Implan gigi

Bagian-bagian dari implan gigi

Implan gigi adolah aka gigi nan dibuek babantuak takah bauik nan ditanam di rahang untuak mangganti aka gigi nan hilang, Sasudah itu dilatakan gigi pangganti di ateh aka gigi nan dibuek tadi. Atau bisa disabuik juo implan gigi ko adolah gigi tanam. Pananaman aka tu dilakuan di tulang rahang ateh atau bawah, kamudian ka manyatu jo tulang sasudah babarapo bulan.

Komposisi

Sabuah implan tadiri dari sekrup titanium (manyarupoi aka gigi) jo pamukaan kasa jo haluih. Kabanyakan implan gigi tabuek dari titanium murni, nan tasadio dalam ampek kelas tagantuang pado banyak karbon, nitrogen, oksigen jo basi nan takanduang di dalamnyo.

Prosedur implan gigi

Pasiapan

Sabalum malakuan implan gigi paralu diparatian bana kondisi kasihatan tubuah urangnyo. Indak sado urang nan buliah malakuan impam gigi ko. Kategori urang nan buliah malakuan implan gigi, diantaronyo adolah :

• harus punyo gusi nan sihaik jo tulang nan cukuik kuek untuak manahan implan.
• indak mandarito panyakik kancing manih.
• indak mandarito panyakik jantuang.
• indak urang nan candu marokok.
• indak sadang manjalani radioterapi di dakek lihia atau kapalo.
• mampunyoi jarigan muluik jo gusi nan sihaik.
• indak punyo gangguan kasihatan jo patumbuhan tulang takah osteoporosis atau panyakik tulang lainnyo karano dapek mampangaruhi rasiko kagagalan awal implan.

Salain mancaliak kasihatan badan, dicaliak pulo kasihatan membran mukosa sarato rahang, baiak bantuak, ukuran jo posisi tulang rahang. Kasihatan gigi juo paralu dicaliak, gigi nan badakekan sarato gigi nan balawan jo tampek nan kadipasang implan. Pado kondisi iko, dotor badah gigi manceknyo jo malakuan rontgen muluik, film panorama, atau CT scan. Kualitas jo kuantitas tulang rahang diparaluan untuak mancaliak apokah paralu banyak tulang di lokasi implan atau indak.

Pambadahan

Prosedur pambadahan implan gigi

Tampek nan kahilangan gigi

Gusi nan disaik jo marefleksikan jaringan supayo tulang rahang nampak

Sasudah tulang nampak, dilakuan bor untuak malatakan implan

Palengkapan implan diubah manjadi osteotomi. Idealnyo itu sapanuahnyo ditutuik dek tulang jo indak bisa manggarik dalam tulang

Sabuah pambateh panyambuhan nan lakek di palangkapan implan, jo lipatan gusi dijaik disakita pambateh panyambuhan

Tahap partamo

Ditantuan dahulu dimano ka dilakuan implan sasuai lokasi jo kainginan pasien. Sasudah dapek daerahnyo, pasien akan malakuan prosedur badah implan gigi. Salamo prosedur badah balangsuang, pasien biasonyo diagiah bius lokal untuak mamatian daerah sakitar badah sarato ubek pananang lainnyo jikok diparaluan untuak kanyamanan pasien. Tahap partamo badah muluik acok adolah mancabuik gigi. Karano di tampek nan kadipasang implan gigi acok masih ado tasiso gigi nan rusak, jadi gigi nan rusak tu paralu diambiak dulu (ekstrak).

Ado babarapo pilihan wakatu untuak palatakan implan sasudah gigi diekstrak:

• palatakan implan sacaro langsuang
• ado jeda wakatu saketek sasudah gigi diekstrak, yaitu duo minggu sampai tigo bulan
• jeda wakatu panjang, yaitu kiro-kiro tigo bulan atau labiah

Tahap kaduo

Di tahap salanjuiknyo, cangkok tulang dilakuan untuak mancapai dasar tulang nan kokoh untuak implan. Tahap iko paralu wakatu duo minggu sampai anam bulan untuak sihaik. Untuak kondisi nan indak punyo gigi atau tulang nan hilang, paralu dilakuan cangkok tulang nan babeda jo ditampekan di ateh tulang rahang nan ado. Langkah iko paralu wakatu kiro-kiro anam bulan atau labiah untuak supayo sihaik.

Sasudah tulang dipastian bana kuat, implan baru siap dilakuan. Biasonyo sistem implan punyo limo langkah dasar untuak panampekan masiang-masiang implan.

