Jayanagara
| Jayanagara | |||||
|---|---|---|---|---|---|
| Sri Maharaja Wiralandagopala Sri Sundarapandya Dewa Adhiswara | |||||
| Maharaja Majapahit ke 2 | |||||
| Bakuaso |  Majapahit (1309 - 1328) | ||||
| Pandaulu | Kertarajasa Jayawardhana | ||||
| Panaruih | Tribhuwana Wijayatunggadewi | ||||
| Bhre Daha | |||||
| Bakuaso | 1295 – 1309 | ||||
| Panaruih | Rajadewi Maharajasa Dyah Wiyat | ||||
| Lahia | Garbhopati Kalagemet 1294 | ||||
| Maningga | 1328 Majapahit | ||||
| Pamakaman | 1329 Istana Kapopongan, Antawulan (Trowulan) | ||||
| Dinasti | Wangsa Rajasa | ||||
| |||||
| Ayah | Kertarajasa Jayawardhana | ||||
| Mandeh | Indreswari (biologis) Tribuaneswari (adopsi) | ||||
| Agamo | Siwa-Buddha | ||||
Jayanagara (lahir: 1294 - maningga: 1328 adolah maharajo kaduo Kakaisaran Majapahit nan mamarentah pado taun 1309-1328,[1][2] jo gelar abhisek Sri Maharaja Wiralandagopala Sri Sundarapandya Dewa Adhiswara.[3] Pamarentahan Jayanagara marupoan masa kacau dalam sajarah awal Kakaisaran Majapahit. Manuruik kitab Pararaton, inyo surang mati dek Ra Tanca, tabib istana inyo.[2]
Asal-Usua
[suntiang | suntiang sumber]Manuruik Pararaton, namo asli Jayanagara adolah Kalagemet[4] anak Wijaya jo Darah Patak. Ibunyo barasa dari Karajaan Dharmasraya di Pulau Sumatera.[3] Inyo dibawok kebo Anabrang ka tanah Jawa sapuluah hari sasudah pengusiran pasukan Mongol dek pihak Majapahit. Wijaya nan sabalunnyo punyo duo istri putri Kertanagara, kamudian mambuek Dara Petak manjadi bini Tinuheng Pura, atau "istri nan diturunkan di istano".[2]
Manuruik Pararaton, pangusiran pasukan Mongol jo pambangunan Karajaan Majapahit tajadi pado taun 1293-1294.[5] Dikutiko kronik Cina dari dinasti Yuan, pasukan nan dipimpin dek Ike Mese itu maninggakan Jawa pado 24 April 1293. Naskah Nagarakretagama juo manyabuik angka taun 1293. Jadi, jikok kaba-kaba di ateh digabungkan, mako kadatangan Kebo Anabrang jo Dara Petak dapek dipastikan tajadi pado tanggal 4 Mei 1293, jo kelahiran Jayanagara tajadi pado taun 1294.
Namo Dara Petak indak ditamui dalam Nagarakretagama jo prasasti-prasasti peninggalan Majapahit. Manuruik Nagarakretagama, Wijaya indak hanyo manikah jo duo, tapi ampek putri Kertanagara, iyolah Tribhuwaneswari, Narendraduhita, Jayendradewi, jo Gayatri.[4] Tapi Jayanagara dilayiekan dek surang padusi nan banamo Indreswari. Hal iko manyababkan dugaan baso Indreswari adolah namo lain dari Dara Petak.[3]
Naiak tahta
[suntiang | suntiang sumber]Rajo mudo
[suntiang | suntiang sumber]Nagarakretagama manyabuik Jayanagara diangkek sabagai yuwaraja atau rajo mudo di Kadiri atau Daha pado taun 1295.[4] Namo Jayanagara juo tacatat dalam prasasti Penanggungan pado taun 1296 sabagai putra mahkota. Maingek Raden Wijaya manikah jo Darah Patak pado taun 1293, maka Jayanagara dapek dipastikan masih sangaik ketek pado wakatu diangkek sabagai rajo mudo. Tantu pamarentahannya diwakili dek Lembu Sora nan disabuik dalam prasasti Pananggungan nan manjabaik sabagai batu Daha.
