjadi kartu kredit affinity, sarupo kartu kredit mastercard jo visa, kartu kredit co-branding, jo kartu kredit private label.[4]

Kalabaiahan jo kakurangan kartu kredit[suntiang | suntiang sumber]

Kalabiahan kartu kredit adolah kartu kredit maagia konsumennyo babarapo fasilitas - fasilitas sarupo adonyo cicilan, promo, salalu mambayia tagihan minimum jo dapek tarik tunai saroman kartu debit untuak kaparluan mandasak. Sadangkan kalemahannyo adolah boros, dapek kanai bungo tinggi dari tarik tunai, kamudian tamabahannyo akibaik adonyo kawajiban mambayaia tagihan minimum mako dapek manyababkan utang manjadi samakin tinggi.[5]

Pabedaan kartu kredit jo kartu debit[suntiang | suntiang sumber]

Kartu kredit marupoan alaik pambayaran manggunoan kartu nan dapek digunoan untuak malakuan pambayaran ateh kawajiban nan timbua dari suatu kagiatan ekonomi. Kawajiban tasabuik dipanuahi talabiah dahulu dek penerbit atau pihak bank, kamudian pamegang kartu bakawajiban untuak malakuan pambayaran pado wakatu nan alah disapakati antaro pamegang kartu jo pihak bank. Sadangkan, kartu debit adaoah pambayaran dengan manggunoan kartu nan dapek digunoan untuak malakuan pambayaran ateh kawajiban nan timbua dari suatu kagiatan ekonomi. Kawajiban tasabuik dipanuahi sakatiko dengan mangurangi sacaro langsung simpanan atau saldo si pamegang kartu debit nan dilakuan dek pihak bank atau lambago salain bank nan bawenang untuak manghimpun atau manarik dana dari pamegang kartu tasabuik.[6].

Rujuakan[suntiang | suntiang sumber]

  1. "Apa Itu Kartu Kredit? Seperti Apa Memanfaatkannya?". www.cimbniaga.co.id. Diakses tanggal 2021-04-14. 
  2. Partners, Steven Ransingin-Aidil Akbar Madjid &. "Ini Dia 7 Jenis Biaya Kartu Kredit". detikfinance (dalam bahasa Indonesia). Diakses tanggal 2021-04-15. 
  3. a b Rahayu A, Fitri, Irmawati, Sri Hermuningsih (2011). "Perkembangan Kartu Kredit di Indonesia". Jurnal Manajemen. Vol.1: 5. 
  4. a b "Memahami Kembali Apa Itu Kartu Kredit dan Pentingnya untuk Kehidupan Modern". www.maybank.co.id. Diakses tanggal 2021-04-14. 
  5. Media, Kompas Cyber. "Hindari 3 Masalah Kartu Kredit Ini agar Hidupmu Tenang Halaman all". KOMPAS.com (dalam bahasa Indonesia). Diakses tanggal 2021-04-15. 
  6. "Perbedaan Kartu Kredit dan Debit, Pahami Kelebihannya Masing-masing Halaman 2". merdeka.com (dalam bahasa Inggris). 2020-10-17. Diakses tanggal 2021-04-15.