1. refleksi jaringan lunak: manyaik dagiang di ateh puncak tulang, mambalah gusi sahinggo implan bisa dimasuakan salanjuiknyo.
2. pangaboran jo kecepatan nan kancang : mambuek lubang untuak latak implan.
3. pangaboran jo kecepatan randah : lubang nan alah dibuek dipalueh (biasonyo antaro tigo jo tujuah langakah pangaboran baturuik-turuik tagantuang kp leba jo panjang implan).
4. palatakan implan : sekrup implan dilatakan di tampek nan alah dilakuan pangaboran tadi.
5. adaptasi jaringan : gusi disasuaikan di saluruah implan untuak manyadiokan sakalompok di sakitar jaringan sehat.

Tahap katigo

Tahap salanjuiknyo adolah tahap panyambuhan. Salamo proses panyambuhan ko, gigi tiruan dibuek untuak mangganti gigi nan ilang. Wakatu panyambuhan bisa babeda tiok urang, tagantuang pado kualitas tulang. Wakatu payambuhan biasonyo kiro-kiro antaro duo sampai anam bulan. Salamo wakatu iko, implan manjadi tahubuang ka tulang. Ijan sampai ado takanan pado implan salamo proses panyambuhan iko. Pariso implan nan baru dibuek ka dotor gigi untuak mamastian indak ado infeksi sarato proses panyambuhan bajalan saharusnyo.

Sasudah proses panyambuhan ko, implan diuji apokah lai bahasia tasambuang ka tulang di sakaliliangnyo. Sasudah itu abutment tahubuang ka implan gigi malalui sekrup. Abutment ko bafungsi untuak manahan gigi pangganti atau mahkota

Tahap kaampek

Pado tahap kaampek, dotor gigi maambiak cetakan dari panyangga di muluik jo implan mahkota nan dibuek khusus supayo pas. Implan mahkota disemen jo sekrup ka abutment.

Caro manjago kasihatan implan gigi

Sasudah malakuan implan gigi, kasihatan gigi harus tatap dijago supayo indak tajadi hal-hal nan buruak. Babarapo hal nan bisa dilakuan untuak manjago kasihatannyo adolah:

1. Maindari kabiasaan nan dapek marusak gigi, contohnyo manggigik makanan nan kareh, marokok, maminum kopi.
2. Manjago kabarasihan muluik jo gigi. Untuak manyikek gigi bisa dibali sikek gigi khusus untuak mambarasihan gigi palsu jo implan gigi
3. Pai kontrol ka dotor gigi sacaro rutin, apolai jikok implan gigi tagaruih.

Kauntungan implan gigi

Ado babarapo kauntungan dari mamasang implan gigi:

1. Maningkekan kamampuan mangecek. Implan gigi indak manggaduah katiko mangecek, babeda jo mamasang gigi palsu nan kadang agak manggaduah ka caro mangecek dek pamasangannyo indak pas.
2. Labiah nyaman. Manggunoan implan gigi akan mambuek labiah nyaman karano pamasangannyo labiah kuat dari pamasangan gigi palsu.
3. Makan labiah mudah. Implan gigi bafungsi takah gigi asli,implan gigi indak ka bageser sarupo gigi palsu, pamasangannyo labiah kuat dan indak ka mangganggu katiko makan.
4. Daya tahan. Daya tahan implan labiah lamo dan bisa batahan salamo batahun-tahun. Jikok parawatannyo elok, implan bisa batahan salamo iduik.

Rasiko implan gigi

Implan gigi bisa pulo punyo rasiko, sarupo jo pambadahan lainnyo. Babarapo rasiko nan bisa tajadi adolah

1. infeksi di tampek pamasangan implan gigi.
2. tibo ganggua sinus jikok implan gigi di rahang ateh manembus rongga sinus.
3. karusakan jaringan di sakita implan gigi.

Rujuakan

Daftar Pustaaka

• alodokter.com. "Implan Gigi". Alodokter. Diakses tanggal 2020-02-11. 

• "Mengenal Prosedur Implan Gigi yang Ternyata Lebih Baik dari Gigi Palsu". Hello Sehat (dalam bahasa Indonesia). 2018-04-01. Diakses tanggal 2020-02-11. 

• Branemark, Per-Ingvar; Zarb, George (1989). Tissue-integrated prostheses (in English). Berlin, German: Quintessence Books. ISBN 978-0867151299. https://archive.org/details/tissueintegrated00bran. 

• Esposito M, Grusovin MG, Polyzos IP, Felice P, Worthington HV (2010). "Timing of implant placement after tooth extraction: immediate, immediate-delayed or delayed implants? A Cochrane systematic review" (PDF). European Journal of Oral Implantology. 3 (3): 189–205. PMID 20847990. Diarsipkan dari versi asli (PDF) tanggal 2014-03-26.  Pemeliharaan CS1: Banyak nama: authors list (link)

• Arturo N. Natali (ed.) (2003). "Dental Biomechanics". Taylor & Francis , London / New York, 273 pp.,. ISBN 978-0-415-30666-9, pp. 69-87.