Dari prasasti tasabuik dapek juo dikatawui baso Jayanagara adolah namo asli sajak ketek atau Garbhopati, bukan namo gelar atau abhisek. Samantaro namo Kalagemet nan dikatokan Pararaton sacaro jaleh punyo nada ma olok, dek namo iko aratinyo "jahat" jo "lemah", itu dikarenakan kapribadian Jayanagara nan dipenuhi jo parilaku amoral namun lamah sabagai panguwaso sahinggo banyak pambrontakan nan timbua pado maso pamarentahannyo.[4]
Rajo Majapahit
[suntiang | suntiang sumber]Jayanagara naik tahta manjadi rajo Majapahit manganti apaknyo nan manuruik Nagarakretagama maningga pado taun 1309.[6] Dari Piagam Sidateka nan ditarui pado taun 1323, Jayanagara manatapkan susunan mahamantri katrini dalam bantuak pamarentahannyo, iyolah sabagai barikuik:[6]
- Rakryan Mahamantri Hino: Dyah Sri Rangganata
- Rakryan Mahamantri Sirikan: Dyah Kameswara
- Rakryan Mahamantri Halu: Dyah Wiswanata
Pambarontakan nan tajadi
[suntiang | suntiang sumber]Manuruik Pararaton, pamarintahan Jayanagara ditamui dek banyak pambrontakan dari pangikuik apaknyo. Hal iko disababkan dek Jayanagara adolah rajo jo darah campuran Jawa-Melayu, indak katurunan Kertanagara murni.[6] Pambarontakan partamo tajadi pado wakatu Jayanagara naik tahta, iyolah dikarajokan dek Ranggalawe pado taun 1295 dan kamudian Lembu Sora pado taun 1300. Dalam hal iko pangarang Pararaton kurang ati-ati karano Jayanagara baru manjadi rajo pado taun 1309. Mungkin nan bana, pambarontakan Ranggalawe tajadi pado wakatu Jayanagara ditantukan sabagai rajo mudo atau putra mahkota. Mungkin ikolah pambrontakan Ranggalawe nan tajadi pado taun 1309.
Pararaton juo manyampaikan pambarontakan Juru Demung pado taun 1313, Gajah Biru pado taun 1314, Mandana jo Pawagal pado taun 1316, jo Ra Semi pado taun 1318. Tapi, manuruik Kidung Sorandaka, Juru Demung jo Gajah Biru mati samo-samo jo Lembu Sora pado taun 1300, samantaro Mandana, Pawagal, jo Ra Semi mati samo-sama jo Nambi pado taun 1316.
Kaba pambrontakan Nambi pado taun 1316 dalam Pararaton juo disabuik dalam Nagarakretagama, dan diuraikan sacaro panjang dalam Kidung Sorandaka. Manuruik Nagarakretagama, pambarontakan Nambi tasabuik ditamui sacaro langsung dek Jayanagara surang.
Di antaro pambrontakan nan diwartakan dek Pararaton, nan paliang babayo adolah pambrontakan Ra Kuti pado taun 1319. Ibu kotonyo Majapahit bahkan barasil dirabuik dek para pambarontak, samantaro Jayanagara jo kaluarganyo tapaso mangungsi ka kampuang Badander di bawah pangawal para prajurit bhayangkari nan dipimpin dek Gajah Mada. Sasudah tu, Gajah Mada babaliak ka ibu kota untuak mangumpuakan kakuatan. Dek karano karajosamo antaro pajabaik jo rakyat di ibukota, Ra Kuti bisa dihancuakan.
Kutiko manjadi rajo, Jayanagara masih mudo sainggo digunoan urang-urang nan indak basuka hati untuak malawan. Inyo maraso indak puas jo kabijakan Rajo sabalunnyo, iyolah Raden Wijaya, nan manuruik ukuran inyo indak mambari pangkek nan inyo nio, dianggap indak patuik untuak karajonyo salamo bakarajo jo Raden Wijaya. Jadi, ado babarapo pambrontakan nan tajadi pado maso Rajo Jayanagara, di antaronyo:[7]
- Pemberontakan Ranggalawe (1309) => Ranggalawe sangaik kecewa dek panunjukannyo Nambi sabagai Patih di Istana Majapahit, inyo hanyo di agiahkan kedudukan nan labiah randah sabagai panguwaso wilayah Tuban.[8] Pemberontakannyo dapek dihancurkan indak lamo, jo Ranggalawe dibunuah dek Kebo Anabrang pado patampuran Sungai Tambak Beras.
- Pemberontakan Lembu Sora (1311) => Lembu Sora malawan karano mandapek hasutan dari surang pejabat Majapahit nan banamo Mahapati.[7] Mahapati adolah musuah dalam salimuik dari Raja Jayanagara, nan salamo ko mambuek tipu jo konspirasi di dalam Istana. Pambrontakan Lembu Sora dapek ditulak dek pihak Istana nan dipimpin dek Nambi.
- Pemberontakan Nambi (1316) => Nambi mambarontak dek dianggap ka manjadi rajo, walaupun Nambi alah dibari kedudukan tinggi sabagai Patih istana. Dek hasutan 'Mahapati', Jayanegara malawan Nambi. Nambi jo Ra Semi sempat mambuek partahanan di Pajarakan, tapi ahirnyo dapek dihancurkan juo dek Jayanegara.[8]
- Pemberontakan Ra Kuti (1319) => Pemberontakkan urang Dharmaputra nan dipimpin Ra Kuti barasia mangakuak istana karajaan sainggo Raja Jayanagara dipakek untuak maninggakan Istana. Dek pasukan 'Bhayangkari' di bawah pimpinan Gajah Mada, rajo disimpan di tampek nan sangaik rahasio iyolah di kampuang Badander. Dek inisiatif jo usaha Gajah Mada mako akienyo pihak karajaan dapek manggumpua kakuatan jo marabuik baliak istana. Akienyo rajo Jayanagara dapek babaliak baliak ka istana.[9]
Hubuangan jo Tiongkok
[suntiang | suntiang sumber]Tanah lauik Tiongkok pado maso itu dikuasai dek Dinasti Yuan atau banso Mongol. Pado taun 1321 saurang pangumbara misionaris nan banamo Odorico da Pordenone mangunjuangi Pulau Jawa jo sempat mancaliak pamarintahan Jayanagara. Inyo mancatat pasukan Mongol baliak datang untuak manjajah Jawa, tapi barhasil ditangani mundur dek pihak Majapahit. Hal iko maulangi ka gagalan urang ko pado taun 1293.[10]
Tapi hubungan antaro Majapahit jo Mongol sasudah itu batambah elok. Catatan dinasti Yuan manyabuik pado taun 1325 pihak Jawa manyuruah duta nan banamo Seng-kia-lie-yulan untuak misi diplomatik.[11] Tokoh iko ditafsirkan sabagai adityawarman anak Darah Jingga, atau sapupu Jayanagara surang.[10] Ayah Adityawarman adolah mantan pajabaik Singosari nan marupoan Mahamantri I Hino Dyah Adwayabrahma.
Kamatian Jayanegara
[suntiang | suntiang sumber]Pado taun 1328 M, salapan taun sasudah pemberontakan Ra Kuti, Jayanagara mati di tangan Ra Tanca, saurang pamain syair nan acok diminta untuak manghibur kaisar. Kisah pembunuhan tu dimulai pado taun 1328, wakatu Tanca nan juo adolah saurang tabib dimintak untuak maoperasi bisul nan ado di Jayanagara.[12] Dalam operasi bisua nan katigo Tanca manikam Jayanagara di ranjangnyo. Gajah Mada nan mananti di sabalah rajo indak lamo doh tagak, manikam Tanca jo mati sajak itu pulo. Tapi, carito iko masi indak jaleh kabanarannyo.[13]
Daftar Pustaka
[suntiang | suntiang sumber]- Slamet Muljana. 2005. Menuju Puncak Kemegahan (terbitan ulang 1965). Yogyakarta: LKIS
- Slamet Muljana. 1979. Nagarakretagama dan Tafsir Sejarahnya. Jakarta: Bhratara
- Kumpulan Sejarah Indonesia: https://www.facebook.com/KumpulanSejarahIndonesia/posts/464135513681551
Rujuakan
[suntiang | suntiang sumber]- ↑ "Raja-raja Majapahit – Universitas Islam An Nur Lampung". an-nur.ac.id. Diakses tanggal 2024-01-05.
- ↑ a b c Raditya, Iswara N. "Sejarah Hidup Jayanagara: Ironi Raja Majapahit yang Paling Dibenci". tirto.id (dalam bahasa Indonesia). Diakses tanggal 2024-01-05.
- ↑ a b c Media, Kompas Cyber (2021-08-05). "Jayanegara, Raja Majapahit yang Dibenci Halaman all". KOMPAS.com (dalam bahasa Indonesia). Diakses tanggal 2024-01-05.
- ↑ a b c d Media, Kompas Cyber (2024-01-03). "Mengapa Jayanegara Mendapat Julukan Kalagemet? Halaman all". KOMPAS.com (dalam bahasa Indonesia). Diakses tanggal 2024-01-05.
- ↑ Media, Kompas Cyber (2020-05-31). "Kalahnya Pasukan Mongol di Tanah Jawa Halaman all". KOMPAS.com (dalam bahasa Indonesia). Diakses tanggal 2024-01-05.
- ↑ a b c "Apa yang anda ketahui tentang Prabu Jayanagara, raja kedua Kerajaan Majapahit ?". Dictio Community (dalam bahasa Inggris). 2018-12-19. Diakses tanggal 2024-01-05.
- ↑ a b Media, Kompas Cyber (2022-08-13). "4 Pemberontakan di Kerajaan Majapahit, dari Ranggalawe hingga Kuti Halaman all". KOMPAS.com (dalam bahasa Indonesia). Diakses tanggal 2024-01-05.
- ↑ a b "Pemberontakan terbesar pada masa Jayanegara - Donisaurus" (dalam bahasa Indonesia). Diakses tanggal 2024-01-05.
- ↑ "Kisah Pemberontakan Ra Kuti yang Memaksa Raja Jayanegara Mengungsi dari Istana Majapahit". SINDOnews Daerah (dalam bahasa Indonesia). Diakses tanggal 2024-01-05.
- ↑ a b Kompasiana.com (2023-01-30). "Adityawarman, Diplomat Ulung Majapahit". KOMPASIANA (dalam bahasa Indonesia). Diakses tanggal 2024-01-05.
- ↑ "Hubungan Diplomatik Majapahit dengan Kekaisaran Cina Saat Huru-hara Dinasti Yuan". SINDOnews Daerah (dalam bahasa Indonesia). Diakses tanggal 2024-01-05.
- ↑ "5 Pemberontakan yang Mengakibatkan Majapahit Hancur Pelan-pelan". SINDOnews Daerah (dalam bahasa Indonesia). Diakses tanggal 2024-01-05.
- ↑ "Akhir Tragis Raja Jayanegara Penguasa Majapahit, Dibunuh Abdi Dalem karena Lecehkan Istri Orang". SINDOnews Daerah (dalam bahasa Indonesia). Diakses tanggal 2024-01-05.